નાણા વિભાગની પારદર્શક કામગીરી: QR કોડ ટેકનોલોજી દ્વારા પેન્શન પ્રક્રિયા સરળ
ગુજરાત સરકાર દ્વારા રાજ્યના સરકારી કર્મચારીઓના હિતમાં ૧૬ એપ્રિલ, ૨૦૨૫ના રોજ રાષ્ટ્રીય પેન્શન યોજના (NPS) માંથી જૂની પેન્શન યોજના (OPS) માં રૂપાંતર કરવાનો એક મહત્ત્વપૂર્ણ અને પ્રજાભિમુખ નિર્ણય લેવામાં આવ્યો હતો. આ ઐતિહાસિક નિર્ણયના અત્યંત સુચારુ અને ઝડપી અમલીકરણમાં નાણા વિભાગ દ્વારા અભૂતપૂર્વ સફળતા હાંસલ કરવામાં આવી છે. રાજ્યના કેબિનેટ નાણાં મંત્રી કનુભાઈ દેસાઈ તેમજ રાજ્ય કક્ષાના નાણાં મંત્રી કમલેશભાઈ પટેલના સીધા માર્ગદર્શન અને નેતૃત્વ હેઠળ નાણા વિભાગે અત્યંત પારદર્શકતા અને નિષ્ઠાપૂર્વક આ આખી પ્રક્રિયા પૂર્ણ કરી છે.
આ નિર્ણયથી વર્ષોથી જૂની પેન્શન યોજનાની માંગણી કરી રહેલા હજારો કર્મચારીઓ અને તેમના પરિવારોમાં ખુશીની લહેર ફરી વળી છે. પ્રક્રિયાને જટિલ બનાવવાના બદલે તકનીકીનો ઉપયોગ કરીને તેને શક્ય તેટલી સરળ અને ભ્રષ્ટાચારમુક્ત બનાવવામાં આવી છે.
૧૯,૨૨૯ કેસોનો ત્વરિત નિકાલ: નિવૃત્ત અને મૃતક કર્મચારીઓના પરિવારોને મોટો આશરો
નાણા વિભાગ હેઠળની NPS ઉપાડ શાખા દ્વારા રાત-દિવસ મહેનત કરીને NPS થી OPS રૂપાંતર, નિવૃત્તિ તેમજ અવસાનને લગતા કુલ ૧૯,૨૨૯ જેટલા કેસોનો સમયસર નિકાલ કરવામાં આવ્યો છે.
સૌથી વધુ પ્રશંસનીય બાબત એ છે કે, કર્મચારીના અવસાન અથવા નિવૃત્તિના ૧,૦૩૭ સંવેદનશીલ કેસોમાં કોઈ પણ જાતના વિલંબ વિના કુલ રૂ. ૧૨૪.૦૮ કરોડની પેન્શન ઓથોરિટી સમયસર ઇસ્યુ કરી દેવામાં આવી છે. આ ઝડપી કામગીરીના કારણે નિવૃત્ત થયેલા કર્મચારીઓ અને દિવંગત કર્મચારીઓના આશ્રિત પરિવારોને આર્થિક મુશ્કેલીઓનો સામનો કરવો પડ્યો નથી.
રૂ. ૧,૦૧૯ કરોડથી વધુનું સરકારી વળતર જમા: રાજ્યના વિકાસ કાર્યોને મળશે બળ
NPS ખાતાઓમાં રહેલા સરકારી ફાળા પર પ્રાપ્ત થયેલ કુલ રૂ. ૧,૦૧૯.૬૯ કરોડની વિગતે મળેલ વળતરની રકમ હપ્તે-હપ્તે વિભાજિત કરવાને બદલે એકસાથે સરકારના “૦૦૪૯ – વ્યાજની પ્રાપ્તિ” સદરે જમા કરાવી દેવામાં આવી છે.
નાણાકીય વહીવટની આ કુશળતાના કારણે રાજ્ય સરકારના બજેટમાં તાત્કાલિક મોટો ફંડ ઉપલબ્ધ થયો છે, જેનો ઉપયોગ રાજ્યના અન્ય જનકલ્યાણકારી અને વિકાસલક્ષી કાર્યો માટે કરવામાં આવશે. આ પગલું નાણા વિભાગની આયોજનબદ્ધ કામગીરીનો ઉત્તમ પુરાવો છે.
રૂ. ૨,૨૩૦ કરોડનું D.D. મારફતે સુચારુ ચૂકવણું
કર્મચારીઓના નાણાકીય હક્કોનું રક્ષણ કરવા માટે કુલ ૩૨૭ ડિમાન્ડ ડ્રાફ્ટ (D.D.) તૈયાર કરવામાં આવ્યા હતા. આ D.D. મારફતે રૂ. ૨,૨૩૦.૨૨ કરોડની માતબર રકમ જિલ્લા શિક્ષણ અધિકારી (DEO), જિલ્લા પ્રાથમિક શિક્ષણ અધિકારી (DPEO) અને શાસનાધિકારીઓને સુચારુ રીતે ચૂકવી દેવામાં આવી છે.
આટલી મોટી રકમનું ત્વરિત અને ભૂલરહિત ટ્રાન્સફર પ્રશાસનની મજબૂત નાણાકીય શિસ્ત દર્શાવે છે.
QR અને બાર કોડ ટેકનોલોજીથી સંપૂર્ણ પારદર્શકતા
આટલી મોટી રકમ અને હજારો કેસોની પ્રક્રિયા દરમિયાન કોઈપણ પ્રકારની નાણાકીય ગેરરીતિ કે માનવસહજ ભૂલો ન થાય તે માટે આધુનિક ટેકનોલોજીનો ઉપયોગ કરવામાં આવ્યો છે.
ઓથોરિટી લેટર અને D.D. ડિસ્પેચ લેટરમાં QR કોડ અને બાર કોડ ટેકનોલોજી ઉમેરવામાં આવી છે, જેનાથી કાગળોની ચકાસણી ડિજિટલ રીતે સેકન્ડોમાં થઈ શકે. આ સુધારાના કારણે સમગ્ર વહીવટમાં સચોટતા અને પારદર્શકતા જળવાઈ રહી છે.
બલ્ક પ્રોસેસિંગ પદ્ધતિ: વિલંબ અને ભ્રષ્ટાચારમુક્ત વહીવટનું ઉદાહરણ
વ્યક્તિગત ફાઈલોના નિકાલમાં થતો વિલંબ અટકાવવા માટે નાણા વિભાગ દ્વારા જિલ્લા કચેરીવાર ‘બલ્ક પ્રોસેસિંગ’ (Bulk Processing) પદ્ધતિ અપનાવવામાં આવી હતી. આ પદ્ધતિના કારણે એકસાથે સેંકડો ફાઈલોની પ્રક્રિયા પૂર્ણ થઈ શકી, જેનાથી વચેટિયાઓની ભૂમિકા સંપૂર્ણપણે નાબૂદ થઈ ગઈ અને ભ્રષ્ટાચારમુક્ત વહીવટનું ઉદાહરણ પૂરું પાડવામાં આવ્યું.
માનનીય નાણાં મંત્રીઓના કુશળ નેતૃત્વ હેઠળ નાણાં વિભાગ, પેન્શન અને પ્રોવિડન્ટ ફંડ કચેરી, ગાંધીનગરના તમામ અધિકારીઓ અને કર્મચારીઓએ આ વિશાળ અને સંવેદનશીલ કામગીરી અત્યંત નિષ્ઠા, પારદર્શકતા અને જવાબદારીપૂર્વક પૂર્ણ કરી છે, જે રાજ્ય સરકારના વહીવટી ઇતિહાસમાં એક વિશેષ સિદ્ધિ સમાન છે.
