મોસ્કોમાં ભયાનક કાર બોમ્બ બ્લાસ્ટ: રશિયન જનરલ ફાનિલ સરવારોવનું મોત, વ્લાદિમીર પુતિનને લાગ્યો મોટો ઝટકો
રશિયાની રાજધાની મોસ્કો સોમવારે (22 ડિસેમ્બર 2025) સવારે એક શક્તિશાળી કાર બોમ્બ વિસ્ફોટથી ધણધણી ઉઠી હતી, જેમાં રશિયન સેનાના એક અત્યંત વરિષ્ઠ અધિકારીએ જીવ ગુમાવ્યો છે. સૂત્રોના જણાવ્યા અનુસાર, આ શંકાસ્પદ હુમલામાં રશિયન સશસ્ત્ર દળોના જનરલ સ્ટાફના ઓપરેશનલ ટ્રેનિંગ ડિરેક્ટોરેટના વડા, લેફ્ટનન્ટ જનરલ ફાનિલ સરવારોવનું મોત થયું છે.
પાર્કિંગ લોટમાં થયો જોરદાર ધડાકો
આ વિસ્ફોટ દક્ષિણ મોસ્કોની યાસેનેવાયા સ્ટ્રીટ પર એક એપાર્ટમેન્ટ બિલ્ડિંગ પાસે આવેલા પાર્કિંગ લોટમાં સવારે લગભગ 7 વાગ્યે (સ્થાનિક સમય મુજબ) થયો હતો. તપાસ મુજબ, વિસ્ફોટક ઉપકરણ જનરલની ‘કિયા સોરેન્ટો’ કારની નીચે લગાવવામાં આવ્યું હતું. ધડાકો તે સમયે થયો જ્યારે 56 વર્ષીય જનરલ સરવારોવ ગાડીની અંદર જ હતા અને પોતાની ઓફિસ જવા માટેની તૈયારી કરી રહ્યા હતા. વિસ્ફોટ એટલો શક્તિશાળી હતો કે તેમને ગંભીર ઈજાઓ થઈ અને તેમણે ઘટનાસ્થળે જ દમ તોડી દીધો હતો.
પુતિન માટે વ્યૂહાત્મક નુકસાન
લેફ્ટનન્ટ જનરલ ફાનિલ સરવારોવ રશિયન સશસ્ત્ર દળોમાં એક મહત્વપૂર્ણ અને સંવેદનશીલ પદ પર તૈનાત હતા. તેઓ સેનાની વ્યૂહાત્મક તાલીમ અને યુદ્ધની તૈયારીઓ (War Preparedness) માટે જવાબદાર વિભાગના વડા હતા. તેમનો વિભાગ સીધી રીતે રશિયાની યુદ્ધ ક્ષમતા અને સંરક્ષણ નીતિ સાથે જોડાયેલો માનવામાં આવતો હતો. સૂત્રોના જણાવ્યા અનુસાર, યુક્રેન યુદ્ધ વચ્ચે રાજધાની મોસ્કોમાં આટલા વરિષ્ઠ અધિકારીને નિશાન બનાવવા એ રશિયન સુરક્ષા તંત્રની મોટી ભૂલ છે અને તેનાથી રાષ્ટ્રપતિ વ્લાદિમીર પુતિન પર લશ્કરી દબાણ વધી શકે છે.
યુક્રેનિયન ગુપ્તચર એજન્સી પર શંકા
રશિયાની તપાસ સમિતિ (Investigative Committee) એ આ મામલે હત્યા અને વિસ્ફોટકોના ગેરકાયદેસર ઉપયોગની કલમો હેઠળ ગુનાહિત કેસ દાખલ કર્યો છે. સમિતિના સત્તાવાર પ્રવક્તા શ્વેતલાના પેટ્રેન્કોએ જણાવ્યું હતું કે તપાસના અનેક પાસાઓમાંથી એક એ પણ છે કે આ અપરાધનું કાવતરું યુક્રેનિયન ગુપ્તચર સેવાઓ દ્વારા ઘડવામાં આવ્યું હોઈ શકે છે. જોકે, યુક્રેન સરકારે હજુ સુધી આ બાબતે કોઈ પ્રતિક્રિયા આપી નથી.
સતત થઈ રહ્યા છે હુમલા
સૂત્રોના જણાવ્યા અનુસાર, આ ઘટના રશિયન અધિકારીઓ અને ક્રેમલિન સમર્થક હસ્તીઓ પર કરવામાં આવી રહેલા હુમલાઓની એક લાંબી કડીનો ભાગ છે. આ પહેલા પણ અનેક હાઈ-પ્રોફાઈલ હત્યાઓ થઈ ચૂકી છે:
- એપ્રિલ 2025: જનરલ સ્ટાફના ડેપ્યુટી જનરલ યારોસ્લાવ મોસ્કાલિકનું મોસ્કો પાસે કાર ધડાકામાં મોત થયું હતું.
- ડિસેમ્બર 2024: રશિયન સંરક્ષણ દળોના વડા ઇગોર કિરીલોવ એક વિસ્ફોટમાં માર્યા ગયા હતા.
- ઓગસ્ટ 2022: એક કાર બોમ્બ ધડાકામાં એલેક્ઝાન્ડર દુગિનની પુત્રી ડારિયા દુગિનાનું મોત થયું હતું.
રશિયન તપાસ એજન્સીઓ હાલમાં ઘટનાસ્થળના સીસીટીવી ફૂટેજ ચકાસી રહી છે અને સાક્ષીઓની પૂછપરછ કરી રહી છે જેથી આ હુમલા પાછળના અસલી ચહેરાઓને બેનકાબ કરી શકાય.
