પીએફ ઉપાડ માટેનો દાવો વારંવાર નામંજૂર થઈ રહ્યો છે? આ મુખ્ય ભૂલો કરવાથી બચો તો જ સરળતાથી મળશે નાણાં
મુશ્કેલ અને જરૂરિયાત સમયમાં જ્યારે વ્યક્તિને પોતાના જ જમા થયેલા નાણાંની તાકીદે જરૂર હોય અને તે સમયે તેનો પીએફ (PF) ક્લેમ રિજેક્ટ થઈ જાય, તો તે ચોક્કસપણે ચિંતાનો વિષય બની જાય છે. સામાન્ય રીતે કર્મચારીઓ તબીબી સારવાર, પરિવારમાં લગ્નપ્રસંગ, નવું ઘર ખરીદવા કે નોકરી બદલ્યા બાદ ઊભી થતી નાણાકીય તંગી દરમિયાન ‘એમ્પ્લોઈઝ પ્રોવિડન્ટ ફંડ ઓર્ગેનાઈઝેશન’ (EPFO) હેઠળ પોતાના પીએફ ખાતામાંથી ઓનલાઈન પૈસા ઉપાડવા માટે દાવો કરતા હોય છે. પરંતુ ઘણી વખત આપેલી વિગતોમાં સામાન્ય ક્ષતિને કારણે આ અરજી ફગાવી દેવામાં આવે છે.
ઓનલાઈન ફોર્મ સબમિટ કર્યા પછી તરત જ રકમ મળશે તેવી ખાતરી હોતી નથી. જો તમારો ક્લેમ પણ ભૂતકાળમાં ના મંજૂર થયો હોય તો નવો ક્લેમ દાખલ કરતા પહેલા તેના મુખ્ય કારણો અને ભૂલો જાણી લેવી ખૂબ જરૂરી છે.
પીએફ ક્લેમ રિજેક્ટ થવાના મુખ્ય કારણો અને સુધારાના ઉપાયો
૧. યુએએન અને આધાર વિગતોમાં તફાવત:
સૌપ્રથમ તમારા યુનિવર્સલ એકાઉન્ટ નંબર (UAN) અને આધારમાં દર્શાવેલી માહિતીની ચકાસણી કરો. જો બંને વચ્ચે નામ, સ્પેલિંગ કે જન્મ તારીખમાં સહેજ પણ વિસંગતતા હશે તો વેરિફિકેશન દરમિયાન ક્લેમ અટકી જશે.
૨. બેંક ખાતાની ખોટી કે વિસંગત વિગતો:
પીએફની રકમ સીધી તમારા નોંધાયેલા અને ચકાસાયેલા બેંક ખાતામાં જમા થાય છે. જો બેંક એકાઉન્ટ નંબર, આઈએફએસસી (IFSC) કોડ અથવા એકાઉન્ટ હોલ્ડરના નામમાં ભૂલ હશે તો ક્લેમ રિજેક્ટ થઈ જશે.
૩. નિષ્ક્રિય કે બંધ બેંક ખાતું:
જો ઈપીએફઓ સિસ્ટમમાં નોંધાયેલું બેંક ખાતું બંધ કે ઈનએક્ટિવ હોય તો ટ્રાન્સફર નિષ્ફળ જાય છે. તેથી અરજી કરતા પહેલા બેંક એકાઉન્ટ ચાલુ હોવાની ખાતરી કરી લેવી.
૪. અધૂરું કે ચકાસણી વગરનું કેવાયસી (KYC):
આધાર કાર્ડ, બેંક ખાતું અને પાન કાર્ડ (PAN) જેવી આવશ્યક વિગતોનું કેવાયસી સંપુર્ણ અને વેરિફાઈડ હોવું ફરજિયાત છે. કેવાયસી અપડેટ ન હોવાના કારણે મોટાભાગના ક્લેમ નામંજૂર થતા હોય છે.
૫. રેકોર્ડ્સમાં નામ અથવા જન્મ તારીખનો મેળ ન થવો:
આધાર, બેંક અને ઈપીએફઓ પોર્ટલ પર દર્શાવેલા નામ તથા જન્મ તારીખ એકસમાન હોવા જરૂરી છે. કોઈપણ તફાવત હોવાના કિસ્સામાં સિસ્ટમ ડેટા મેચ કરી શકતી નથી.
૬. એમ્પ્લોયર (કંપની) ના રેકોર્ડમાં ભૂલ:
ઘણી વખત ભૂલ માત્ર કર્મચારી તરફથી જ નથી હોતી. જો કંપનીએ તમારી નોકરી શરૂ કર્યાની કે છોડ્યાની તારીખ ગલત દાખલ કરી હોય તો પણ ક્લેમ પર અસર પડે છે. આ બાબતે કંપનીના એચઆર (HR) નો સંપર્ક કરી સુધારો કરાવવો પડે છે.
૭. ‘એક્ઝિટ ડેટ’ અપડેટ ન હોવી:
નોકરી છોડ્યા પછી ઈપીએફઓ રેકોર્ડમાં ‘ડેટ ઓફ એક્ઝિટ’ અપડેટ થવી અત્યંત જરૂરી છે. જો આ તારીખ દાખલ કરવામાં ન આવી હોય તો ક્લેમ પ્રોસેસ થઈ શકતો નથી. કર્મચારી પોતે પણ ઈપીએફઓ મેમ્બર પોર્ટલ પર લોગઈન થઈને આ વિગત ઉમેરી શકે છે.
૮. ખોટા ફોર્મ કે કારણની પસંદગી:
પીએફમાંથી પૈસા ઉપાડવાના અલગ-અલગ કારણો માટે નિયમો પણ અલગ હોય છે. જો તમે ખોટા પ્રકારનો ક્લેમ કે ખોટું કારણ પસંદ કરશો તો સિસ્ટમ તેને ફગાવી દેશે.
૯. પેન્ડિંગ ક્લેમ કે ટ્રાન્સફર અરજી:
જો તમારો જૂનો ક્લેમ કે જૂના ખાતામાંથી નવા ખાતામાં પીએફ ટ્રાન્સફર કરવાની પ્રક્રિયા ચાલુ (Pending) હોય તો નવો ક્લેમ સબમિટ ન કરવો જોઈએ.
ક્લેમ નામંજૂર થયા બાદ શું કરવું?
ક્લેમ રિજેક્ટ થતાંની સાથે જ ઉતાવળમાં ફરી નવી અરજી કરવી હિતાવહ નથી. સૌથી પહેલા ઈપીએફઓ પોર્ટલ પર જઈને ક્લેમ રિજેક્શનનું ચોક્કસ કારણ સમજો. ત્યારબાદ તમારા આધાર, બેંક, કેવાયસી અને કંપનીના રેકોર્ડમાં જરૂરી સુધારા કરી લો. તમામ માહિતી સાચી અને મેચ થાય છે તેની ખાતરી કર્યા પછી જ નવો ક્લેમ સબમિટ કરવો જોઈએ.
