મતદાર યાદીમાં મોટા ફેરફારો, BLOsની ઘર–ઘર તપાસથી ઉજાગર થયા અનિયમિત રેકોર્ડ્સ
ગુજરાતમાં ચાલી રહેલા Special Intensive Revision 2025 અભિયાન હેઠળ મતદાર યાદીઓની ઘનિષ્ઠ ચકાસણીમાં અનેક અનિયમિતતાઓ ખુલ્લી પડી છે. તાજેતરના આંકડા મુજબ રાજ્યમાં આશરે 1.15 લાખ ડુપ્લિકેટ નામો નોંધાયા હોવાનું સ્પષ્ટ થયું છે, જ્યારે 9 લાખથી વધુ અવસાન પામેલા મતદારોના નામોને યાદીમાંથી દૂર કરવાની પ્રક્રિયા ચાલી રહી છે. સાથે સાથે 9 લાખથી વધારે મતદારો અન્યત્ર કાયમી વસવાટ કરવા જતા રહ્યા છે તે જાણવા મળ્યું છે. આ અભિયાનનો હેતુ આગામી ચૂંટણી પહેલાં યાદીને સંપૂર્ણ, વિશ્વસનીય અને સ્વચ્છ બનાવવાનો છે.
BLOs દ્વારા ઘર-ઘર ચકાસણી, 4 ડિસેમ્બર સુધી પ્રક્રિયા ચાલુ
મતદાર યાદી ચકાસણી 4 નવેમ્બરથી શરૂ થઈ છે અને 4 ડિસેમ્બર સુધી રાજ્યભરમાં BLOs દ્વારા દરવાજે-દરવાજે જઈ માહિતી મેળવી અપડેટ કરવામાં આવી રહી છે. અત્યાર સુધી 100 ટકા ગણતરી ફોર્મોનું વિતરણ પૂર્ણ થયું છે, જ્યારે 70 ટકા દસ્તાવેજોનું ડિજિટલ રૂપાંતરણ પણ સફળતાપૂર્વક પૂર્ણ થયું હોવાનું જણાવાય છે. આ દરમિયાન આશરે 1 લાખ લોકો પોતાના નોંધાયેલા સરનામે હાજર ન હોવાનું સામે આવ્યું છે, જેના આધારે તેમનાં નામો દૂર કરવાની પ્રક્રિયા હાથ ધરાઈ રહી છે.
ડુપ્લિકેટ અને મૃત્યુ પામેલા મતદારો દૂર થતાં યાદી વધુ પારદર્શક બનશે
ચૂંટણી પંચના અધિકારીઓનું માનવું છે કે યાદીમાંથી ડુપ્લિકેટ, અવસાન પામેલા અને સ્થળાંતરિત મતદારોનું નામ કાઢી નખવાથી યાદીની ગુણવત્તામાં વધારો થશે. આ પગલું ભવિષ્યની ચૂંટણીમાં ગેરરીતિઓ અટકાવવા માટે મહત્વપૂર્ણ સાબિત થશે. કામચલાઉ યાદી 9 ડિસેમ્બરે બહાર પાડવામાં આવશે અને ત્યારબાદ 8 જાન્યુઆરી સુધી દાવા–અપેક્ષાઓ સ્વીકારવામાં આવશે. છેલ્લી સુધારેલી યાદી 7 ફેબ્રુઆરી 2026ના રોજ પ્રકાશિત થશે.
આગામી તબક્કામાં નવા આંકડા બહાર આવવાની શક્યતા
ગુજરાત સાથે દેશના 12 રાજ્યોમાં આ ગણતરી અભિયાન ચાલું છે, જેમાં ગુજરાતના 5.1 કરોડથી વધુ મતદારોનાં રેકોર્ડ્સનું પુનરાવલોકન કરવામાં આવી રહ્યું છે. BLOs દ્વારા પહોંચાડવામાં આવેલા ફોર્મ દ્વારા મતદારોને પોતાની વિગત અપડેટ કરવાની સવલત આપવામાં આવી છે, જેથી આગળની ચૂંટણી વ્યવસ્થા વધુ ચોક્કસ બની રહે. આગામી તબક્કામાં વધુ ફેરફારો અને નવા આંકડા જાહેર થવાની શક્યતા વ્યક્ત કરવામાં આવી છે.
