યુદ્ધ વચ્ચે UAE માં 10 લોકો સામે મોટી કાર્યવાહી, શું છે ગંભીર આરોપો?
મધ્ય પૂર્વમાં ઈરાન, ઈઝરાયેલ અને અમેરિકા વચ્ચે ચાલી રહેલા જંગની સૌથી વધુ અસર ઈઝરાયેલ પછી UAE પર પડી રહી છે. ઈરાન સતત UAE ની ગગનચુંબી ઇમારતો અને અમેરિકી એજન્સીઓ સાથે જોડાયેલા ઠેકાણાઓ પર ડ્રોન હુમલા કરી રહ્યું છે. આ હુમલાઓ વચ્ચે હવે UAE સરકારે રાષ્ટ્રીય સુરક્ષાને ધ્યાનમાં રાખીને ડિજિટલ પ્લેટફોર્મ પર દેખરેખ કડક બનાવી છે.
એર ડિફેન્સના વીડિયો બનાવવા બદલ ધરપકડ
UAE ના સરકારી મીડિયા અનુસાર, સત્તાવાળાઓએ 10 લોકોની ધરપકડ કરવાનો આદેશ આપ્યો છે. આ લોકો પર આરોપ છે કે તેઓએ દેશની એર ડિફેન્સ સિસ્ટમ (Air Defense System) દ્વારા મિસાઈલોને તોડી પાડવાના વીડિયો બનાવ્યા હતા અને તેને સોશિયલ મીડિયા પર વાયરલ કર્યા હતા. સુરક્ષા એજન્સીઓનું માનવું છે કે આવા વીડિયોથી દેશની સુરક્ષા વ્યવસ્થાની ગુપ્ત માહિતી દુશ્મન દેશો સુધી પહોંચી શકે છે.
AI અને ફેક ન્યૂઝનો ખતરનાક ખેલ
સૌથી ચોંકાવનારી બાબત એ છે કે ધરપકડ કરાયેલા લોકો માત્ર અસલી ફૂટેજ જ નહીં, પરંતુ આર્ટિફિશિયલ ઈન્ટેલિજન્સ (AI) નો ઉપયોગ કરીને બનાવેલા નકલી વીડિયો અને તસવીરો પણ શેર કરી રહ્યા હતા. આ વીડિયો દ્વારા એવું દર્શાવવામાં આવતું હતું કે દેશમાં મોટા ધડાકા અને વિનાશ થયો છે, જે વાસ્તવમાં બન્યું જ નહોતું. આવી ખોટી માહિતી ફેલાવીને લોકોમાં ગભરાટ પેદા કરવાનો તેમની પર આરોપ છે. સરકારી મીડિયાએ આ લોકો માટે ‘સ્પીડી ટ્રાયલ’ (ઝડપી સુનાવણી) ની ભલામણ કરી છે.
45 અન્ય લોકોની પણ અટકાયત
માત્ર આ 10 લોકો જ નહીં, પરંતુ અબુ ધાબી પોલીસે અલગ-અલગ દેશોના અન્ય 45 લોકોની પણ ધરપકડ કરી છે. આ લોકો પર પણ હુમલા દરમિયાન વીડિયો બનાવવા અને પાયાવિહોણી અફવાઓ ફેલાવવાનો આરોપ છે. UAE સરકારનું વલણ સ્પષ્ટ છે કે જે કોઈ પણ રાષ્ટ્રીય સુરક્ષા સાથે ચેડા કરશે તેને છોડવામાં આવશે નહીં.
યુદ્ધના 15મા દિવસે સ્થિતિ વધુ વણસી
ઈરાન અને અમેરિકા-ઈઝરાયેલ વચ્ચેના જંગને આજે 15 દિવસ વીતી ગયા છે, પરંતુ શાંતિના કોઈ સંકેત દેખાતા નથી. અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે જાહેરાત કરી હતી કે અમેરિકાએ ઈરાનના ઓઈલ સેન્ટર ‘ખર્ગ આઈલેન્ડ’ પર આવેલા સૈન્ય ઠેકાણાઓ પર ભારે બોમ્બમારો કર્યો છે. વધુમાં, અમેરિકી નૌકાદળ ટૂંક સમયમાં હોર્મુઝની સામુદ્રધુનીમાંથી પસાર થતા ટેન્કરોને સુરક્ષા પૂરી પાડવાનું શરૂ કરશે.
