LIC ની સરલ પેન્શન યોજનામાં એકમુષ્ટ રોકાણ કરીને મેળવો આજીવન ફિક્સ માસિક કમાણી
નિવૃત્તિ પછીનું જીવન શાંતિપૂર્ણ અને આર્થિક ચિંતાઓથી મુક્ત હોવું જોઈએ, તે દરેક નોકરિયાત અને સામાન્ય નાગરિકનું સપનું હોય છે. પરંતુ આજના સમયમાં વધતી જતી મોંઘવારી અને પ્રાઈવેટ નોકરીઓમાં પેન્શનની ગેરહાજરીને કારણે, વૃદ્ધાવસ્થામાં નિયમિત આવક કેવી રીતે ઊભી કરવી તે એક મોટો પ્રશ્ન બની જાય છે. નિવૃત્તિ વખતે મળતા પીએફ (PF) કે ગ્રેચ્યુઇટીના નાણાં જો ખોટી જગ્યાએ રોકાઈ જાય, તો જીવનભરની કમાણી ડૂબી જવાનો ભય રહે છે. આવી સ્થિતિમાં, દેશની સૌથી ભરોસાપાત્ર વીમા કંપની લાઈફ ઈન્સ્યોરન્સ કોર્પોરેશન ઓફ ઈન્ડિયા (LIC) ની ‘સરલ પેન્શન યોજના’ વરિષ્ઠ નાગરિકો માટે એક આશીર્વાદ સમાન સાબિત થઈ રહી છે, જે નિવૃત્તિના પહેલા જ દિવસથી આજીવન નિયમિત આવકની ગેરંટી આપે છે.
દેશના નાણાકીય બજારમાં વરિષ્ઠ નાગરિકો અને ભવિષ્યની સુરક્ષા ઈચ્છતા યુવાનો માટે રોકાણનો એક શાનદાર વિકલ્પ ચર્ચાના કેન્દ્રમાં છે. એલઆઈસીની સરલ પેન્શન યોજના (Plan No. 862) એ એક નોન-લિંક્ડ, સિંગલ પ્રીમિયમ એન્યુઇટી પ્લાન છે. આનો સાદો અર્થ એ થાય છે કે ગ્રાહકે આ પોલિસી ખરીદતી વખતે વારંવાર અથવા દર વર્ષે પ્રીમિયમ ભરવાનું હોતું નથી, માત્ર એક જ વાર મોટી રકમનું રોકાણ કરવાનું રહે છે. આ રોકાણના બદલામાં ગ્રાહકને તેની પસંદગી મુજબ દર મહિને, દર ત્રણ મહિને, છ મહિને અથવા વર્ષે એકવાર ફિક્સ આવક મળવાનું શરૂ થઈ જાય છે.
એકવાર નક્કી થયા પછી પેન્શન ક્યારેય ઘટશે નહીં
આ યોજનાની સૌથી મોટી અને આકર્ષક ખાસિયત એ છે કે બજારના વ્યાજ દરો ભલે ગમે તેટલા ઘટી જાય, પરંતુ તમે પોલિસી લેતી વખતે જે પેન્શન ફિક્સ કરાવ્યું હશે, તે રકમ તમારા સમગ્ર જીવન દરમિયાન એકસમાન રહેશે. તેમાં સરકાર કે બેંક ક્યારેય કોઈ ઘટાડો કરી શકશે નહીં. જે લોકો નોકરીમાંથી નિવૃત્ત થયા છે અને વ્યાજની આવક પર નિર્ભર રહેવા માંગે છે, તેમના માટે આ સ્કીમ બેંક ફિક્સ્ડ ડિપોઝિટ (FD) કરતાં વધુ સારી છે, કારણ કે એફડીના વ્યાજ દરો સમય સાથે બદલાતા રહે છે, જ્યારે અહીંયા વ્યાજ આજીવન લોક થઈ જાય છે.
પતિ-પત્ની બંને માટે સુરક્ષા અને ૪૦ થી ૮૦ વર્ષની ઉંમરની મર્યાદા
એલઆઈસી આ યોજનામાં બે પ્રકારના વિકલ્પો આપે છે. પ્રથમ વિકલ્પ ‘સિંગલ લાઈફ’ નો છે, જેમાં પોલિસી લેનાર વ્યક્તિ જીવે ત્યાં સુધી તેને પેન્શન મળે છે અને તેના અવસાન બાદ રોકાણ કરેલી મૂળ રકમ (Purchase Price) તેના નોમિની અથવા સંતાનોને વ્યાજ વગર પૂરેપૂરી પરત કરી દેવામાં આવે છે. બીજો વિકલ્પ ‘જોઈન્ટ લાઈફ’ નો છે, જેમાં પતિને જીવનભર પેન્શન મળે છે અને જો પતિનું અવસાન થાય તો પત્નીને પણ તેટલું જ પેન્શન આજીવન મળતું રહે છે. બંનેના અવસાન બાદ જ આખી મૂળ રકમ પરિવારના નોમિનીને વારસામાં સોંપી દેવામાં આવે છે. આ પોલિસી ખરીદવા માટે લઘુત્તમ ઉંમર ૪૦ વર્ષ અને મહત્તમ ઉંમર ૮૦ વર્ષ નક્કી કરવામાં આવી છે.
લોન અને સરેન્ડરની અદભુત સગવડ
ઘણીવાર રોકાણકારોને એવો ડર હોય છે કે જો અમે એકસાથે મોટી રકમ ફસાવી દઈશું અને ભવિષ્યમાં કોઈ મેડિકલ ઈમરજન્સી કે ગંભીર બીમારી આવશે, તો પૈસા ક્યાંથી લાવીશું? પરંતુ સરલ પેન્શન યોજનામાં આ ચિંતાનો પણ ઈલાજ છે. પોલિસી શરૂ થયાના માત્ર ૬ મહિના પછી ગ્રાહકને આ યોજના પર ખૂબ જ વ્યાજબી દરે બેંક લોન મળી શકે છે. આ ઉપરાંત, જો પરિવાર પર કોઈ મોટી આફત આવી પડે, તો ગ્રાહક આ પોલિસીને સરેન્ડર કરીને પોતાના રોકાણ કરેલા પૈસા પાછા પણ ખેંચી શકે છે.
₹૨૧,૮૭૧ માસિક પેન્શનનું લાઈવ ગણિત
આ યોજનામાં રોકાણ કરવાની કોઈ મહત્તમ મર્યાદા નથી, તમે તમારી આર્થિક સક્ષમતા મુજબ ગમે તેટલું મોટું રોકાણ કરી શકો છો, જોકે ઓછામાં ઓછું ₹૧૨,૦૦૦ નું વાર્ષિક પેન્શન ખરીદવું ફરજિયાત છે. એલઆઈસીના સત્તાવાર કેલ્ક્યુલેટરના ડેટા અનુસાર, જો ૪૦ વર્ષની ઉંમર ધરાવતી કોઈ વ્યક્તિ આ યોજનામાં એકસાથે ₹૪૦ લાખનું રોકાણ કરે છે, તો તેને વાર્ષિક અંદાજે ₹૨,૬૨,૦૦૦ નું ગેરંટીડ પેન્શન મળે છે. જો આ રકમને ૧૨ મહિનામાં વહેંચવામાં આવે, તો ગ્રાહકને દર મહિને આશરે ₹૨૧,૮૭૧ ની નિયમિત કમાણી ઘર બેઠા બેંક ખાતામાં મળતી રહેશે. બુઢાપા લાકડી સમાન આ યોજના નિવૃત્ત લોકો માટે આત્મનિર્ભરતાનું એક મોટું માધ્યમ બની રહી છે. જોકે, રોકાણ કરતાં પહેલાં તમામ નિયમો અને શરતો ધ્યાનથી વાંચી લેવા હિતાવહ છે.
