સંસદમાં મડાગાંઠ યથાવત: ઝારખંડ લાઠીચાર્જ વિવાદથી ભાજપને નવું હથિયાર મળ્યું, FCRA અને સીમાપુનઃનિર્ધારણ બિલ અટવાયા
ભારતીય સંસદના ચોમાસુ સત્રનો અંતિમ સપ્તાહ પણ હંગામા અને રાજકીય ખેંચતાણની ભેટ ચડી રહ્યો છે. મંગળવારે સંસદ પરિસરમાં સત્તાપક્ષ (NDA) અને વિપક્ષી સાંસદો વચ્ચે તીવ્ર સૂત્રોચ્ચાર અને સામસામે પ્રદર્શનો જોવા મળ્યા હતા. એક તરફ વિપક્ષ દિલ્હીમાં Gen-Z આંદોલન દરમિયાન થયેલા લાઠીચાર્જ અંગે ગૃહમંત્રી અમિત શાહના જવાબ અને રામ મંદિર દાન વિવાદ પર ચર્ચાની માંગ કરી રહ્યો છે, તો બીજી તરફ ભાજપ અને તેના સાથી પક્ષો ઝારખંડમાં વિદ્યાર્થીઓ પર થયેલા લાઠીચાર્જના મુદ્દે કોંગ્રેસ અને રાહુલ ગાંધીને ઘેરી રહ્યા છે.
આ રાજકીય મડાગાંઠના કારણે સંસદના આ સત્રમાં રજૂ થનારા મહત્વપૂર્ણ વિધેયકો જેમ કે FCRA સુધારો, મહિલા અનામત અને સીમાપુનઃનિર્ધારણ (Delimitation) બિલ પસાર થવા પર સંકટના વાદળો ઘેરાયા છે.
સંસદ પરિસરમાં સત્તાપક્ષ અને વિપક્ષ સામસામે
મંગળવારે લોકસભાની કાર્યવાહી શરૂ થતાં જ વિપક્ષી સાંસદોએ વેલમાં આવીને હોબાળો મચાવ્યો હતો. સ્પીકર ઓમ બિરલાએ સાંસદોને ટકોર કરતા કહ્યું કે “આખો દેશ સંસદની કાર્યવાહી જોઈ રહ્યો છે”, પરંતુ સ્થિતિ શાંત ન થતાં ગૃહની કાર્યવાહી બપોરે ૨ વાગ્યા સુધી સ્થગિત કરવી પડી હતી.
ગૃહની બહાર સંસદ પરિસરમાં દ્રશ્યો વધુ આક્રમક હતા. NDA ના સાંસદોએ હાથમાં પોસ્ટર લઈને માર્ચ કાઢી હતી અને “રાહુલ ગાંધી જવાબ દો”, “રાહુલ ગાંધી શર્મ કરો” ના નારા લગાવ્યા હતા. બીજી તરફ વિપક્ષી સાંસદોએ પણ પ્રદર્શન કરતા “અમિત શાહ જવાબ દો” અને “ચંદ કોણે લૂંટ્યો?” જેવા સૂત્રોચ્ચાર કર્યા હતા. એક સમયે બંને પક્ષના સાંસદો સંસદ પરિસરમાં સામસામે આવી જતાં ભારે અફડાતફડીનો માહોલ સર્જાયો હતો.
વિપક્ષી નેતાઓની પ્રતિક્રિયા અને દાવો
આ ઘટનાક્રમ બાદ કોંગ્રેસના નેતા પ્રિયંકા ગાંધીએ સત્તાપક્ષ પર પ્રહાર કરતા જણાવ્યું હતું કે, “મેં પહેલીવાર ઇતિહાસમાં સત્તાધારી પક્ષના સાંસદોને આ રીતે રસ્તા પર પ્રદર્શન કરતા જોયા છે. અમે તેમને જવાબ આપવા માટે એટલા મજબૂર કરી દીધા છે કે હવે તેઓ બહાના બનાવી રહ્યા છે. તેઓ ગૃહમાં આવે અને દેશને જવાબ આપે.”
તેમજ સમાજવાદી પાર્ટીના અધ્યક્ષ અખિલેશ યાદવે શિક્ષણ, પરીક્ષાઓ અને રામ મંદિર ચંદા વિવાદ પર ઊંડી ચર્ચાની માંગ કરી હતી. તેમણે આક્ષેપ કર્યો હતો કે, “દિલ્હીમાં આંદોલન કરી રહેલા યુવાનો અને વિદ્યાર્થીઓનો ડેટા એકઠો કરવામાં આવી રહ્યો છે, જે ભવિષ્યમાં તેમના અધિકારો પર ત્રાપ મારવાનો પ્રયાસ હોઈ શકે છે. સરકારે આ તમામ વિષયો પર ખુલ્લી ચર્ચા કરવી જોઈએ.”
ઝારખંડ લાઠીચાર્જ: ભાજપને મળ્યું રાજકીય શસ્ત્ર
દિલ્હી લાઠીચાર્જ મુદ્દે ઘેરાયેલી શાસક ભાજપ માટે ઝારખંડની ઘટના એક રાજકીય સંજીવની સમાન સાબિત થઈ છે. ઝારખંડમાં હેમંત સોરેનના નેતૃત્વ હેઠળ જેએમએમ (JMM), કોંગ્રેસ અને ડાબેરી ગઠબંધનની સરકાર છે. ત્યાં વિરોધ પ્રદર્શન કરી રહેલા વિદ્યાર્થીઓ પર થયેલા લાઠીચાર્જનો મુદ્દો ઉઠાવીને ભાજપે કોંગ્રેસ અને રાહુલ ગાંધી પર બેવડા ધોરણો અપનાવવાનો આરોપ લગાવ્યો છે.
ભાજપના વરિષ્ઠ નેતા તરુણ ચુગે કહ્યું કે રાહુલ ગાંધી રાજકીય લાભ માટે અલગ-અલગ રાજ્યોમાં અલગ ધોરણો રાખે છે. જ્યારે ભાજપના સાંસદ મનોજ તિવારીએ પડકાર ફેંકતા કહ્યું કે, “કેન્દ્રીય ગૃહમંત્રી અમિત શાહ દિલ્હી મુદ્દે જવાબ આપવા તૈયાર છે, પણ રાહુલ ગાંધીએ ઝારખંડની ઘટના પરથી ભાગવું ન જોઈએ.”
ત્રણ મહત્વપૂર્ણ બિલ પર લટકતી તલવાર
ચોમાસુ સત્ર પૂર્ણ થવામાં હવે માત્ર ત્રણ દિવસ બાકી રહ્યા છે, ત્યારે દેશના ભવિષ્ય સાથે જોડાયેલા ત્રણ મહત્વના બિલોનું ભવિષ્ય અંધકારમય દેખાઈ રહ્યું છે:
૧. મહિલા અનામત અને સીમાપુનઃનિર્ધારણ બિલ (Delimitation Bill): બંધારણીય સુધારા વિધેયક જેમાં ૨૦૨૯થી મહિલાઓ માટે ૩૩ ટકા અનામત અને લોકસભા બેઠકોની સંખ્યા વધારવાની જોગવાઈ છે. આ બિલ માટે એપ્રિલ માસમાં બે-તૃતીયાંશ બહુમતી મેળવવામાં સરકાર અસફળ રહી હતી અને હવે વર્તમાન હંગામામાં તે અટવાઈ ગયું છે.
૨. FCRA (ફોરેન કન્ટ્રિબ્યુશન રેગ્યુલેશન) સુધારા બિલ ૨૦૨૬: આ વર્ષે ૨૫ માર્ચે લોકસભામાં રજૂ કરવામાં આવેલું આ બિલ વિદેશી ફંડિંગના નિયમન માટે અત્યંત મહત્વનું છે. તેના પર પણ ચર્ચા શક્ય લાગતી નથી.
સરકારે આ બિલો પસાર કરાવવા માટે બહુમતી ભેગી કરવાની કવાયત કરી હતી અને કેટલાક વિપક્ષી પક્ષોએ વલણ નરમ કર્યું હતું. પરંતુ કોંગ્રેસ અને તેના મુખ્ય સહયોગી દળોએ સંસદમાં મડાગાંઠ જાળવી રાખીને આ કાયદાઓનો વિરોધ ચાલુ રાખ્યો છે.
