વાહનની ટાંકી ભરાવતા પહેલાં જાણી લો આજનો નવો દર
આજના આધુનિક યુગમાં મોંઘવારી સામાન્ય માનવીના ખિસ્સા પર સીધો પ્રહાર કરી રહી છે, અને તેમાં પણ જ્યારે સવાર-સવારમાં વાહનમાં પેટ્રોલ કે ડીઝલ પુરાવવાનું હોય ત્યારે ભાવ સાંભળીને જ દિલના ધબકારા વધી જતા હોય છે. વૈશ્વિક બજારમાં ક્રૂડ ઓઇલની કિંમતોમાં આવી રહેલા ઉછાળા અને ખાડી દેશોમાં ચાલી રહેલા ભૌગોલિક-રાજકીય તણાવની સીધી અસર હવે ભારતના સામાન્ય નાગરિકોના બજેટ પર દેખાવા લાગી છે. સરકારી તેલ કંપનીઓએ આજે સવારે જ ઇંધણના નવા દરો જાહેર કર્યા છે, જે વાહનચાલકો માટે ચિંતાજનક છે.
પેટ્રોલ અને ડીઝલના ભાવે સામાન્ય જનતાની ચિંતામાં વધારો કર્યો છે. ઈરાનમાં ચાલી રહેલા આંતરિક સંઘર્ષ અને હોર્મુઝ સ્ટ્રેટ (Hormuz Strait) ની આસપાસ વધી રહેલા લશ્કરી તણાવને કારણે વૈશ્વિક સ્તરે કાચા તેલ (ક્રૂડ ઓઇલ) ની કિંમતો સતત વધી રહી છે. આ વૈશ્વિક અસ્થિરતાની વચ્ચે, ભારતીય ઓઇલ માર્કેટિંગ કંપનીઓએ પણ પોતાનું નુકસાન સરભર કરવા માટે સામાન્ય ગ્રાહકો પર બોજ નાખવાનું શરૂ કરી દીધું છે, જેના કારણે બજારમાં ઇંધણના ભાવ છેલ્લા ચાર વર્ષના સર્વોચ્ચ સ્તરે પહોંચી ગયા છે.
ઓઇલ કંપનીઓ દ્વારા ભાવમાં ધરખમ વધારો
છેલ્લા કેટલાક સમયથી સ્થિર રહેલા ઇંધણના ભાવમાં તાજેતરમાં મોટો ઉછાળો આવ્યો છે. ઓઇલ કંપનીઓએ ગત ૨૫ મેના રોજ જ પેટ્રોલ અને ડીઝલ બંનેના ભાવમાં પ્રતિ લિટર ૨.૫૦ રૂપિયાથી વધુનો વધારો કર્યો હતો. જો ૧૫ મે પછીની એકંદર ગણતરી કરવામાં આવે તો, માત્ર એક મહિનાની અંદર જ ઇંધણના ભાવમાં પ્રતિ લિટર ૭.૫૦ રૂપિયાનો તોતિંગ વધારો ઝીંકવામાં આવ્યો છે. આ પૂર્વે માર્ચ ૨૦૨૪માં લોકસભા ચૂંટણી પહેલાં પ્રતિ લિટર ૨ રૂપિયાનો ઘટાડો કરાયો હતો, પરંતુ તે પછી આ વર્ષે આવેલો વધારો મધ્યમ વર્ગ કમર તોડી નાખનારો સાબિત થઈ રહ્યો છે.
સરકારનો નવો આદેશ: પેટ્રોલ પંપ પર ભીડ રોકવા કડક નિયમ
ઇંધણના છૂટક અને જથ્થાબંધ ભાવો વચ્ચેના મોટા તફાવતને કારણે બજારમાં એક નવી સમસ્યા ઉભી થઈ છે. કિંમતોના આ તફાવતનો લાભ લેવા માટે મોટા ઔદ્યોગિક, વાણિજ્યિક અને સંસ્થાકીય ગ્રાહકોએ (જેમ કે ફેક્ટરીઓ અને ખાનગી બસ ઓપરેટરો) જથ્થાબંધ ડેપોને બદલે સામાન્ય પેટ્રોલ પંપ પરથી બળતણ ખરીદવાનું શરૂ કર્યું હતું. આના કારણે રિટેલ પેટ્રોલ પંપ પર અચાનક ડીઝલની માંગમાં અસામાન્ય વધારો થયો હતો.
પરિસ્થિતિને કાબૂમાં લેવા માટે સરકારે એક કડક આદેશ જારી કરીને તમામ વ્યાપારી અને ઔદ્યોગિક વપરાશકર્તાઓ પર પેટ્રોલ પંપ પરથી બળતણ ખરીદવા પર આગામી ૯૦ દિવસ સુધી પ્રતિબંધ મૂકી દીધો છે. હવે આ જથ્થાબંધ ગ્રાહકોએ ફરજિયાતપણે તેલ કંપનીઓના અધિકૃત જથ્થાબંધ વેચાણ કેન્દ્રો પરથી જ ખરીદી કરવી પડશે. ઉદાહરણ તરીકે જોઈએ તો, હાલમાં દિલ્હીમાં સામાન્ય પેટ્રોલ પંપ પર ડીઝલનો ભાવ ૯૫.૨૦ રૂપિયા પ્રતિ લિટર છે, જ્યારે તેનો જથ્થાબંધ (હોલસેલ) ભાવ ૧૩૪.૫૦ રૂપિયા છે. આ આશરે ૩૯ રૂપિયાના મોટા તફાવતને કારણે સરકારે આ મોટો નિર્ણય લીધો છે.
દેશના મુખ્ય શહેરોમાં આજનો ભાવસૂચક આંક
દેશના અલગ-અલગ રાજ્યોમાં ટેક્સના માળખાના કારણે કિંમતો અલગ-અલગ જોવા મળી રહી છે. દેશની રાજધાની દિલ્હીમાં આજે પેટ્રોલ ૧૦૨.૧૨ રૂપિયા અને ડીઝલ ૯૫.૨૦ રૂપિયા પ્રતિ લિટર મળી રહ્યું છે. આર્થિક પાટનગર મુંબઈમાં પેટ્રોલનો ભાવ ૧૧૧.૧૮ રૂપિયા અને ડીઝલ ૯૭.૮૩ રૂપિયાના સ્તરે પહોંચ્યો છે. કોલકાતામાં પેટ્રોલ ૧૧૩.૪૭ રૂપિયા અને ડીઝલ ૯૯ રૂપિયા છે, જ્યારે ચેન્નાઈમાં પેટ્રોલ ૧૦૭.૭૭ રૂપિયા અને ડીઝલ ૯૯.૫૫ રૂપિયા પ્રતિ લિટર વેચાઈ રહ્યું છે. બિહારના પટનામાં પેટ્રોલ ૧૧૩.૩૫ રૂપિયા અને ડીઝલ ૯૯.૩૬ રૂપિયા છે. રાંચીમાં પેટ્રોલ ૧૦૧.૯૩ રૂપિયા અને ડીઝલ ૧૦૧.૦૬ રૂપિયા છે. જયપુરમાં પેટ્રોલ ૧૧૨.૬૬ રૂપિયા અને ડીઝલ ૯૭.૭૮ રૂપિયા છે, જ્યારે ભોપાલમાં પેટ્રોલ ૧૧૪.૫૪ રૂપિયા અને ડીઝલ ૯૯.૬૪ રૂપિયાના આંકડાને સ્પર્શી ગયું છે. જો કે, દેશમાં સૌથી સસ્તું ઇંધણ પોર્ટ બ્લેરમાં મળી રહ્યું છે, જ્યાં પેટ્રોલ ૮૮.૬૬ રૂપિયા અને ડીઝલ ૮૪.૫૬ રૂપિયા પ્રતિ લિટર છે.
મુંબઈમાં રવિવારે વાહનચાલકોને મળશે મોટી રાહત
આ મોંઘવારી વચ્ચે મુંબઈના ટુ-વ્હીલર ચાલકો માટે એક રાહતના સમાચાર આવ્યા છે. મહારાષ્ટ્ર નવનિર્માણ સેના (MNS) ના પ્રમુખ રાજ ઠાકરેના ૫૮મા જન્મદિવસ નિમિત્તે ૧૪ જૂન એટલે કે રવિવારના રોજ સવારે ૯ વાગ્યાથી મુંબઈના ટુ-વ્હીલર સવારોને ડિસ્કાઉન્ટ દરે (સસ્તું) પેટ્રોલ પૂરું પાડવામાં આવશે. આ ખાસ ઓફર માટે પાર્ટીએ મુંબઈ શહેરના ૩૬ અલગ-અલગ પેટ્રોલ પંપ સાથે સત્તાવાર કરાર કર્યા છે. જો કે, આ સુવિધા માત્ર રવિવાર પૂરતી અને ફક્ત મુંબઈના વાહનચાલકો માટે જ ઉપલબ્ધ રહેશે, જે સ્થાનિક સ્તરે ચર્ચાનો વિષય બની છે. વૈશ્વિક ગતિવિધિઓને જોતા આગામી દિવસોમાં પણ ઇંધણના ભાવમાં નરમાશ આવવાના કોઈ સંકેતો દેખાતા નથી
