જમીન પણ સચવાશે અને પાક પણ હરાભરો રહેશે! જાણો GSFCની નવી સાત પહેલ વિશે વિગતવાર
કૃષિ ક્ષેત્રે ટેકનોલોજી અને આધુનિક સંશોધનોનો ઉપયોગ કરીને ખેડૂતોની આવક બમણી કરવા અને જમીનની ફળદ્રુપતા જાળવી રાખવા માટે ગુજરાત સરકાર સતત પ્રયત્નશીલ રહી છે. આ દિશામાં એક મોટું અને મહત્વપૂર્ણ કદમ ઉઠાવતા રાજ્ય સરકારના જાહેર સાહસ ‘ગુજરાત સ્ટેટ ફર્ટિલાઈઝર એન્ડ કેમિકલ્સ લિમિટેડ’ (GSFC) દ્વારા ૭ નવા ઈનોવેટીવ કૃષિ ઉત્પાદનો બજારમાં મૂકવામાં આવ્યા છે. ગાંધીનગર ખાતે આયોજિત એક વિશેષ સમારંભમાં મુખ્યમંત્રી ભૂપેન્દ્ર પટેલે આ ઉત્પાદનોનું વિધિવત લોન્ચિંગ કર્યું હતું.
આ પ્રસંગે કૃષિ મંત્રી જીતુભાઈ વાઘાણી, ઊર્જા મંત્રી ઋષિકેશ પટેલ, રાજ્યમંત્રી કૌશિક વેકરિયા તેમજ કૃષિ રાજ્યમંત્રી રમેશ કટારા સહિત રાજ્યના ઉચ્ચ અધિકારીઓ અને કૃષિ વૈજ્ઞાનિકો વિશેષરૂપે ઉપસ્થિત રહ્યા હતા. આ સાતેય ઉત્પાદનો ખેડૂતોના પાકને જીવાતો અને નિંદણ સામે શક્તિશાળી રક્ષણ આપવા માટે વિકસાવવામાં આવ્યા છે.
‘વિકસિત ભારત’ માટે ‘વિકસિત કૃષિ’: મુખ્યમંત્રી ભૂપેન્દ્ર પટેલનું મનનીય સંબોધન
કાર્યક્રમને સંબોધતા મુખ્યમંત્રી ભૂપેન્દ્ર પટેલે જણાવ્યું હતું કે, વડાપ્રધાન નરેન્દ્રભાઈ મોદીના નેતૃત્વ હેઠળ ‘વિકસિત ભારત @૨૦૪૭’ના સંકલ્પને સાકાર કરવામાં દેશનો અન્નદાતા એટલે કે ખેડૂત સૌથી મજબૂત પિલર છે. દેશના ગરીબો, યુવા, નારીશક્તિ અને અન્નદાતા – આ ચાર સ્તંભો પર જ સમૃદ્ધ રાષ્ટ્રની ઈમારત ચણાઈ રહી છે.
વડાપ્રધાનના જાહેર જીવનની ૨૫ વર્ષની સેવા સાધનાના ઉપલક્ષ્યમાં રાજ્યભરમાં ઉજવાઈ રહેલા ‘સેવા સંકલ્પ અભિયાન’ અંતર્ગત GSFCની આ પહેલ ખૂબ જ અર્થપૂર્ણ સાબિત થશે. ખેડૂત સમૃદ્ધ થશે તો જ કૃષિ ક્ષેત્રનો વિકાસ થશે અને કૃષિના વિકાસથી જ ગ્રામીણ અર્થતંત્ર મજબૂત બનશે. GSFC દ્વારા ટેકનોલોજી આધારિત અને સસ્ટેનેબલ (ટકાઉ) ખેતી માટે કરવામાં આવી રહેલી કામગીરી ખરેખર બિરદાવવા લાયક છે.
મુખ્યમંત્રીએ ઉમેર્યું કે, GSFCની ‘સરદાર’ બ્રાન્ડ ખેડૂતોમાં વિશ્વાસનું બીજું નામ બની ગઈ છે. ક્વોલિટી, વેલ્યુ એડિશન, પ્રોસેસિંગ અને ગ્લોબલ માર્કેટ સુધી પહોંચવા માટે આ નવા ઉત્પાદનો ખેડૂતો માટે એક મજબૂત ઢાલ સમાન બની રહેશે.
કૃષિ મંત્રી જીતુભાઈ વાઘાણીનો સંદેશ: “સંશોધનથી પાક સુરક્ષા અને ખેડૂતની સમૃદ્ધિ”
રાજ્યના કૃષિ મંત્રી જીતુભાઈ વાઘાણીએ પોતાના પ્રાસંગિક પ્રવચનમાં GSFCના ઐતિહાસિક યોગદાનને યાદ કર્યું હતું. તેમણે જણાવ્યું કે, ૧૯૬૨થી કાર્યરત GSFC એ માત્ર ખાતર બનાવતી કંપની નથી, પરંતુ ખેડૂતોની સચ્ચી હમદર્દ છે. આ નવા જંતુનાશક અને નિંદણનાશક ઉત્પાદનો ખેડૂતોની મહેનતને એળે જતી અટકાવશે અને તેમની આવકમાં વધારો કરશે.
કૃષિ મંત્રીએ આ સાત ઉત્પાદનોની વિશિષ્ટતા જણાવતા કહ્યું કે, આ તમામ દવાઓ અત્યંત આધુનિક સંશોધન (R&D) બાદ તૈયાર કરવામાં આવી છે. આ કીટનાશકોની સૌથી મોટી ખાસિયત એ છે કે તે પાક પર રહેલી જીવાતો સામે ચોક્કસ સમય સુધી જ રક્ષણ આપે છે અને ત્યારબાદ જમીન કે પર્યાવરણને નુકસાન પહોંચાડ્યા વિના જમીનમાં ભળી જાય છે.
તેમણે ખેડૂત મિત્રોને અપીલ કરી હતી કે, રાસાયણિક દવાઓનો બેફામ ઉપયોગ કરવાને બદલે જરૂરિયાત મુજબ અને યોગ્ય પ્રમાણમાં જ ઉપયોગ કરવો જોઈએ જેથી જમીનનું સ્વાસ્થ્ય પણ જળવાઈ રહે. આ તમામ દવાઓ ખેડૂતોને અત્યંત વ્યાજબી અને આર્થિક રીતે પોસાય તેવા ભાવે ઉપલબ્ધ કરાવવામાં આવશે.
શું છે GSFCની આ ૭ નવી ‘સરદાર’ પહેલ?
GSFC દ્વારા લોન્ચ કરવામાં આવેલી ‘સરદાર’ બ્રાન્ડની ૭ નવી પ્રોડક્ટ્સ પાક રક્ષણ ક્ષેત્રે ક્રાંતિ લાવશે. આ ઉત્પાદનોમાં સામેલ છે:
૧. સરદાર સાથી
૨. સરદાર રફતાર
૩. સરદાર તુફાની ફિપ્રો
૪. સરદાર જાનદાર
૫. સરદાર આધાર
૬. સરદાર જી-ગોલ્ડ
૭. સરદાર સેનાપતિ
આ તમામ ઉત્પાદનો વિવિધ પાકોમાં આવતી જીવાતો, રોગ અને બિનજરૂરી નિંદણ સામે રક્ષણ આપશે. આ દવાઓ ખેડૂતો સુધી સરળતાથી પહોંચી શકે તે માટે GSFCના તમામ ‘કિસાન સુવિધા કેન્દ્રો’ તેમજ અધિકૃત ડિસ્ટ્રીબ્યુટર નેટવર્ક દ્વારા વિતરિત કરવામાં આવશે.
‘કૃષિજીવન’ મેગેઝિનનું અનાવરણ: ખેડૂતો માટે માર્ગદર્શિકા
આ પ્રસંગે માત્ર કૃષિ ઇનપુટ્સ જ નહીં, પરંતુ ખેડૂતોના જ્ઞાનવર્ધન માટે પણ એક મહત્વપૂર્ણ કદમ ઉઠાવવામાં આવ્યું હતું. મુખ્યમંત્રી ભૂપેન્દ્ર પટેલ અને ઉપસ્થિત મહાનુભાવોના હસ્તે GSFC દ્વારા પ્રકાશિત ‘કૃષિજીવન’ મેગેઝિનનું અનાવરણ કરવામાં આવ્યું હતું.
આ મેગેઝિનમાં કૃષિ વૈજ્ઞાનિકોના અદ્યતન સંશોધનો, પાક સંરક્ષણની નવીન પદ્ધતિઓ, ઋતુગત ખેતી અંગેની સલાહ અને જમીનના આરોગ્ય અંગેની ઉપયોગી માહિતી સમાવવામાં આવી છે, જે ખેડૂતો માટે માર્ગદર્શક બની રહેશે.
કાર્યક્રમમાં ઉપસ્થિતિ અને સંચાલન
ગાંધીનગર ખાતે આયોજિત આ કાર્યક્રમમાં રાજ્યના મુખ્ય સચિવ અને GSFCના ચેરમેનએમ. કે. દાસ, મેનેજિંગ ડિરેક્ટર રાજેન્દ્ર કુમાર તેમજ ડિરેક્ટર અશ્વિની કુમાર ખાસ ઉપસ્થિત રહ્યા હતા. આ ઉપરાંત સંસ્થાના ઉચ્ચ અધિકારીઓ, કૃષિ વૈજ્ઞાનિકો અને કર્મચારીઓ પણ મોટી સંખ્યામાં હાજર રહ્યા હતા. મુખ્યમંત્રીએ આ સફળ લોન્ચિંગ બદલ GSFCના વૈજ્ઞાનિકો અને સંશોધકોની આખી ટીમને અભિનંદન પાઠવ્યા હતા.
