વરિષ્ઠ નાગરિકો માટે ખુશખબર! બંધન હવે મળશે ૭.૯૫% સુધીનું બમ્પર વળતર
દેશમાં સુરક્ષિત રોકાણના પરંપરાગત સાધનો તરફ લોકોનો ઝુકાવ સતત વધી રહ્યો છે. ખાસ કરીને વરિષ્ઠ નાગરિકો માટે પોતાની જીવનભરની કમાણી સુરક્ષિત રાખવા અને તેમાંથી માસિક કે વાર્ષિક ધોરણે નિયમિત આવક મેળવવા માટે ફિક્સ્ડ ડિપોઝિટ (FD) હંમેશાં પ્રથમ પસંદગી રહી છે. આ જ ગ્રાહક વર્ગને ધ્યાનમાં રાખીને દેશની અગ્રણી ખાનગી બેંક ‘બંધન બેંક’ દ્વારા પોતાના ગ્રાહકો માટે એક શાનદાર ખુશખબર આપવામાં આવી છે. બેંકે તેના વિવિધ સમયગાળાની ફિક્સ્ડ ડિપોઝિટ પર મળતા વ્યાજ દરોમાં નોંધપાત્ર સુધારો કરીને વધારો કર્યો છે. બેંક દ્વારા જાહેર કરાયેલા આ નવા વ્યાજ દરો ૨૦ જૂન, ૨૦૨૬ થી સત્તાવાર રીતે સમગ્ર દેશમાં અમલમાં આવી ચૂક્યા છે. આ ફેરફારમાં હંમેશની જેમ સિનિયર સિટિઝન્સને સામાન્ય નાગરિકો કરતાં વધુ વ્યાજ ઓફર કરવામાં આવી રહ્યું છે.
મધ્યમ ગાળાની ફિક્સ્ડ ડિપોઝિટ પર સૌથી મોટો ધડાકો
બંધન બેંકના નવા પરિપત્ર અનુસાર, બેંકે ખાસ કરીને મધ્યમ ગાળાના રોકાણકારોને આકર્ષવા માટે ૨ વર્ષથી લઈને ૩ વર્ષથી ઓછી મુદતની ફિક્સ્ડ ડિપોઝિટ સ્કીમ પર ૨૦ બેસિસ પોઇન્ટનો મોટો વધારો કર્યો છે.
આ નવા ફેરફાર બાદ, જો કોઈ વરિષ્ઠ નાગરિક ૨ થી ૩ વર્ષની મુદત માટે પોતાની રકમ ફિક્સ્ડ ડિપોઝિટમાં રોકે છે, તો બેંક તેમને મહત્તમ ૭.૯૫ ટકા જેટલો ઊંચો વ્યાજ દર આપશે. બીજી તરફ, જો સામાન્ય કે નિયમિત ગ્રાહકો આ જ સમયગાળા માટે ખાતું ખોલાવશે તો તેમને ૭.૪૫ ટકા લેખે વ્યાજ મળશે. બજારની વર્તમાન સ્થિતિ જોતાં, મધ્યમ ગાળામાં સુરક્ષિત અને વધુ વળતર ઈચ્છતા લોકો માટે આ વ્યાજ દર અત્યંત આકર્ષક અને નફાકારક સાબિત થઈ શકે છે.
લાંબા ગાળાના રોકાણકારો માટે પણ આકર્ષક તક
બેંક માત્ર ટૂંકા કે મધ્યમ ગાળા માટે જ નહીં, પરંતુ જે લોકો લાંબા સમય માટે પોતાના નાણાં બ્લોક કરવા માંગે છે તેમને પણ બહેતર વળતર પૂરું પાડી રહી છે. ૩ વર્ષથી લઈને ૫ વર્ષથી ઓછી મુદતની લાંબા ગાળાની એફડી પર વરિષ્ઠ નાગરિકોને બેંક તરફથી ૭.૭૫ ટકા વ્યાજ દર આપવામાં આવી રહ્યો છે, જ્યારે સામાન્ય નાગરિકો માટે આ જ સમયગાળા પર ૭.૨૫ ટકા વ્યાજ નક્કી કરવામાં આવ્યું છે.
જો આપણે ટૂંકા ગાળાના રોકાણ પર નજર કરીએ તો, ૭ દિવસથી લઈને ૧ વર્ષ સુધીના અલગ-અલગ સ્લેબ બનાવવામાં આવ્યા છે. ૭ દિવસથી ૩૦ દિવસની ટૂંકી મુદત માટે સામાન્ય નાગરિકોને ૨.૯૫ ટકા અને વરિષ્ઠ નાગરિકોને ૩.૭૦ ટકા વ્યાજ મળશે. જ્યારે ૩૧ દિવસથી લઈને ૬ મહિનાથી ઓછી મુદત માટે આ દરો અનુક્રમે ૩.૪૫ ટકાથી ૪.૨૦ ટકા અને સિનિયર સિટિઝન્સ માટે ૪.૨૦ ટકાથી ૪.૯૫ ટકા સુધીના રાખવામાં આવ્યા છે. ૧ વર્ષથી લઈને ૨ વર્ષ સુધીની મુદતની ડિપોઝિટ પર સામાન્ય ગ્રાહકોને ૭.૦૦ ટકા અને વરિષ્ઠ નાગરિકોને ૭.૫૦ ટકા વ્યાજ ઓફર કરાઈ રહ્યું છે. આ ઉપરાંત, ૫ વર્ષથી ૧૦ વર્ષની લાંબી મુદત માટે વ્યાજ દર ૫.૮૫ ટકાથી ૬.૬૦ ટકા સુધીના રહેશે. કર બચત કરવા ઈચ્છતા લોકો માટે ‘ટેક્સ સેવર એફડી’ પર સામાન્ય ગ્રાહકોને ૬.૨૫ ટકા અને વરિષ્ઠ નાગરિકોને ૭.૨૫ ટકા વ્યાજ મળશે.
બચત ખાતા (Savings Account) પર પણ વ્યાજનો મોટો ફાયદો
બંધન બેંકે માત્ર ફિક્સ્ડ ડિપોઝિટ કરાવતા ગ્રાહકોને જ નહીં, પરંતુ પોતાના બચત ખાતામાં મોટી રકમ રાખતા ગ્રાહકોને પણ ખુશ કર્યા છે. બેંક દ્વારા બચત ખાતા પર પણ ખૂબ જ સ્પર્ધાત્મક વ્યાજ દરો આપવામાં આવી રહ્યા છે. નવી જાહેરાત મુજબ, જો કોઈ ગ્રાહક પોતાના બચત ખાતામાં ₹૫ લાખથી વધુ અને ₹૧૦ લાખ સુધીનું બેલેન્સ જાળવી રાખે છે, તો તેને બેંક તરફથી વાર્ષિક ૬.૫ ટકા જેટલો શાનદાર વ્યાજ દર મળશે. આ સુવિધા એવા ગ્રાહકો માટે વરદાન સમાન છે જેઓ પોતાના પૈસા ફિક્સ કર્યા વગર બચત ખાતામાં લિક્વિડ રાખવા માંગે છે અને સાથે જ મોટો નફો પણ મેળવવા માંગે છે. એકંદરે, બંધન બેંકના આ નવા દરો સામાન્ય લોકોની નાણાકીય જરૂરિયાતોને પૂરી કરવામાં અને વરિષ્ઠ નાગરિકોને આત્મનિર્ભર બનાવવામાં મહત્વની ભૂમિકા ભજવશે.
