માત્ર ટેક્સ બચાવવાના ઈરાદે ન લેશો ટર્મ ઈન્શ્યોરન્સ, આ વાતોનું રાખો ધ્યાન

આખું વર્ષ નિશ્ચિંત રહીને છેલ્લે ટેક્સ બચાવવા માટે રોકાણમાં ઉતાવળ કરવાનું ભારે પડી શકે છે. ઉતાવળમાં લોકો પોતાની જરૂરિયાતનું યોગ્ય આંકલન નથી કરી શકતા અને ખોટી જગ્યાએ રૂપિયા રોકી દે છે. એવી જ રીતે ટર્મ ઈન્શ્યોરન્સને લઈને પણ ભૂલ થઈ જાય ચે. આવો જાણીએ કે ટર્મ ઈન્શ્યોરન્સ લેતી વખતે કઈ મહત્વપૂર્ણ વાતોનું ધ્યાન રાખવું જોઈએ

ટર્મ ઈન્શ્યોરન્સ પ્લાનના પ્રીમિયર પેમેન્ટ પર ઈન્કમ ટેક્સ એક્ટ 1961ના સેક્શન 80સી અંતર્ગત ટેક્સ છૂટ મળે છે. તમે પોતે, જીવનસાથી અને બાળકો માટે 1.5 લાખ રૂપિયા સુધીના પ્રીમિયમ પર દર વર્ષે ટેક્સ ડિડક્શન મેળવી શકાય છે. પરંતુ, ઈન્શ્યોરન્સ પ્લાન લેતી વખતે માત્ર ટેક્સ ડિડક્શનનું ધ્યાન ન રાખવું જોઈએ. ટર્મ ઈન્શ્યોરન્સ પ્લાન એ વિષમ પરિસ્થિતિ માટે લેવામાં આવે છે, જ્યારે પ્લાન લેનારાનું મોત થઈ જાય. ટર્મ ઈન્શ્યોરન્સ પ્લાન લીધેલો હોય તો પરિવારમાં આર્થિક સંકટ ઊભું નથી થતું. તેનું મહત્વ એ વાતથી સમજી શકાય છે કે ફાઈનાન્શિયલ પ્લાનર્સ પણ લાંબા ગાળાના લક્ષ્યો માટે રોકાણ કરતા પહેલા ટર્મ પ્લાન લેવાની સલાહ આપે છે.

ટર્મ પ્લાનને લઈને એક ખોટી ધારણા ઊભી થઈ ગઈ છે કે એ તો પરિણીત લોકો માટે છે. હકીકતમાં, લાઈફ ઈન્શ્યોરન્સ એ બધા લોકો માટે છે, જેના પર એક પણ વ્યક્તિ આશ્રિત છે. એટલે જે પરિણીત નથી તેમના પર માતા-પિતા આશ્રિત છે, તેમણે પણ પૂરતું કવર લેવું જરૂરી છે. તમારે બેઝિક ઈન્શ્યોરન્સ અમાઉન્ટ ઉપરાંત જવાબદારી વધવાને પગલે કવર એડ કરતા રહેવું જોઈએ. જ્યારે પરિવારમાં કોઈ નવા સભ્યનું આગમન થાય કે વચ્ચે મોટી લોન લેવી પડે તો પૂરતું વધારાનું કવર લેવું જોઈએ.

ટર્મ ઈન્શ્યોરન્સ પ્લાન લેતા પહેલા એ સુનિશ્વિત કરી લો કે તમારે કેટલાના ટર્મ પ્લાનની જરૂર છે. યોગ્ય આંકડા માટે ઈન્શ્યોરન્સ કંપનીની વેબસાઈટ કે ઈન્ટરનેટ પર ઉપલબ્ધ અન્ય ટૂલ્સની મદદ લેવી જોઈએ. મોટાભાગના ટૂલ્સ પ્લાન લેનારની આવક પર ફોકસ કરે છે, એટલે તેમના સૂચનો અલગ-અલગ હોઈ શકે છે, પરંતુ તમારી વાર્ષિક આવકની ઓછામાં ઓછા 10 ગણી રકમનું લાઈફ કવર લેવું જ જોઈએ.

આમ તો એ ટર્મ પ્લાન પૂરતો હોય છે, પરંતુ જીવનભર તમારી વીમાની જરૂરિયાત એક જેવી નથી રહેતી. લગ્ન કરવા અને બાળકો થવા તેમજ લોન લીધા બાદ વીમા કવરની જરૂરિયાત વધી જાય છે. પરંતુ, જ્યારે બાળકોનો અભ્યાસ પૂરો થઈ જાય, તેમના લગ્ન થઈ જાય તો જરૂરિયાત ઘટી જાય છે. જોકે, કેટલાક લોકો ભવિષ્યની જવાબદારીઓનો અંદાજ નથી લગાવી શકતા. એવામાં કવરની કુલ રકમને એક કે વધુ પોલિસીઝમાં વહેંચી દેવી જોઈએ. બાદમાં જવાબદારી પૂરી થવા પર કોઈ એક પોલિસીનું પ્રીમિયમ બંધ કરી દેવું જોઈએ. જો હોમ લોન જેવા મોટા દેવા માટે અલગથી કવર લેવામાં આવે તો લોન પુરી થતા જ આ કવરના પ્રીમિયમને પણ બંધ કરી શકાય છે. ધ્યાન રહે કે રિટાયરમેન્ટ બાદ પ્લાન લાંબા સમય સુધી ચાલુ ન રહે, કેમકે ત્યારે તમારા પર કોઈ ખાસ જવાબદારી નથી હોતી અને આવક રોકાઈ જાય છે. સ્પષ્ટતા માટે કોઈ નવો પ્લાન લેતા સમયે કંપનીને જૂના પ્લાન વિશે જણાવી દેવું જોઈએ.

કોઈપણ લાઈફ ઈન્શ્યોરન્સ પોલિસીમાં વૈકલ્પિક વધારાની સુવિધાઓને રાઈડર્સ કહેવામાં આવે છે. તે પ્રાઈમરી પોલિસીમાં હોઈ પણ ખરા અને ન પણ હોય. જે રીતના રાઈડર લેવામાં આવે છે, એ પ્રકારના સમયે તે કામ આવે છે. કોઈ ખાસ સંભવિત પરિસ્થિતિ માટે રાઈડર લેવા પર એ પરિસ્થિતિમાં તમને નિશ્વિત રકમ મળી જાય છે. તે ઈન્શ્યોરન્સની રકમ ઉપરાંતની હોય છે. કેટલાક ખાસ પ્રકારના રાઈડર્સ છે- અકસ્માતમાં મૃત્યુનો લાભ, અકસ્માતમાં અપંગતાનો લાભ, પ્રીમિયમ નહીં ભરવાની છૂટ, અકસ્માતમાં અપંગતા પર નિયમિત આવકનો લાભ, ગંભીર બીમારીમાં નાણાંકીય લાભ વગેરે સામેલ છે. રાઈડર એડ કરી લાઈફ ઈન્શ્યોરન્સ પોલિસીને તમારી સગવડ મુજબની કરી શકાય છે. જે લોકો એક પોલિસીમાં બધા કવર ઈચ્છે છે કે જે એક જ ઈન્શ્યોરન્સ કંપનીમાંથી બધી જરૂરિયાતો પૂરી કરવા ઈચ્છે છે.

પોલિસી લીધા પછી અકસ્માતને કારણે અપંગતા આવી જાય તો કમાવાની ક્ષમતા ઘટી જશે. ત્યારે પ્રીમિયમ ન ભરી શકવાની સ્થિતિમાં પ્લાનને ઝટકો લાગશે અને પોલિસી લેવાનો હેતુ પૂરો નહીં થાય. પોલિસીના ગાળામાં જ સારવાર સંબંધી ખર્ચો પણ ઉઠાવવો પડી શકે છે. ત્યારે શક્ય છે કે બેઝ પોલિસી સાથે છેડછાડની મંજૂરી ન મળે. ત્યારે શું થશે કે જ્યારે કોઈ વ્યક્તિ થોડા વધુ રૂપિયા આપી વર્તમાન પ્લાનનું કવરેજ વધારવા ઈચ્છે. અહીં જ કોઈ ઈન્શ્યોરન્સ પ્લાનમાં રાઈડર્સનું મહત્વ વધી જાય છે.

આગામી મહત્વનું કામ સમયમર્યાદા નક્કી કરવાનું છે. કેટલીક ઈન્શ્યોરન્સ કંપનીઓ 35થી 40 વર્ષ સુધીનો ટર્મ પ્લાન આપે છે. જેટલી મોટો ગાળો હશે, એટલું જ વધુ પ્રીમિયમ હશે. પરંતુ, તમારી જવાબદારી જલદી પૂરી થઈ રહી હોય અને રિટાયરમેન્ટ સુધી તમારે કોઈ મોટી જવાબદારી નથી ઉઠાવવાની તો લાંબા ગાળાની પોલિસી લેવી યોગ્ય નથી.

ઈન્શ્યોરન્સ કંપનીઓ હવે સામાન્ય ટર્મ ઈન્શ્યોરન્સ પોલિસી ઉપરાંત એવા ટર્મ પ્લાન ઓફર કરવા લાગી છે, જેમાં સમયની સાથે-સાથે રૂપિયા વધતા કે ઘટતા રહે છે કે પછી કેટલાક અન્ય વિકલ્પ હોય ચે. જો તમે દર પાંચ વર્ષમાં તમારી જવાબદારીનું આંકલન કરી યોગ્ય પગલું નથી ઉઠાવી શકતા તો તમારા માટે સામાન્ય ટર્મ ઈન્શ્યોરન્સ પ્લાન જ યોગ્ય છે.

તમે ઈન્શ્યોરન્સ એજન્ટ ઉપરાંત સીધા ઈન્શ્યોરન્સ કંપનીની વેબસાઈટ પર જઈને ટર્મ પ્લાન લઈ શકો છો. તમે પોલિસીબજાર અને કવરફોક્સ જેવી પોલિસી એગ્રિગ્રેટર વેબસાઈટો પરથી પણ પ્લાન લઈ શકો છો. ઓનલાઈન પ્લાન લેવાના બે ફાયદા છે. પહેલો એક જ ઈન્શ્યોરન્સ કંપનીનો ઓનલાઈન પ્લાન ઓફલાઈન વર્ઝન કરતા 25 ટકા સસ્તો પડે છે. બીજો- વેબસાઈટો પર પોલિસીની કિંમતો અને ઉપલબ્ધતાઓની સરખામણી વધુ સરળ હોય છે. જોકે, ઓનલાઈન પ્લન લેતા સમયે એ યાદ રહે કે કેટલીક મુશ્કેલીઓ થવા પર સીધી કંપની સાથે વાત કરવી પડશે, કેમકે કોઈ મધ્યસ્થ નથી.

બધી લાઈફ ઈન્શ્યોરન્સ કંપનીઓ ટર્મ પ્લાન્સ પણ આપે છે. ટર્મ પ્લાનમાં કોઈ મેચ્યોરિટી પીરિયડ કે સરેન્ડર વેલ્યુ નથી હોતી, એટલે તમારે એ કંપનીને શોધવી જોઈએ જે ખાસ રકમના પ્લાન માટે સૌથી ઓછું પ્રીમિયમ લેતી હોય. ઈન્શ્યોરન્સ માટે કંપની સાથે લાંબા ગાળાનો સંબંધ રાખવાનો છે, એટલે માત્ર ક્લેમ સેટલમેન્ટ રેશિયોના આધાર પર કોઈ કંપની પર વધુ વિશ્વાસ ન કરી લો, કેમકે તે દર વર્ષે બદલાતો રહે છે. જો તમને કોઈ કંપની પર પૂરો વિશ્વાસ નથી તો તેનો પ્લાન ન લો.

ઈન્શ્યોરન્સ એજન્ટને ક્યારેય ફોર્મ ભરવા ન આપો, જાતે જ ભરો. ફોર્મ જાતે ભરશો તો તમે એ ખબર પડશે કે ઈન્શ્યોરન્સ કંપની તમને કવર આપતા પહેલા તમારા વિશે શું-શું જાણવા માગે છે. તમે ફોર્મમાં રહેલી બીમારીઓ, ચાલી રહેલી સારવાર, ફેમિલી હિસ્ટ્રી અને નશાની આદત વગેરે વિશે જાણકારી ચોક્કસ આપો.

ફોર્મ ભરતી વખતે નોમિનીનું નામ આપવાનું ન ભૂલશો. સાથે જ, તમારા નોમિનીને જાણ હોવી જોઈએ કે તમે કેટલાનો ટર્મ પ્લાન લઈ રહ્યા છો અને સંબંધિત દસ્તાવેજ ક્યાં રાખ્યા છે. ઈન્શ્યોરન્સ પોલિસી લેતી વખતે મેરિડ વીમેન્સ પ્રોપર્ટી એક્ટ, 1874 (એમડબલ્યુપી)નો પણ સ્વીકાર કરો.

પ્રોટેક્શન પ્લાન લેતી વખતે ગંભીર બીમારીઓ કે કેન્સર જેવી કોઈ ખાસ બીમારીનું કવર ચોક્કસ લેવું જોઈએ. માત્ર ટેક્સ બચાવવા માટે લાઈફ ઈન્શ્યોરન્સ લેવું નાણાંકીય રીતે ફાયદાકારક હોઈ શકે છે. લાંબા ગાળાના હેતુ માટે પબ્લિક પ્રોવિડન્ડ ફંડ (પીપીએફ) કે ઈક્વિટી લિંક્ડ સેવિંગ્સ સ્કીમ (ઈએલએસએસ) જેવી યોજનાઓમાં રોકાણ કરો. સાથે જ, ટર્મ પ્લાન લેતી વખતે નિયમો અને શરતોને બરાબર સમજી લેવી જોઈએ.

Share

Satyaday, Gujarat’s largest language media group, brings to you the most comprehensive Gujarati News Website. The app covers Latest Gujarati news from all around the world giving you a complete up-to-date coverage on news anytime and anywhere.

WP Twitter Auto Publish Powered By : XYZScripts.com