જેસન રોય નવી T20 લીગમાં રમતો દેખાશે: ETPL ની ફ્રેન્ચાઇઝી ‘ગ્લાસગો કોસ્મિક’ સાથે કર્યા કરાર, 26 ઓગસ્ટથી ટુર્નામેન્ટનો પ્રારંભ
યુરોપિયન T20 પ્રીમિયર લીગ (ETPL) ની પ્રથમ સીઝન શરૂ થાય તે પહેલાં જ ક્રિકેટ ચાહકો માટે એક ઉત્સાહજનક સમાચાર સામે આવ્યા છે. વિશ્વના સૌથી વિસ્ફોટક ઓપનિંગ બેટ્સમેનોમાંના એક એવા ઇંગ્લેન્ડના જેસન રોયે પણ આ નવી લીગમાં ઝંપલાવ્યું છે. ગ્લાસગો કોસ્મિક ફ્રેન્ચાઇઝીએ આગામી ETPL સીઝન માટે ઇંગ્લેન્ડના આ વિસ્ફોટક બેટ્સમેન સાથે કરાર કર્યાની સત્તાવાર જાહેરાત કરી છે.
છેલ્લા કેટલાક સમયથી ઇંગ્લેન્ડની રાષ્ટ્રીય ટીમથી દૂર રહ્યા બાદ, 36 વર્ષીય રોયે હવે પોતાનું સંપૂર્ણ ધ્યાન વૈશ્વિક T20 લીગ તરફ કેન્દ્રિત કર્યું છે અને તે આ નવી ક્રિકેટ સફર માટે પૂરેપૂરો તૈયાર દેખાઈ રહ્યો છે.
ગ્લાસગો કોસ્મિકે કરી કરારની જાહેરાત
ગ્લાસગો કોસ્મિક ટીમે 11 ઓગસ્ટના રોજ જેસન રોય સાથેના કરારની જાહેરાત કરી હતી. રોય લાંબા સમયથી મર્યાદિત ઓવરોના ક્રિકેટમાં ઇંગ્લેન્ડની સફળતાનો મુખ્ય આધારસ્તંભ રહ્યો છે. ખાસ કરીને 2019 ના વનડે વર્લ્ડ કપ વિજયમાં તેની આક્રમક બેટિંગે નિર્ણાયક ભૂમિકા ભજવી હતી. જોકે, તેણે વર્ષ 2023 થી ઇંગ્લેન્ડ માટે કોઈ આંતરરાષ્ટ્રીય મેચ રમી નથી, પરંતુ વિશ્વભરની ફ્રેન્ચાઇઝી લીગમાં આજે પણ તેની ભારે માંગ છે.
T20 ફોર્મેટમાં લગભગ 137 ના આક્રમક સ્ટ્રાઇક રેટ ધરાવતા જેસન રોય પાસે પાવરપ્લે ઓવરોમાં વિરોધી બોલરો પર હાવી થવાની અદ્ભુત ક્ષમતા છે. ગ્લાસગો કોસ્મિકને આશા છે કે રોય ટોચના ક્રમમાં પોતાની આક્રમક બેટિંગ અને વિશાળ અનુભવથી ટીમ માટે મેચ-વિનિંગ પ્રદર્શન કરશે.
“કેપ્ટનનો ફોન આવ્યો ને હું તરત તૈયાર થઈ ગયો”: જેસન રોય
ગ્લાસગો કોસ્મિક સાથે જોડાવા અંગે ખુશી વ્યક્ત કરતા જેસન રોયે જણાવ્યું હતું કે તે આ નવી સફરનો ભાગ બનવા માટે અત્યંત રોમાંચિત છે. રોયે ઉમેર્યું, “જ્યારે ટીમના કેપ્ટને મને મારી ઉપલબ્ધતા અંગે પૂછવા માટે ફોન કર્યો, ત્યારે મેં એક પણ ક્ષણનો વિચાર કર્યા વગર તરત જ હા પાડી દીધી હતી. નવી ફ્રેન્ચાઇઝી અને યુરોપિયન લીગનો ભાગ બનવાનો ઉત્સાહ અલગ જ છે.”
રોયનો અનુભવ ટીમ માટે અમૂલ્ય: રાશીદ અલી ખાન
ગ્લાસગો કોસ્મિકના ટીમ પ્રિન્સિપાલ અને સીઇઓ (CEO) રાશીદ અલી ખાને પણ રોયની પસંદગી અંગે ઉત્સાહ વ્યક્ત કર્યો હતો. તેમણે જણાવ્યું કે રોય પોતાની પેઢીના સૌથી સફળ અને વિસ્ફોટક ઓપનરોમાંનો એક છે. આંતરરાષ્ટ્રીય સ્તરે મોટી મેચો રમવાનો અને દબાણની સ્થિતિમાં અદ્ભુત પ્રદર્શન કરવાનો તેનો અનુભવ ટીમ માટે અત્યંત અમૂલ્ય સાબિત થશે. મેનેજમેન્ટનું માનવું છે કે રોયની હાજરીથી માત્ર બેટિંગ લાઇન-અપ મજબૂત નહીં થાય, પરંતુ ટીમમાં વિજયી માનસિકતા પણ લાવશે.
ETPL ની પ્રથમ સીઝન વિશે ખાસ વાતો:
ટુર્નામેન્ટનો સમયગાળો: ૨૬ ઓગસ્ટથી ૨૦ સપ્ટેમ્બર ૨૦૨૬
કુલ ટીમો: ૬ ફ્રેન્ચાઇઝી ટીમો ભાગ લેશે
પ્રતિનિધિત્વ કરતા દેશો: આયર્લેન્ડ, ઉત્તરી આયર્લેન્ડ, નેધરલેન્ડ્સ અને સ્કોટલેન્ડ
