શા માટે અમેરિકાએ ઈરાનના ઇસ્ફાહાન પર 900 કિલોના ‘બંકર બસ્ટર’ બોમ્બ ફેંક્યા? જાણો શું છે આખી વ્યૂહરચના
મધ્ય પૂર્વમાં ચાલી રહેલું યુદ્ધ હવે અત્યંત વિનાશક તબક્કામાં પહોંચી ગયું છે. અમેરિકાએ ઈરાનના વ્યૂહાત્મક શહેર ઇસ્ફાહાનમાં આવેલા દારૂગોળાના વિશાળ ડેપો પર 2,000 પાઉન્ડ (આશરે 907 કિલોગ્રામ) ના ‘બંકર બસ્ટર’ બોમ્બથી હુમલો કરીને ખળભળાટ મચાવી દીધો છે. રાષ્ટ્રપતિ ડોનાલ્ડ ટ્રમ્પે પોતે તેમના સોશિયલ મીડિયા પ્લેટફોર્મ ‘ટ્રુથ સોશિયલ’ પર આ ભીષણ વિસ્ફોટનો વીડિયો શેર કર્યો છે, જે આ યુદ્ધમાં અમેરિકાના આક્રમક વલણની પુષ્ટિ કરે છે.
ઇસ્ફાહાન જ કેમ હતું નિશાન પર?
ઇસ્ફાહાન શહેર ઈરાનનું લશ્કરી હબ ગણાય છે. અહીં ઈરાનના મહત્વના સૈન્ય મથકો, સંરક્ષણ ઉદ્યોગો અને પરમાણુ સંશોધન કેન્દ્રો આવેલા છે. નાસાના સેટેલાઇટ ડેટા મુજબ, આ વિસ્ફોટો માઉન્ટ સોફેહ નજીક થયા છે, જે વિસ્તાર સૈન્ય ગતિવિધિઓ માટે જાણીતો છે. અહેવાલ મુજબ, આ હુમલાનો મુખ્ય હેતુ ઈરાનના મિસાઈલ ભંડાર અને મોટા પાયે સંગ્રહિત વિસ્ફોટકોને નષ્ટ કરવાનો હતો, જેથી તેની વળતા પ્રહાર કરવાની ક્ષમતા નબળી પાડી શકાય.
શું છે આ ‘બંકર બસ્ટર’ બોમ્બ અને તે કેટલા ખતરનાક છે?
અમેરિકાએ આ હુમલામાં જે 900 કિલોના બંકર બસ્ટર બોમ્બ વાપર્યા છે, તે સામાન્ય બોમ્બ કરતા તદ્દન અલગ છે. આ બોમ્બ સખત સ્ટીલના પડથી બનેલા હોય છે, જે જમીન કે કોંક્રિટના અનેક સ્તરોને ચીરીને અંદર ઘૂસી જવાની ક્ષમતા ધરાવે છે. તેની ખાસિયત એ છે કે તે જમીનની સપાટી પર અથડાતાની સાથે નથી ફૂટતા, પરંતુ ઊંડાણમાં રહેલા બંકર કે અંડરગ્રાઉન્ડ સૈન્ય મથકો સુધી પહોંચ્યા પછી જ વિસ્ફોટ થાય છે. આ હુમલામાં પરમાણુ સાઇટ્સને પણ નિશાન બનાવવામાં આવી હોવાની આશંકા છે, જોકે હાલમાં કોઈ રેડિયેશન લીક થયાના સમાચાર નથી.
ટ્રમ્પનો કડક સંદેશ અને વૈશ્વિક અર્થતંત્ર પર ખતરો
આ હુમલો એવા સમયે થયો છે જ્યારે ટ્રમ્પે ઈરાનને ચેતવણી આપી હતી કે જો ટૂંક સમયમાં યુદ્ધ રોકવા માટે સમજૂતી નહીં થાય, તો ઈરાનના ઉર્જા સંસાધનો અને ઈન્ફ્રાસ્ટ્રક્ચરનો નાશ કરવામાં આવશે. આ હુમલા દ્વારા અમેરિકાએ સ્પષ્ટ સંદેશ આપ્યો છે કે તે યુદ્ધમાં પીછેહઠ કરવાના મૂડમાં નથી. બીજી તરફ, ઈરાને પણ ‘હોર્મુઝની ખાડી’ (Strait of Hormuz) બંધ કરીને વળતો જવાબ આપ્યો છે, જે દુનિયાના 20 ટકા તેલ પુરવઠાનો મુખ્ય માર્ગ છે.
🚨🇮🇷🇺🇸US strikes Iran’s Isfahan city
The strike targeted a key military facility in central Iran, the WSJ reports.
Isfahan is considered a key hub of Iran’s nuclear and defense programs. pic.twitter.com/cNbhn1vTze
— Sputnik India (@Sputnik_India) March 31, 2026
બજારમાં ગભરાટ અને રાજદ્વારી મડાગાંઠ
ઈરાને અમેરિકા અને ઈઝરાયેલના જહાજો પર સંપૂર્ણ પ્રતિબંધ મૂકવાની તૈયારી કરી લીધી છે. બજારના નિષ્ણાતો ચેતવણી આપી રહ્યા છે કે જો ઈરાન વધુ આક્રમક બનશે અથવા અમેરિકા જમીની કાર્યવાહી શરૂ કરશે, તો તેલના ભાવ 2008ના રેકોર્ડ સ્તરને પણ વટાવી જશે. પાકિસ્તાન, સાઉદી અરેબિયા અને તુર્કી જેવા દેશો શાંતિ સ્થાપવા માટે મધ્યસ્થી કરી રહ્યા છે, પરંતુ હાલમાં તો બારૂદની ગંધ વચ્ચે કૂટનીતિનો રસ્તો ઘણો દૂર દેખાઈ રહ્યો છે.
