ગુજરાત સહિત અનેક રાજ્યોની નકલી યુનિવર્સિટી ડિગ્રીઓનો પર્દાફાશ
દિલ્હી પોલીસની ક્રાઈમ બ્રાન્ચે રાજધાનીના રોહિણી વિસ્તારમાં એક મોટા બનાવટી ડિગ્રી રેકેટનો પર્દાફાશ કર્યો છે. આ કાર્યવાહી દરમિયાન પોલીસે લગભગ અડધો ડઝન જેટલા શખ્સોને ઝડપી લીધા છે. આરોપીઓ દેશભરની જાણીતી કોલેજો અને યુનિવર્સિટીના નામે નકલી ડિગ્રીઓ તૈયાર કરતા હતા. લાખો રૂપિયાની લેનદેન સાથે ચાલતું આ રેકેટ લાંબા સમયથી સક્રિય હોવાનું સામે આવ્યું છે.
ગુજરાત સહિત અનેક રાજ્યોની ડિગ્રીઓ બનાવાતી
તપાસમાં ખુલાસો થયો છે કે આ ગેંગ ગુજરાત, મધ્યપ્રદેશ, છત્તીસગઢ અને અરુણાચલ પ્રદેશ સહિતના રાજ્યોની યુનિવર્સિટીની નકલી ડિગ્રીઓ તૈયાર કરતી હતી. ગ્રાહકોને આ ડિગ્રીઓ સાચી હોવાનું ભાન કરાવી મોટી રકમ વસૂલવામાં આવતી હતી. પોલીસે આરોપીઓ પાસેથી મોટી સંખ્યામાં નકલી સર્ટિફિકેટ, ડિગ્રીઓ અને મહત્વપૂર્ણ દસ્તાવેજો કબજે કર્યા છે.
રોહિણીમાંથી ચાલતું હતું આખું નેટવર્ક
સૂત્રોના જણાવ્યા મુજબ, આરોપીઓ રોહિણી વિસ્તારમાં ‘એમલે ગ્રુપ’ નામે એક સંસ્થા ચલાવતા હતા. આ સંસ્થા મારફતે તેઓ ઉચ્ચ શિક્ષણ ક્ષેત્રમાં છેતરપિંડી કરતા હતા. માત્ર ભારતમાં જ નહીં, પરંતુ વિદેશમાં પણ નકલી ડોક્ટરેટ અને અન્ય ઉચ્ચ ડિગ્રીઓ પૂરું પાડતા હોવાનું તપાસમાં સામે આવ્યું છે.
જૂની કાર્યવાહી બાદ ગેંગ પર નજર
જૂન મહિનાની શરૂઆતમાં આ જ વિસ્તારમાંથી એક શખ્સ ઝડપાયો હતો, જેના પાસેથી નકલી ડિગ્રીઓ મળી આવી હતી. ત્યારબાદ દિલ્હી પોલીસે આ ગેંગ પર સતત નજર રાખી હતી. મળેલી ગુપ્ત માહિતીના આધારે ગઈકાલે રાત્રે દરોડો પાડવામાં આવ્યો અને સમગ્ર રેકેટનો પર્દાફાશ થયો.
વધુ ધરપકડની શક્યતા
હાલમાં ધરપકડ કરાયેલા આરોપીઓની સઘન પૂછપરછ ચાલી રહી છે. પોલીસ માને છે કે આ કૌભાંડમાં હજુ વધુ લોકો સંડોવાયેલા હોઈ શકે છે. વિવિધ રાજ્યોમાં ફેલાયેલા નેટવર્કની તપાસ શરૂ કરવામાં આવી છે. પોલીસનું કહેવું છે કે આવા રેકેટ શિક્ષણ વ્યવસ્થાને ગંભીર નુકસાન પહોંચાડે છે.
