પાકિસ્તાન-અફઘાનિસ્તાન વચ્ચે ભીષણ જંગ: અફઘાનિસ્તાને પાકિસ્તાનનું F-16 તોડી પાડ્યાનો કર્યો દાવો, વીડિયો વાયરલ
પાકિસ્તાન અને અફઘાનિસ્તાન વચ્ચે સીમા વિવાદ હવે એક ભયાનક યુદ્ધમાં ફેરવાઈ રહ્યો છે. બંને દેશો વચ્ચે સરહદ પર થયેલી નવી અથડામણો બાદ પાકિસ્તાન સરકારે અફઘાનિસ્તાન પર શાસન કરતી તાલિબાન સરકાર વિરુદ્ધ “ખુલ્લા યુદ્ધ”ની જાહેરાત કરી છે. આ દરમિયાન અફઘાનિસ્તાને દાવો કર્યો છે કે તેણે પાકિસ્તાની વાયુસેનાના અત્યાધુનિક F-16 લડાયક વિમાનને તોડી પાડ્યું છે. અફઘાન સંરક્ષણ મંત્રાલય દ્વારા સળગતા વિમાનનો એક વીડિયો પણ જાહેર કરવામાં આવ્યો છે, જોકે તેની સત્તાવાર પુષ્ટિ થવાની બાકી છે.
પાકિસ્તાનનો ‘ખુલ્લા યુદ્ધ’નો હુંકાર
પાકિસ્તાનના વડાપ્રધાન શહબાઝ શરીફે અત્યંત આક્રમક વલણ અપનાવતા કહ્યું છે કે તેમની સેના અફઘાનિસ્તાન પર હવાઈ હુમલા બાદ હુમલાખોરોને કચડી નાખવાની તાકાત ધરાવે છે. પાકિસ્તાને દાવો કર્યો છે કે તેણે અત્યાર સુધીમાં અફઘાનિસ્તાનના 133 સૈનિકોને ઠાર કર્યા છે. બંને દેશો એકબીજા પર વળતા હુમલા કરી રહ્યા છે, જેના કારણે સરહદી વિસ્તારોમાં સ્થિતિ અત્યંત તણાવપૂર્ણ બની ગઈ છે.
અફઘાનિસ્તાને 15 પાકિસ્તાની ચોકીઓ પર કર્યો કબજો
અહેવાલ મુજબ, અફઘાન સંરક્ષણ મંત્રાલયે માહિતી આપી છે કે આ ઓપરેશનમાં પાકિસ્તાની સેનાના 55 સૈનિકો માર્યા ગયા છે. અફઘાન અધિકારીઓના જણાવ્યા અનુસાર, સીમા ક્ષેત્રમાં કરવામાં આવેલી કાર્યવાહી દરમિયાન અત્યાર સુધીમાં દુશ્મનની 15 લશ્કરી ચોકીઓ પર કબજો કરી લેવામાં આવ્યો છે. આ ઈસ્લામિક અમીરાત ઓફ અફઘાનિસ્તાનની સેના માટે મોટી વ્યૂહાત્મક જીત માનવામાં આવી રહી છે.
પાકિસ્તાની સૈનિકો જીવતા પકડાયા
અફઘાનિસ્તાનના નાયબ પ્રવક્તા હમદુલ્લા ફિતરતે સોશિયલ મીડિયા પર નિવેદન જારી કરતા કહ્યું કે, કાર્યવાહી દરમિયાન અનેક પાકિસ્તાની સૈનિકો માર્યા ગયા છે, જ્યારે કેટલાક સૈનિકોને જીવતા પકડી લેવામાં આવ્યા છે. પ્રવક્તાના જણાવ્યા અનુસાર, પાકિસ્તાની સેના વિરુદ્ધ અભિયાન સતત ચાલુ છે અને અફઘાન દળો સીમાવર્તી વિસ્તારોમાં સતત આગળ વધી રહ્યા છે.
🚨 BIG BREAKING NEWS💥
This is a Pakistani military F-16, American-made, that Afghan defensive forces have shot down. pic.twitter.com/7qBAjv89rk
— Afghanistan Defense (@AFGDefense) February 27, 2026
ઉડતા તાબૂત સાબિત થઈ રહ્યા છે વિમાનો?
પાકિસ્તાન માટે આ યુદ્ધ આર્થિક અને સૈન્ય બંને રીતે મોટો ફટકો સાબિત થઈ રહ્યું છે. એક તરફ દેશ આર્થિક કંગાળિયત સામે ઝઝૂમી રહ્યો છે, ત્યારે બીજી તરફ અફઘાનિસ્તાન જેવા પાડોશી દેશ સાથે સીધું યુદ્ધ તેને વધુ મુશ્કેલીમાં મૂકી શકે છે. F-16 જેવા મોંઘા લડાયક વિમાનોનું આ રીતે તોડી પડવું એ પાકિસ્તાનની હવાઈ સુરક્ષા સામે મોટા સવાલો ઊભા કરે છે.
