મોંઘવારીનો ડામ: કોમર્શિયલ સિલિન્ડરમાં ₹993નો તોતિંગ વધારો, અખિલેશ યાદવનો સરકાર પર કટાક્ષ
ભારતમાં 1 મેથી તેલ કંપનીઓએ કોમર્શિયલ ગેસ સિલિન્ડર અને નાના ‘છોટુ’ સિલિન્ડરના ભાવમાં મોટો વધારો કરવાની જાહેરાત કરી છે. આ વધારાને કારણે હોટલ, રેસ્ટોરન્ટ અને નાના ખાણી-પીણીના વેપારીઓની મુશ્કેલીમાં વધારો થયો છે. આ આંકડાકીય ખેલ અને જનતાના ખિસ્સા પર પડતા બોજને લઈને રાજકીય ગરમાવો તેજ બન્યો છે.
અખિલેશ યાદવનો પ્રહાર: “₹7 ઓછા કરીને કોના પર ઉપકાર કર્યો?”
સમાજવાદી પાર્ટીના અધ્યક્ષ અખિલેશ યાદવે સોશિયલ મીડિયા પર સરકારને ઘેરી છે. તેમણે કટાક્ષ કરતા કહ્યું કે, “જો સિલિન્ડરના ભાવ વધારવા જ હતા તો સીધા એક હજાર રૂપિયા વધારી દેવા જોઈતા હતા, આ 7 રૂપિયા ઓછા કરીને ભાજપ કોના પર અહેસાન કરી રહી છે?”
અખિલેશ યાદવે ગંભીર ટિપ્પણી કરતા ઉમેર્યું કે, જ્યારે સિલિન્ડર મોંઘો થાય છે ત્યારે માત્ર ગેસ મોંઘો નથી થતો, પણ સામાન્ય માણસની રોટલી અને થાળી પણ મોંઘી થાય છે. તેમણે કહ્યું કે મોંઘવારીની પીડા એ જ વ્યક્તિ સમજી શકે છે જે પોતે ખરીદીને ખાતો હોય, તે નહીં જે બીજાની થાળીમાંથી ચોરી કરીને ખાતો હોય. અખિલેશ યાદવે સવાલ પૂછ્યો કે ભાજપ મોંઘવારી, બેરોજગારી અને મંદી પર નિંદા પ્રસ્તાવ ક્યારે લાવશે?
કોંગ્રેસના આક્ષેપો: “મોદી સરકારની વસૂલાત ચાલુ છે”
કોંગ્રેસે સોશિયલ મીડિયા પ્લેટફોર્મ ‘X’ પર સરકાર પર પ્રહાર કરતા વડાપ્રધાન મોદીને ‘મોંઘવારી મેન’ તરીકે સંબોધ્યા છે. કોંગ્રેસનો આક્ષેપ છે કે સરકાર માત્ર સામાન્ય જનતા પાસેથી વસૂલાત કરવાનું જ જાણે છે.
કોંગ્રેસે છેલ્લા ચાર મહિનાના આંકડા રજૂ કરીને સરકારને ભીંસમાં લીધી છે:
જાન્યુઆરી: ₹111 નો વધારો
1 ફેબ્રુઆરી: ₹50 નો વધારો
1 માર્ચ: ₹31 નો વધારો
7 માર્ચ: ₹115 નો વધારો
1 એપ્રિલ: ₹218 નો વધારો
1 મે: ₹993 નો વધારો (સૌથી મોટો ઝટકો)
કોંગ્રેસે જણાવ્યું કે છેલ્લા માત્ર 4 મહિનામાં કોમર્શિયલ સિલિન્ડર કુલ ₹1,518 મોંઘો થયો છે. હજુ વર્ષના 8 મહિના બાકી છે, ત્યારે આ લૂંટ ક્યાં જઈને અટકશે તે મોટો પ્રશ્ન છે. કોંગ્રેસે ‘છોટુ’ સિલિન્ડર (5 કિલો) ના ભાવ વધારાને લઈને પણ ટીકા કરી કે પહેલા આધાર કાર્ડ પર સિલિન્ડર આપ્યા અને હવે તેના ભાવ આસમાને પહોંચાડી દીધા છે.
सिलेंडर महंगा नहीं होता, रोटी-थाली महंगी होती है। ये बात वही जानता है जो ख़ुद ख़रीदकर खाता है, वो नहीं जो दूसरों के यहाँ जाकर खाता है या दूसरों की थाली से चुराता है।
सिलेंडर महंगा करना था तो सीधे 1000 रूपये महंगा कर देते। 1000 में 7 रुपये कम करके ये भाजपावाले किस पर एहसान कर रहे…
— Akhilesh Yadav (@yadavakhilesh) May 1, 2026
નવો ભાવ વધારો: ખિસ્સા ખાલી કરશે
આજથી અમલી બનેલા નવા દરો મુજબ, દેશભરમાં 19 કિલોના કોમર્શિયલ સિલિન્ડરની કિંમતમાં ₹993 નો વધારો થયો છે.
દિલ્હીમાં નવો ભાવ: હવે દિલ્હીમાં 19 કિલોના સિલિન્ડરની કિંમત વધીને ₹3,071.50 થઈ ગઈ છે.
નાના સિલિન્ડર પર અસર: 5 કિલોવાળા ‘છોટુ’ સિલિન્ડરના ભાવમાં પણ ₹261 નો વધારો કરવામાં આવ્યો છે. આ વધારાની સીધી અસર મધ્યમ અને ગરીબ વર્ગના લોકો પર પડશે જેઓ નાના સિલિન્ડરનો ઉપયોગ કરે છે.
मोदी सरकार सिर्फ वसूली करना जानती है। अब 5 किलो वाला छोटू सिलेंडर भी महंगा कर दिया।
पहले आधार कार्ड पर सिलेंडर बांटे, फिर उसका दाम बढ़ा दिया। ये बड़े चालबाज लोग हैं। https://t.co/kfizXWf8Ym pic.twitter.com/g63jonguFR
— Congress (@INCIndia) May 1, 2026
વેપારીઓ અને ગ્રાહકોમાં ફેલાયો ફફડાટ
કોમર્શિયલ ગેસના ભાવ વધતા હવે બહાર જમવું મોંઘું બનશે. હોટલ માલિકોનું કહેવું છે કે ગેસના ભાવમાં એકાએક આટલો મોટો વધારો થવાથી તેમને થાળી કે નાસ્તાના ભાવ વધારવાની ફરજ પડશે. અંતે તો આ બોજ સામાન્ય જનતાના ખિસ્સા પર જ આવવાનો છે.
