હોમ લોન રિપેમેન્ટમાં રોકડ વ્યવહારોનું જોખમ – ટેક્સની મુશ્કેલીથી કેવી રીતે બચશો?
હોમ લોન લેવી એ જેટલી મોટી જવાબદારી છે, તેને યોગ્ય રીતે ચૂકવવી પણ તેટલી જ મહત્વની છે. ઘણા લોકો પોતાની હોમ લોન વહેલી પૂરી કરવાના ઉત્સાહમાં રોકડ (Cash) માં મોટી રકમ ચૂકવવાની ભૂલ કરે છે, જે આવકવેરા વિભાગની તપાસનું કારણ બની શકે છે.
રોકડમાં લોન ચૂકવવી કેમ સલામત નથી?
ઘર ખરીદવાનું સપનું પૂરું કરવા માટે મોટાભાગના લોકો હોમ લોનનો સહારો લેતા હોય છે. લોન લીધા પછી તેને ઝડપથી પૂરી કરવી એ દરેકની પ્રાથમિકતા હોય છે, પરંતુ આ પ્રક્રિયામાં રોકડ વ્યવહારો કરવા એ હંમેશા યોગ્ય પદ્ધતિ નથી. હાલમાં આવકવેરા વિભાગ અને બેંકિંગ સિસ્ટમ રોકડ વ્યવહારો પર ખૂબ જ ઝીણવટભરી નજર રાખી રહી છે.
પાન કાર્ડ અને રોકડ જમાની મર્યાદા
બેંકિંગ નિયમો મુજબ, જો તમે કોઈ પણ વ્યવહારમાં ૫૦,૦૦૦ રૂપિયા કે તેથી વધુની રોકડ રકમ જમા કરાવો છો, તો પાન (PAN) કાર્ડની વિગતો આપવી ફરજિયાત છે. જો રકમ ૫૦,૦૦૦ રૂપિયાથી ઓછી હોય, તો જ પાન કાર્ડ વગર કામ ચાલી શકે છે.
દૈનિક અને વાર્ષિક મર્યાદાનું મહત્વ
-
દૈનિક મર્યાદા: આવકવેરાના નિયમો મુજબ, એક જ દિવસમાં કોઈ એક વ્યક્તિ પાસેથી ૨ લાખ રૂપિયા કે તેથી વધુની રોકડ સ્વીકારી શકાતી નથી. જો કોઈ બેંક આ નિયમનું ઉલ્લંઘન કરે, તો તેને ૧૦૦ ટકા જેટલો દંડ થઈ શકે છે. આથી જ બેંકો મોટી રોકડ રકમ સ્વીકારતા અચકાય છે.
-
વાર્ષિક મર્યાદા: એક નાણાકીય વર્ષ દરમિયાન વ્યક્તિના તમામ ખાતાઓ મળીને જો ૧૦ લાખ રૂપિયાથી વધુ રોકડ જમા થાય, તો બેંક તેની માહિતી ‘સ્ટેટમેન્ટ ઓફ ફાઇનાન્શિયલ ટ્રાન્ઝેક્શન’ (SFT) દ્વારા આવકવેરા વિભાગને મોકલે છે. ત્યારબાદ વિભાગ તમારી આવકના સ્ત્રોતની તપાસ કરી શકે છે.
નાણાકીય નિષ્ણાતોની સલાહ
નિષ્ણાતોના મતે, હોમ લોન ખાતામાં ક્યારેય સીધી રોકડ જમા ન કરાવવી જોઈએ. સૌથી ઉત્તમ રીત એ છે કે પહેલા પૈસા તમારા સેવિંગ્સ (બચત) ખાતામાં જમા કરાવો અને ત્યાંથી ઓનલાઈન માધ્યમ દ્વારા હોમ લોન ખાતામાં ટ્રાન્સફર કરો. આનાથી તમારા વ્યવહારનો સંપૂર્ણ ડિજિટલ રેકોર્ડ રહેશે, જે ITR ફાઇલ કરતી વખતે અને ભવિષ્યની કોઈ પણ પૂછપરછમાં ખૂબ જ ઉપયોગી સાબિત થશે.
