₹5,000ની EMI જોઈને ખુશ ન થતા! કાર લોન લેતા પહેલા જાણી લો આ મોટું ગણિત
આપણે જ્યારે પણ કોઈ નવી ગાડી ખરીદવા જઈએ છીએ, ત્યારે મોટાભાગના કિસ્સામાં આખી રકમ એકસાથે ચૂકવીને કાર ખરીદતા નથી. કાર લેતા પહેલા આપણે બેંક કે ફાઈનાન્સ કંપનીઓનો સંપર્ક કરીએ છીએ અને ત્યારબાદ કંપનીઓના ‘લો-ઈએમઆઈ’ (Low EMI) ઓફર્સ જોઈને કાર ખરીદવાનું મન બનાવી લઈએ છીએ. પરંતુ કોઈ પણ વાહન માટે લોન લેતી વખતે માત્ર માસિક હપ્તો (EMI) જોઈને નિર્ણય કરવો ભવિષ્યમાં આર્થિક રીતે ભારે પડી શકે છે.
હકીકતમાં, મહત્વની વાત એ નથી કે તમે પહેલી કે શરૂઆતની થોડી કિસ્સાઓ ભરી શકો છો કે નહીં, પરંતુ અસલી કસોટી એ છે કે તમે લોનની છેલ્લી કિસ્ત સુધી ગાડીનો સમગ્ર ખર્ચ આરામથી ઉપાડી શકો છો કે નહીં. ચાલો, આ અહેવાલમાં વિગતવાર જાણીએ કે વાહન લોન લેતા પહેલા કઈ 6 જરૂરી બાબતોનું ધ્યાન રાખવું અત્યંત હિતાવહ છે.

1. ઓછી EMIનો અર્થ ઘણીવાર મોંઘી લોન થાય છે
માસિક હપ્તાની રકમ ઓછી હોય ત્યારે તે ગ્રાહકોને આકર્ષે તે સ્વાભાવિક છે. પરંતુ આ હપ્તાને ઓછો રાખવા માટે ફાઈનાન્સ કંપનીઓ ઘણીવાર લોનની મુદત (ટેન્યોર) લાંબી કરી દે છે. લોનની અવધિ વધી જવાથી તમને ભલે મહિને થોડા ઓછા પૈસા ચૂકવવા પડે, પરંતુ કુલ મળીને તમારે વ્યાજ પેટે ઘણી મોટી રકમ ચૂકવવી પડે છે. આમ, ઓછી EMI પાછળ લાંબા ગાળે મોટો વ્યાજનો બોજ છુપાયેલો હોઈ શકે છે.
2. APR અને કી ફેક્ટ્સ સ્ટેટમેન્ટની ચકાસણી કરો
માત્ર ઓછો માસિક હપ્તો જોવાના બદલે પ્રોસેસિંગ ફી અને અન્ય ચાર્જિસને સામેલ કરીને ‘એન્યુઅલ પર્સન્ટેજ રેટ’ (APR) ની સરખામણી કરવી જોઈએ, જેથી લોનની વાસ્તવિક કિંમત સમજાય. આ ઉપરાંત, રિઝર્વ બેંક ઓફ ઈન્ડિયા (RBI) ના નિયમો અનુસાર લોન આપતી સંસ્થા દ્વારા આપવામાં આવતા ‘કી ફેક્ટ્સ સ્ટેટમેન્ટ’ (KFS) ને ધ્યાનથી વાંચવું જોઈએ. આ દસ્તાવેજમાં વ્યાજ દર, લેટ પેમેન્ટ પેનલ્ટી અને લોન વહેલી બંધ કરવા (ફોરક્લોઝર) પર લાગતા ચાર્જિસની સંપૂર્ણ વિગત હોય છે.
3. EMI જ કુલ ખર્ચ નથી, અન્ય ખર્ચ પણ જોડાય છે
ગાડી ખરીદતી વખતે દર મહિને ભરાતી EMI એ કુલ ખર્ચનો માત્ર એક ભાગ છે. આ ઉપરાંત શરૂઆતમાં ડાઉન પેમેન્ટ, રજિસ્ટ્રેશન, રોડ ટેક્સ અને વીમા (ઇન્શ્યોરન્સ) માટે પણ મોટી રકમની વ્યવસ્થા કરવી પડે છે. ગાડી ઘરે આવ્યા પછી પેટ્રોલ, ડીઝલ કે ચાર્જિંગ (ફ્યુઅલ), નિયમિત સર્વિસિંગ, ટાયર બદલવા અને સમારકામ (મેન્ટેનન્સ) જેવા ખર્ચ દર મહિને જોડાય છે. લોન લેતા પહેલા આ તમામ નિયમિત ખર્ચનો યોગ્ય અંદાજ કાઢવો ખૂબ જરૂરી છે.
4. લોન મંજૂર થવી એટલે જોખમ ટળી જવું નહીં
બેંક કે ફાઈનાન્સ કંપનીમાંથી લોન મંજૂર થઈ જાય તેનો એ અર્થ નથી કે તમે દરેક પરિસ્થિતિમાં સરળતાથી હપ્તા ભરી શકશો. જીવનમાં અચાનક મેડિકલ ઇમરજન્સી આવી શકે છે, નોકરીમાં ફેરફાર થઈ શકે છે અથવા જો તમે કોમર્શિયલ વાહન લઈ રહ્યા હોવ, તો ઓફ-સીઝન દરમિયાન આવક ઘટી શકે છે. આવા મુશ્કેલ સમયનો સામનો કરવા માટે હંમેશા ઓછામાં ઓછા 3 મહિનાની EMI જેટલી રકમ ‘ઇમરજન્સી ફંડ’ તરીકે અલગ રાખવી એ સમજદારીભર્યું પગલું છે.

5. ડાઉન પેમેન્ટ અને ઘટતી રીસેલ વેલ્યુનું ભાન
એક હકીકત એ છે કે ગાડી શોરૂમમાંથી બહાર નીકળે કે તરત જ તેની રીસેલ વેલ્યુ (બજાર કિંમત) ઘટવા લાગે છે. જો તમે ડાઉન પેમેન્ટ ખૂબ ઓછું કરો છો, તો ઘણી વખત એવી સ્થિતિ સર્જાય છે કે બાકી રહેતી લોનની રકમ ગાડીની વર્તમાન બજાર કિંમત કરતા પણ વધી જાય છે. તેથી, શરૂઆતમાં શક્ય હોય તેટલું વધુ ડાઉન પેમેન્ટ કરવું વધુ હિતાવહ રહે છે, જેથી લોનનો બોજ હળવો રહે અને નાણાકીય સંતુલન જળવાય.
6. યોગ્ય વીમો અને ક્રેડિટ સ્કોર જાળવવાનું મહત્વ
વાહન માટે હંમેશા યોગ્ય ઇન્શ્યોરન્સ પોલિસી પસંદ કરવી જોઈએ અને વાહનનો વાસ્તવિક ઉપયોગ (જેમ કે અંગત ઉપયોગ કે કોમર્શિયલ) કયા પ્રકારનો છે તેની સાચી માહિતી કંપનીને આપવી જોઈએ. અધૂરી કે ખોટી માહિતી ક્લેમ સમયે મોટી મુશ્કેલી ઊભી કરી શકે છે. સાથે જ, લોનની એક પણ EMI ચૂકવવામાં ભૂલ ન કરવી જોઈએ. હપ્તા સમયસર ન ભરાય તો તમારો ક્રેડિટ સ્કોર (CIBIL/ક્રેડિટ હિસ્ટરી) બગડી શકે છે અને ભવિષ્યમાં કોઈ પણ પ્રકારની લોન મેળવવી મુશ્કેલ બની જાય છે.
ટૂંકમાં કહીએ તો, ચમકતી ઓફર્સ અને ઓછી EMIના આકર્ષણમાં આવ્યા વગર પોતાની આવક, બચત અને ભવિષ્યની સંભવિત જરૂરિયાતોને ધ્યાનમાં રાખીને વાહન લોન લેવામાં આવે, તો જ ગાડીનો આનંદ માણી શકાય અને આર્થિક તણાવથી બચી શકાય.
