1992 બેચના IPS અધિકારી ડૉ. રાવ ગુજરાતના નવા ઈન્ચાર્જ DGP તરીકે નિમાયા
ગુજરાત પોલીસ તંત્રમાં મહત્વપૂર્ણ વહીવટી ફેરફાર કરવામાં આવ્યો છે. રાજ્યના પોલીસ મહાનિદેશક તરીકે કાર્યરત વિકાસ સહાયનો કાર્યકાળ પૂર્ણ થતાં હવે નવી જવાબદારી સોંપવામાં આવી છે. સરકાર દ્વારા લેવામાં આવેલા નિર્ણય અનુસાર ડૉ. કે. લક્ષ્મી નારાયણ રાવને ગુજરાતના નવા ઈન્ચાર્જ ડીજીપી બનાવવામાં આવ્યા છે. આ ફેરફાર 31 ડિસેમ્બર 2025થી અમલમાં આવ્યો છે. ગાંધીનગર સ્થિત રાજ્ય પોલીસ તંત્રમાં આ નિમણૂકને મહત્વપૂર્ણ માનવામાં આવી રહી છે.
વિકાસ સહાયના નિવૃત્તિ બાદ ડૉ. રાવને વધારાનો હવાલો
સત્તાવાર આદેશ મુજબ વિકાસ સહાય, 1989 બેચના આઈપીએસ અધિકારી, વયનિવૃત્ત થતાં પોલીસ મહાનિદેશકનું પદ ખાલી થયું હતું. આ ખાલી જગ્યા માટે કોઈ નવી નિમણૂક થાય ત્યાં સુધી વધારાનો હવાલો આપવામાં આવ્યો છે. આ જવાબદારી ડૉ. કે. લક્ષ્મી નારાયણ રાવને તેમની હાલની ફરજો ઉપરાંત સોંપવામાં આવી છે. તેઓ હાલ CID ક્રાઈમ અને રેલ્વેઝના વડા તરીકે કામગીરી કરી રહ્યા હતા. હવે તેઓ ઈન્ચાર્જ ડીજીપી તરીકે પણ જવાબદારી સંભાળશે.
1992 બેચના અનુભવી અધિકારી તરીકે ઓળખ ધરાવતા ડૉ. રાવ
ડૉ. કે.એલ.એન. રાવ 1992 બેચના આઈપીએસ અધિકારી છે અને તેમને લાંબા સમયનો પ્રશાસનિક અનુભવ છે. ગુજરાત પોલીસમાં વિવિધ મહત્વપૂર્ણ પદો પર તેમણે ફરજ બજાવી છે. CID ક્રાઈમના વડા તરીકે તેમની કામગીરીને પ્રશંસનીય માનવામાં આવે છે. વર્તમાન નિયમો અનુસાર તેઓ ઓક્ટોબર 2027માં નિવૃત્ત થવાના છે. ત્યાં સુધી તેઓ રાજ્ય પોલીસ તંત્રમાં મહત્વની ભૂમિકા ભજવશે તેવી અપેક્ષા છે.
