‘ચાર બંગડીવાળી’ આલ્બમમાં વપરાયેલી કારનો હત્યામાં ઉપયોગ.

અમદાવાદ તા.8 :ગુજરાતી હિટ આલ્બમ ‘ચાર ચાર બંગડીવાળી ગાડી લાવી દઉ’ના આલ્બમમાં વપરાયેલી કાર એક હત્યામાં વપરાઈ હોવાનું બહાર આવ્યું છે. કિંજલ દવેના આલ્બમમાં વપરાયેલી આ ઔડી કારમાં થોડાક મહિના પહેલા એક શખસનું અપહરણ થયું હોવાનો અને બાદમાં તેની હત્યા કરાઈ હોવાનો ચોંકાવનારો ઘટસ્ફોટ થયો છે. અપહરણ-હત્યામાં વપરાયેલી કાર અને કિંજલ દવેના આલ્બમમાં વપરાયેલી કારનો નંબર એક જ છે અને પોલીસ આ બંને કાર એક જ છે કે કેમ તે અંગે તપાસ કરી રહી છે.
વટવામાં થોડા મહિના અગાઉ થયેલા અપહરણ-હત્યા કેસમાં વપરાયેલી ઔડી કારને પોલીસે જપ્ત કરી છે. બોપલના રહેવાસીની કારનો ઉપયોગ યુવકનું અપહરણ કરવામાં થયો હતો, બાદમાં યુવકની હત્યા કરવામાં આવી હોવાનું પોલીસ તપાસમાં બહાર આવ્યું હતું. ચોંકાવનારી વાત એ છે કે, આ એ જ કાર હોવાનું કહેવાઈ રહ્યું છે, જેનો જાણીતી ગુજરાતી સિંગર કિંજલ દવેના ફેમસ એલ્બમ ‘ચાર બંગડીવાળી ગાડી’માં ઉપયોગ થયો હતો. હાલ વટવા પોલીસે અગાઉની હત્યા પ્રકરણમાં ઉપયોગમાં લેવાયેલી કાર કબજે લીધી છે.
બીજી તરફ આરોપીને પણ ઝડપીને કાર્યવાહી હાથ ધરવામાં આવી છે.સૂત્રોએ જણાવ્યું કે થોડાક મહિના અગાઉ સુરેન્દ્રનગર વિસ્તારમાંથી એક યુવક યુવતીને ભગાડીને લઇ ગયો હતો. ત્યાર બાદ તે યુવકનું અપહરણ કરીને વટવા વિસ્તારમાં લવાયો હતો. જ્યાં તેને માર મારીને વટવા વિસ્તારના રોકડા ગામ પાસે ફેંકી દેવાયો હતો.