પરીક્ષા વિભાગમાં ચકાસણી શરૂ, આવતીકાલનું નવું પેપર તૈયાર કરવાની કાર્યવાહી
ગુજરાત યુનિવર્સિટીની માસ્ટર ઓફ માસ કમ્યુનિકેશન એન્ડ જર્નાલિઝમની પરીક્ષામાં આજે મોટી ગફલત સામે આવી છે. નક્કી કાર્યક્રમ મુજબ વિદ્યાર્થીઓને મીડિયા રિસર્ચનું 502 નંબરનું પેપર આપવાનું હતું, પરંતુ ભૂલથી તેમને આવતીકાલે યોજાનારા 503 નંબરના પ્રશ્નપત્રો આપી દેવામાં આવ્યા હતા. પ્રશ્નપત્ર હાથમાં લેતા જ અનેક વિદ્યાર્થીઓ ચોંકી ગયા અને તેમને લાગ્યું કે કદાચ તેઓ ખોટું પેપર લઈને આવી ગયા છે. પરંતુ ટૂંક સમયમાં સ્પષ્ટ થઈ ગયું કે ભૂલ વિદ્યાર્થીઓની નહીં પરંતુ પેપર સેટિંગના તંત્રની હતી.
વિદ્યાર્થીઓના વિરોધ બાદ પેપર બદલી કાર્યપ્રણાલી સુધારી
વિદ્યાર્થીઓએ સુપરવાઇઝરનું ધ્યાન દોરતા જ યુનિવર્સિટી તંત્ર સક્રિય બન્યું અને ગેરસમજ દૂર કરવા પ્રક્રિયા ઝડપથી હાથ ધરવામાં આવી. આવતીકાલનું પેપર તરત જ પાછું ખેંચીને વિદ્યાર્થીઓને યોગ્ય 502 નંબરનું પ્રશ્નપત્ર આપવામાં આવ્યું. ગફલતને કારણે વિદ્યાર્થીઓનો સમય વેડફાયો હતો, ત્યારબાદ યુનિવર્સિટીએ તેમને વધારાનો સમય આપીને પરીક્ષા પૂર્ણ કરવાની સુવિધા આપી. આ ઘટનાથી પરીક્ષા કક્ષા અને સુરક્ષા પ્રક્રિયા અંગે ફરીથી ચર્ચા શરૂ થઈ છે.
આવતીકાલના પેપર માટે નવી સેટિંગ, ભૂલની તપાસ શરૂ
એક દિવસ પૂર્વેનો પ્રશ્નપત્ર વિદ્યાર્થીઓ સુધી પહોંચી જવાથી સમગ્ર પરીક્ષા વ્યવસ્થાની પારદર્શિતા પર સવાલ ઊભા થયા છે. યુનિવર્સિટી તરફથી સ્પષ્ટ કરવામાં આવ્યું છે કે આવતીકાલની પરીક્ષા માટે સંપૂર્ણ નવું પેપર સેટ કરવામાં આવશે. જેથી પ્રશ્નપત્ર લીક જેવી શંકાઓ ન ઉભી થાય અને પરીક્ષા નક્કર રીતે થઈ શકે. તંત્ર હવે પેપર સેટિંગ અને પ્રશ્નપત્ર વિતરણની પ્રક્રિયાની ફરી તપાસ કરી રહ્યું છે.
પરીક્ષા નિયામકનું નિવેદન, વિભાગીય વડાને તપાસના આદેશ
પરીક્ષા નિયામક કલ્પીન વોરાએ જણાવ્યું કે આ સંપૂર્ણ ઘટના પેપર સેટિંગની ભૂલને કારણે બની છે. વિભાગીય વડા સોનલબેનને તાત્કાલિક જાણ કરી દેવામાં આવી છે અને સમગ્ર છબરડાની વિગતવાર તપાસના આદેશ આપવામાં આવ્યા છે. તમામ સ્ટાફને પરીક્ષા વિભાગમાં હાજર રહેવાનો નિર્દેશ આપવામાં આવ્યો છે જેથી ભૂલનું મૂળ કારણ જાણી શકાય અને આવનાર સમયમાં આવી ગફલત ફરી ન થાય.
