સાણંદમાં ભારતની પ્રથમ સેમિકન્ડક્ટર ચિપનું લોન્ચિંગ; પીએમ મોદીના હસ્તે માઈક્રોન પ્લાન્ટનું ઉદ્ઘાટન
વડાપ્રધાન નરેન્દ્ર મોદી આજે તેમના માતૃરાજ્ય ગુજરાતની ટૂંકી પણ અત્યંત મહત્વપૂર્ણ મુલાકાતે છે. નિર્ધારિત કાર્યક્રમ મુજબ, પીએમ મોદી બપોરે લગભગ ૩:૪૫ કલાકે અમદાવાદના સાણંદમાં માઈક્રોન સેમિકન્ડક્ટર ટેકનોલોજી ઈન્ડિયા પ્રાઈવેટ લિમિટેડના ‘એસેમ્બલી, ટેસ્ટ અને પેકેજિંગ’ (ATMP) પ્લાન્ટનું ઉદ્ઘાટન કરશે. આ માત્ર એક ફેક્ટરીનું લોકાર્પણ નથી, પરંતુ ભારતને સેમિકન્ડક્ટર ક્ષેત્રે ‘આત્મનિર્ભર’ બનાવવાની દિશામાં સૌથી મોટું પગલું છે.
₹૨૨,૫૦૦ કરોડનું રોકાણ અને રોજગારીની તકો
માઈક્રોન ટેકનોલોજી દ્વારા સ્થાપિત આ પ્લાન્ટમાં કુલ ₹૨૨,૫૧૬ કરોડનું રોકાણ કરવામાં આવ્યું છે. ‘ઈન્ડિયા સેમિકન્ડક્ટર મિશન’ (ISM) હેઠળ મંજૂર થયેલો આ પ્રથમ પ્રોજેક્ટ છે.
રોજગારી: આ પ્લાન્ટ દ્વારા સીધી રીતે ૫,૦૦૦ લોકોને અને આડકતરી રીતે લગભગ ૧૫,૦૦૦ લોકોને રોજગારી મળવાની અપેક્ષા છે. અત્યાર સુધીમાં અહીં ૨,૦૦૦થી વધુ કર્મચારીઓ કાર્યરત થઈ ચૂક્યા છે, જેમાં દિવ્યાંગ નાગરિકોને પણ વિશેષ તક આપવામાં આવી છે.
શું બનશે આ પ્લાન્ટમાં?
સાણંદના આ અત્યાધુનિક પ્લાન્ટમાં SSD (Solid State Drive) તેમજ DRAM અને NAND જેવા હાઈ-એન્ડ મેમરી ઉત્પાદનો તૈયાર કરવામાં આવશે.
આ ચિપ્સનો ઉપયોગ સ્માર્ટફોન, લેપટોપ, ડેટા સેન્ટર અને આર્ટિફિશિયલ ઈન્ટેલિજન્સ (AI) સિસ્ટમમાં થાય છે.
અત્યાર સુધી ભારત આ ચિપ્સ માટે ચીન, તાઈવાન અને અમેરિકા જેવા દેશો પર નિર્ભર હતું, પરંતુ હવે ‘મેડ ઈન ઈન્ડિયા’ ચિપ્સ વૈશ્વિક બજારમાં નિકાસ પણ કરવામાં આવશે.
એશિયાનું સૌથી મોટું ક્લીનરૂમ હબ
સાણંદની આ ફેસિલિટીમાં લગભગ ૫,૦૦૦,૦૦૦ સ્ક્વેર ફૂટનું ‘ક્લીનરૂમ’ સ્પેસ છે, જે વિશ્વના સૌથી મોટા રેઈઝ્ડ-ફ્લોર ક્લીનરૂમમાંનું એક છે. સેમિકન્ડક્ટર મેન્યુફેક્ચરિંગ માટે અત્યંત શુદ્ધ વાતાવરણની જરૂર હોય છે, જે અહીં આંતરરાષ્ટ્રીય ધોરણો મુજબ તૈયાર કરવામાં આવ્યું છે.
પીએમ મોદીનો કાર્યક્રમ
પીએમ મોદી આજે બપોરે ૨:૩૦ કલાકે અમદાવાદ એરપોર્ટ પર ઉતરાણ કરશે, જ્યાં રાજ્યપાલ આચાર્ય દેવવ્રત અને મુખ્યમંત્રી ભૂપેન્દ્ર પટેલ તેમનું સ્વાગત કરશે. ત્યાંથી તેઓ હેલિકોપ્ટર દ્વારા સાણંદ પહોંચશે. પ્લાન્ટનું નિરીક્ષણ કર્યા બાદ તેઓ એક જંગી જનસભાને સંબોધશે અને ભારતની પ્રથમ સ્વદેશી સેમિકન્ડક્ટર ચિપ લોન્ચ કરશે.
૨૦૨૬નું આ વર્ષ ભારત માટે ટેકનોલોજીકલ સ્વતંત્રતાનું વર્ષ સાબિત થઈ શકે છે. સાણંદમાં સેમિકન્ડક્ટર હબ બનવાથી ગુજરાત માત્ર ‘ઓટો હબ’ જ નહીં પણ હવે ‘ચીપ હબ’ તરીકે પણ વિશ્વ વિખ્યાત બનશે.
