બાંગ્લાદેશમાં નવા યુગનો પ્રારંભ: તારિક રહેમાને વડાપ્રધાન તરીકે લીધા શપથ, 49 સભ્યોનું વિશાળ મંત્રીમંડળ કાર્યરત
બાંગ્લાદેશના રાજકીય ઇતિહાસમાં આજે એક નવો અધ્યાય લખાયો છે. બાંગ્લાદેશ નેશનાલિસ્ટ પાર્ટી (BNP) ના ચેરમેન તારિક રહેમાને દેશના નવા વડાપ્રધાન તરીકે પદ અને ગોપનીયતાના શપથ લીધા છે. ઢાકા સ્થિત જાતીય સંસદ ભવનના સાઉથ પ્લાઝા ખાતે આયોજિત એક ભવ્ય સમારોહમાં રાષ્ટ્રપતિ મોહમ્મદ શહાબુદ્દીને તેમને શપથ લેવડાવ્યા હતા. આ સાથે જ બાંગ્લાદેશમાં લાંબા સમયથી ચાલી રહેલી રાજકીય અસ્થિરતાનો અંત આવ્યો હોય તેમ જણાય છે.
સંસદીય પક્ષના નેતા તરીકે સર્વસંમતિથી પસંદગી
શપથ ગ્રહણ સમારોહ પૂર્વે યોજાયેલી બીએનપી સંસદીય દળની બેઠકમાં તારિક રહેમાનને સર્વસંમતિથી નેતા તરીકે પસંદ કરવામાં આવ્યા હતા. આ ઐતિહાસિક ક્ષણે સંસદમાં બીએનપી ગઠબંધનના ૨૧૨ સાંસદો, જમાત સમર્થિત ગઠબંધનના ૭૬ સાંસદો અને સાત અપક્ષ સાંસદો પણ હાજર રહ્યા હતા. શપથ ગ્રહણ દરમિયાન સમગ્ર સંસદ પરિસરમાં કડક સુરક્ષા બંદોબસ્ત ગોઠવવામાં આવ્યો હતો.
મંત્રીમંડળનું માળખું: ૨૫ કેબિનેટ અને ૨૪ રાજ્ય મંત્રીઓ
વડાપ્રધાન તારિક રહેમાનની સાથે તેમના મંત્રીમંડળના કુલ ૪૯ સભ્યોએ પણ જવાબદારી સંભાળી છે. જેમાં અનુભવી નેતાઓ અને ટેક્નોક્રેટ્સનું મિશ્રણ જોવા મળે છે.
મુખ્ય કેબિનેટ મંત્રીઓ: કેબિનેટ મંત્રી તરીકે શપથ લેનારા ૨૫ દિગ્ગજોમાં મિર્ઝા ફખરુલ ઈસ્લામ આલમગીર, અમીર ખોશરુ મહેમૂદ ચૌધરી, સલાહુદ્દીન અહેમદ અને ડો. ખલીલુર રહેમાન (ટેક્નોક્રેટ) જેવા નામો સામેલ છે. આ ઉપરાંત અબ્દુલ અવલ મિન્ટુ, નિતઈ રોય ચૌધરી અને અફરોઝા ખાનમ રીતા જેવા નેતાઓને પણ મહત્વના વિભાગો સોંપવામાં આવ્યા છે.
રાજ્ય મંત્રીઓની યાદી: મંત્રીમંડળમાં ૨૪ રાજ્ય મંત્રીઓનો પણ સમાવેશ કરાયો છે, જેમાં યુવા ચહેરાઓ અને બેરિસ્ટર કૈસર કમાલ, શમા ઓબૈદ ઈસ્લામ, નૂરુલ હક નૂર અને ઈશરાક હુસૈન જેવા સક્રિય નેતાઓને સ્થાન મળ્યું છે. આ વિશાળ મંત્રીમંડળ દ્વારા તારિક રહેમાન દેશના દરેક વર્ગ અને વિસ્તારને પ્રતિનિધિત્વ આપવાનો પ્રયાસ કર્યો હોય તેમ જણાય છે.
નવી સરકાર સામેના પડકારો અને અપેક્ષાઓ
બાંગ્લાદેશમાં આ ચૂંટણીઓ લાંબા રાજકીય સંઘર્ષ અને આંદોલનો બાદ સંપન્ન થઈ છે, તેથી જનતાની અપેક્ષાઓ ખૂબ ઊંચી છે. નવી સરકાર સામે મુખ્ય ત્રણ પડકારો છે:
અર્થતંત્ર: ડગમગી ગયેલી અર્થવ્યવસ્થાને ફરી પાટા પર લાવવી.
કાયદો અને વ્યવસ્થા: દેશમાં શાંતિ અને સુરક્ષાનું વાતાવરણ સ્થાપિત કરવું.
વિદેશ નીતિ: પાડોશી દેશો અને વૈશ્વિક સત્તાઓ સાથેના સંબંધોને નવી દિશા આપવી.
