‘હું અરબ કરતાં વધુ ભારતીય છું!’ અમેરિકાના નવા મુસ્લિમ સેનેટર અબ્દુલ અલ-સયદનો વીડિયો વાયરલ, જાણો ભારત સાથે શું છે ખાસ કનેક્શન
અમેરિકાના રાજકારણમાં ઐતિહાસિક સફળતા મેળવનારા અબ્દુલ અલ-સયદ હાલમાં એક અલગ જ કારણસર ચર્ચામાં છે. મિશિગનથી અમેરિકાની સેનેટ ચૂંટણી જીત્યા બાદ તેમનો એક જૂનો પોડકાસ્ટ વીડિયો સોશિયલ મીડિયા પર ઝડપથી વાયરલ થઈ રહ્યો છે. આ વીડિયોમાં તેઓ મજાકિયા અંદાજમાં કહેતા જોવા મળે છે કે, ‘હું અરબ કરતાં વધુ ભારતીય હોઈ શકું છું.’ તેમની આ વાત પાછળનું કારણ તેમની ભારતીય મૂળની પત્ની અને દક્ષિણ ભારતીય પરિવાર સાથેનો લગભગ બે દાયકાનો સંબંધ છે.
ભારતીય પરિવાર સાથે જોડાયા બાદ બદલાઈ ગઈ જીવનશૈલી
અબ્દુલ અલ-સયદની પત્નીનું નામ ડૉ. સારા જુકાકુ છે. તેઓ વ્યવસાયે મનોચિકિત્સક છે અને તેમનો પરિવાર મૂળ ભારતના કર્ણાટક રાજ્યના ભટકલ શહેર સાથે જોડાયેલો છે. સારા અમેરિકાના મિશિગનમાં જન્મ્યાં અને ત્યાં જ તેમનો ઉછેર થયો હતો, પરંતુ તેમના પરિવારમાં ભારતીય સંસ્કૃતિ અને પરંપરાઓનું વિશેષ સ્થાન છે.
અબ્દુલ અને સારા બંને યુનિવર્સિટી ઓફ મિશિગનમાં અભ્યાસ દરમિયાન મળ્યાં હતાં. ત્યારબાદ બંને વચ્ચે મિત્રતા થઈ અને મે 2006માં તેમણે લગ્ન કરી લીધાં. આજે આ દંપતીને બે દીકરીઓ છે, જેમનાં નામ એમાલી અને સેરિન છે.
પોડકાસ્ટમાં અબ્દુલે હળવા અંદાજમાં જણાવ્યું હતું કે દક્ષિણ ભારતીય પરિવારમાં લગ્ન કર્યા બાદ તેઓ છેલ્લા લગભગ 20 વર્ષથી ભારતીય સંસ્કૃતિની વચ્ચે રહી રહ્યા છે. આ જ કારણથી તેમણે મજાકમાં કહ્યું કે કદાચ તેઓ હવે અરબ કરતાં વધુ ભારતીય બની ગયા છે.
કાકાએ લગ્ન અંગે પૂછ્યો હતો રસપ્રદ સવાલ
અબ્દુલના વાયરલ થઈ રહેલા પોડકાસ્ટમાં તેમના લગ્ન સાથે જોડાયેલી એક મજેદાર ઘટના પણ સામે આવી છે. તેમણે જણાવ્યું કે જ્યારે તેમણે ભારતીય મૂળની યુવતી સાથે લગ્ન કર્યા ત્યારે ઇજિપ્તમાં રહેતા તેમના એક કાકાને આ વાત જાણીને આશ્ચર્ય થયું હતું.
કાકાએ તેમને પૂછ્યું હતું કે ઇજિપ્તમાં 8 કરોડ લોકો રહે છે, તો પછી તું ભારતીય યુવતી સાથે જ લગ્ન કેમ કર્યાં?
આ સવાલનો અબ્દુલે પણ રમૂજી જવાબ આપ્યો હતો. તેમણે કહ્યું કે કાકા, ભારતમાં તો 100 કરોડથી વધુ લોકો છે, એટલે આંકડાકીય રીતે જોવામાં આવે તો આવું થવાની શક્યતા વધારે જ હતી.
તેમનો આ જવાબ સાંભળીને પોડકાસ્ટમાં હાજર લોકો પણ હસી પડ્યા હતા. હવે આ જૂની વાતચીતનો વીડિયો તેમની ચૂંટણી જીત બાદ ફરી સોશિયલ મીડિયા પર ચર્ચાનો વિષય બન્યો છે.
કર્ણાટકના ભટકલ સાથે જોડાયેલો છે પરિવારનો ઇતિહાસ
સારાના પરિવારની મૂળ ઓળખ કર્ણાટકના ઉત્તર કન્નડ જિલ્લામાં આવેલા દરિયાકાંઠાના ભટકલ શહેર સાથે જોડાયેલી છે. તેમના પિતા ડૉ. તૈયેબ જુકાકુ વ્યવસાયે નેફ્રોલોજિસ્ટ છે. તેમણે બેંગલુરુમાં તબીબી અભ્યાસ કર્યો હતો અને ત્યારબાદ 1980ના દાયકામાં અમેરિકા સ્થાયી થયા હતા.
સારાના દાદા જુકાકુ શમસુદ્દીન પણ જાણીતી વ્યક્તિ હતા. તેઓ વકીલ અને રાજકીય ક્ષેત્ર સાથે સંકળાયેલા હતા. અગાઉના મૈસૂર રાજ્યમાં મુખ્યમંત્રી બી.ડી. જત્તીના કાર્યકાળ દરમિયાન તેમણે નાયબ નાણામંત્રી તરીકે પણ સેવા આપી હતી.
અમેરિકાની સેનેટમાં પ્રથમ મુસ્લિમ તરીકે બનાવ્યો ઇતિહાસ
અબ્દુલ અલ-સયદે મિશિગનની સેનેટ ચૂંટણીમાં રિપબ્લિકન ઉમેદવાર માઇક રોજર્સને હરાવીને ઐતિહાસિક જીત મેળવી છે. આ જીત સાથે તેઓ અમેરિકાની સેનેટમાં ચૂંટાનારા પ્રથમ મુસ્લિમ બન્યા છે.
તેમની જીત બાદ ભારતીય મૂળના પરિવાર સાથેનો સંબંધ પણ ચર્ચામાં આવ્યો છે. ખાસ કરીને કર્ણાટકના ભટકલ સાથે જોડાયેલું તેમનું પારિવારિક કનેક્શન ભારતીયોમાં પણ ઉત્સુકતા જગાવી રહ્યું છે.
