ગ્રામજનોએ ડી.ડી.ઓ.ને અરજી આપી, પંચાયત દ્વારા લેવાતી અનિયમિત ફી પર કડક તપાસની માંગ
ખેડા જિલ્લાના માતર તાલુકાની હૈજરાબાદ ગ્રામ પંચાયત હાલ વિવાદોના કેન્દ્રમાં છે. ગામના રહેવાસીઓએ આરોપ મૂક્યો છે કે પંચાયત કચેરીમાં ભાવપત્રક લગાવીને વિવિધ સરકારી દાખલાઓ માટે અનિયમિત રીતે રૂપિયા 100 ની વસૂલાત કરવામાં આવી રહી છે. સામાન્ય રીતે મફત અથવા નામમાત્ર ફીમાં મળતી સેવાઓ માટે વસૂલાત થવાથી ગ્રામજનોમાં ભારે અસંતોષ ફેલાયો છે.
સહી-મોહરવાળું ભાવપત્રક બની ગયું વિવાદનું કારણ
ગ્રામજનોએ જણાવ્યું કે પંચાયત કચેરીમાં લગાવાયેલ ભાવપત્રક માત્ર ચોંટાડેલું નથી તેના પર સહી અને સિક્કા પણ કરવામાં આવ્યા છે, જે જાણે સત્તાવાર દરખાસ્ત હોવાનું દર્શાવે છે. જન્મ, મરણ, આવક તથા અન્ય દાખલા કાઢવા ઉપરાંત રેશનકાર્ડ અને જમીનના રેકોર્ડ માટે પણ વધારાની રકમ લેવામાં આવતી હોવાનો આક્ષેપ છે. નિયમ અનુસાર આ કામો માટે આટલી ઉઘરાણી કરવી માન્ય નથી, છતાં ગામવાસીઓને બળજબરીથી ચુકવણી કરવી પડતી હોવાની વાત સામે આવી છે.
ગ્રામજનોએ ડી.ડી.ઓ સમક્ષ રજૂઆત કરી
ગેરરીતિથી અકળાઈ ગયેલા અનેક ગ્રામજનોએ એકઠા થઈ જિલ્લા વિકાસ અધિકારીને લેખિત અરજી આપી છે. રજૂઆતમાં માગ કરવામાં આવી છે કે પંચાયત દ્વારા કરવામાં આવેલી આ મનસ્વી ઉઘરાણીની તાત્કાલિક તપાસ કરવામાં આવે. સાથે ગામજનોએ હુકમ કર્યો છે કે લાગેલું ભાવપત્રક રદ કરવામાં આવે અને જે લોકો પાસેથી નિયમવિરુદ્ધ રકમ લેવામાં આવી છે તેમને પૈસા પરત મળે.
પારદર્શક વહીવટની માંગ, તપાસની અપેક્ષા
રજુઆતમાં ગ્રામજનોએ સ્પષ્ટ કર્યું છે કે પંચાયતનો વહીવટ સચોટ અને પારદર્શક રહે તે તેમની મૂળભૂત અપેક્ષા છે. સરકારી સેવાઓ માટે અનધિકૃત રીતે પૈસા વસૂલવામાં આવે તો તે નાગરિકોના હક્કો પર સીધી અસર કરે છે. હવે સમગ્ર મામલે વહીવટી તપાસ શરૂ થવાની શક્યતા છે અને ગ્રામજનોને આશા છે કે જવાબદાર લોકો સામે યોગ્ય કાર્યવાહી થશે.
