ટોયલેટના ફ્લશ ટેન્કમાં જામી ગઈ છે ગંદકી અને લીલ? મોંઘા ક્લીનરની જરૂર નથી, આ 3 ઘરેલું વસ્તુઓથી કરો ચમકદાર સફાઈ
ઘરની સાફ-સફાઈ કરતી વખતે આપણે બાથરૂમની ટાઇલ્સ, ટોયલેટ સીટ, નળ અને ફ્લોરનું ખાસ ધ્યાન રાખીએ છીએ. પરંતુ ઘણીવાર એક એવી જગ્યા રહી જાય છે, જ્યાં સૌથી વધુ ગંદકી જમા થવાની શક્યતા હોય છે. આ જગ્યા એટલે ટોયલેટની ફ્લશ ટેન્ક. લાંબા સમય સુધી તેની સફાઈ ન કરવામાં આવે તો અંદર લીલ, કાઈ, ગંદકી અને પાણીના ક્ષારનું સફેદ પડ જામી શકે છે. ધીમે ધીમે આ ગંદકી ફ્લશની કાર્યક્ષમતાને પણ અસર કરી શકે છે.
પરંતુ હવે ફ્લશ ટેન્કની સફાઈ માટે મોંઘા કેમિકલ કે ક્લીનર પાછળ પૈસા ખર્ચવાની જરૂર નથી. રસોડામાં સરળતાથી મળી રહેતી ત્રણ વસ્તુઓની મદદથી તમે ફ્લશ ટેન્કની સફાઈ કરી શકો છો.
ફ્લશ ટેન્કમાં ગંદકી અને લીલ કેમ જામી જાય છે?
ફ્લશ ટેન્કમાં સતત પાણી ભરેલું રહેતું હોવાથી સમય જતાં તેની અંદરની સપાટી પર ગંદકી અને લીલ જમા થવા લાગે છે. ખાસ કરીને પાણીમાં ક્ષારનું પ્રમાણ વધારે હોય તો ટેન્કની અંદર સફેદ કે ભૂખરા રંગનું પડ જોવા મળે છે.
આ ઉપરાંત પાણીમાં આયર્ન અને મેંગેનીઝ જેવા તત્ત્વોનું પ્રમાણ વધારે હોય તો ટેન્કમાં કાળા કે ભૂખરા ડાઘ પડી શકે છે. ટેન્કના અંદરના લોખંડના ભાગોમાં કાટ લાગવાની પણ શક્યતા રહે છે. સામાન્ય રીતે આપણે ટેન્કનું ઢાંકણ ખોલીને તેની સફાઈ કરતા નથી, જેના કારણે અંદર ગંદકી વધતી જાય છે.
સફાઈ માટે કઈ ત્રણ વસ્તુઓની જરૂર પડશે?
ફ્લશ ટેન્કને સાફ કરવા માટે નીચેની ઘરેલું વસ્તુઓ તૈયાર રાખો.
- વિનેગર (સરકો): 1 કપ
- બેકિંગ સોડા: અડધો કપ
- લિક્વિડ ડિશ સોપ: 2 ચમચી
આ ઉપરાંત આશરે 1થી 2 લિટર હૂંફાળું પાણી અને એક નરમ બ્રશ અથવા કપડાની જરૂર પડશે.
કેવી રીતે કરશો ફ્લશ ટેન્કની સફાઈ?
સ્ટેપ 1: પાણીનો સપ્લાય બંધ કરો
સૌપ્રથમ ફ્લશ ટેન્કમાં પાણી આવતું હોય તે વાલ્વ બંધ કરી દો. ત્યારબાદ ફ્લશ ચલાવીને ટેન્કમાં રહેલું પાણી બહાર કાઢી નાખો. હવે ટેન્કની અંદરની સપાટી સરળતાથી સાફ કરી શકાશે.
સ્ટેપ 2: વિનેગર અને બેકિંગ સોડાનો ઉપયોગ કરો
ટેન્કમાં એક કપ વિનેગર ઉમેરો. ત્યારબાદ અડધો કપ બેકિંગ સોડા અને બે ચમચી લિક્વિડ ડિશ સોપ નાખો. આ મિશ્રણ ગંદકી અને હળવા ડાઘ ઢીલા કરવામાં મદદરૂપ થઈ શકે છે.
સ્ટેપ 3: હૂંફાળું પાણી ઉમેરો
હવે મિશ્રણમાં આશરે એક લિટર હૂંફાળું પાણી ઉમેરો. ધ્યાન રાખો કે પાણી વધારે ગરમ ન હોવું જોઈએ. ખાસ કરીને પ્લાસ્ટિકની ફ્લશ ટેન્કમાં ઉકળતું પાણી નાખવાથી નુકસાન થઈ શકે છે. આ મિશ્રણને લગભગ 30થી 40 મિનિટ સુધી રહેવા દો.
સ્ટેપ 4: બ્રશથી હળવા હાથે સફાઈ કરો
નક્કી કરેલો સમય પૂરો થયા બાદ નરમ બ્રશની મદદથી ટેન્કની અંદરની કિનારીઓ અને ગંદકી જમા થયેલી જગ્યાઓ સાફ કરો. ફ્લશના વાલ્વ, રબર સીલ અને અન્ય નાના ભાગોને નુકસાન ન થાય તેનું ખાસ ધ્યાન રાખો. વધારે જોરથી ઘસવાનું ટાળો.
સ્ટેપ 5: સ્વચ્છ પાણીથી ટેન્ક ધોઈ લો
સફાઈ પૂરી થયા બાદ પાણીનો સપ્લાય ફરી શરૂ કરો. ટેન્કમાં સ્વચ્છ પાણી ભરાય ત્યારબાદ બે-ત્રણ વખત ફ્લશ ચલાવો, જેથી અંદર રહેલું મિશ્રણ અને છૂટેલી ગંદકી બહાર નીકળી જાય.
કેટલી વાર ફ્લશ ટેન્ક સાફ કરવી જોઈએ?
ફ્લશ ટેન્કની સફાઈ નિયમિત રીતે કરવી જરૂરી છે. સામાન્ય રીતે દર 3થી 6 મહિને એકવાર તેની તપાસ અને સફાઈ કરી શકાય છે. જો તમારા વિસ્તારમાં પાણીમાં ક્ષારનું પ્રમાણ વધારે હોય અથવા ટેન્કમાં વારંવાર લીલ જામી જતી હોય તો વધુ વખત સફાઈ કરવાની જરૂર પડી શકે છે.
આ સાવચેતી રાખવાનું ભૂલશો નહીં
ફ્લશ ટેન્કની સફાઈ કરતી વખતે ક્યારેય બ્લીચ, એસિડ અથવા ટોયલેટ ક્લીનર સાથે વિનેગર મિક્સ ન કરો. અલગ-અલગ કેમિકલ ભેગાં કરવાથી જોખમી ગેસ પેદા થઈ શકે છે. સફાઈ દરમિયાન હાથમાં મોજાં પહેરો અને બાથરૂમમાં હવાની અવરજવર રહે તેની વ્યવસ્થા કરો. જો ટેન્કના અંદરના ભાગોમાં કાટ, લીકેજ અથવા કોઈ યાંત્રિક ખામી જણાય તો પ્લમ્બરની મદદ લો.
આમ, થોડી કાળજી અને નિયમિત સફાઈથી ફ્લશ ટેન્કને સ્વચ્છ રાખી શકાય છે. બાથરૂમની સ્વચ્છતા માત્ર બહારથી ચમકતી ટાઇલ્સ પૂરતી મર્યાદિત નથી, પરંતુ ફ્લશ ટેન્ક જેવી અંદરની જગ્યાઓની સફાઈ પણ એટલી જ જરૂરી છે.
