વડાપ્રધાનના વિઝનથી શિક્ષણ ક્ષેત્રમાં ક્રાંતિ, ગિફ્ટ સિટીમાં આંતરરાષ્ટ્રીય યુનિવર્સિટીઓનું મજબૂત સ્થાન
મુખ્યમંત્રી ભૂપેન્દ્ર પટેલે ગાંધીનગરના ગિફ્ટ સિટી ખાતે ઓસ્ટ્રેલિયન ડિકીન યુનિવર્સિટીના પ્રથમ ગ્રેજ્યુએટ બેચના દીક્ષાંત સમારોહમાં હાજરી આપી હતી. આ પ્રસંગે તેમણે જણાવ્યું હતું કે, વડાપ્રધાન નરેન્દ્ર મોદીના નેતૃત્વમાં દેશના શિક્ષણ ક્ષેત્રમાં મોટું પરિવર્તન આવ્યું છે. ભારતમાં આંતરરાષ્ટ્રીય શાખા તરીકે શરૂ થયેલ આ કેમ્પસ માત્ર ડિગ્રી આપવાનો ઉત્સવ નથી, પરંતુ ભારત વૈશ્વિક સ્તરે ‘નોલેજ સેન્ટર’ તરીકે ઉભરી રહ્યું છે તેની સાક્ષી પૂરે છે. આ સમારોહ ભારત અને ઓસ્ટ્રેલિયા વચ્ચે મજબૂત બનતી ભાગીદારીનું પણ પ્રતિક છે.
ગુજરાત ગ્લોબલ ઇકોનોમિક અને એજ્યુકેશનલ હબ બન્યું
મુખ્યમંત્રીશ્રીએ ગૌરવભેર જણાવ્યું કે, ગુજરાત હવે પરંપરાગત વેપારથી આગળ વધીને વૈશ્વિક આર્થિક અને જ્ઞાનનું કેન્દ્ર બની રહ્યું છે. વડાપ્રધાનશ્રીના વિઝનને કારણે ગુજરાતના યુવાનોને ઘર આંગણે વિશ્વસ્તરીય શિક્ષણ મળી રહ્યું છે. રાજ્યમાં ફોરેન્સિક સાયન્સિસ, એનર્જી, મેરીટાઈમ અને રક્ષાશક્તિ જેવી સેક્ટર સ્પેસિફિક યુનિવર્સિટીઓ કાર્યરત થઈ છે. ગિફ્ટ સિટીમાં ફાઈનાન્સિયલ સર્વિસીસ અને ટેકનોલોજી સાથે હવે ઉચ્ચ શિક્ષણનું પણ સુંદર સંકલન થયું છે, જ્યાં હાલમાં ૪ જેટલી વિદેશી યુનિવર્સિટીઓ કાર્યરત થઈ છે.
દેશમાં ઉચ્ચ શિક્ષણની સંસ્થાઓમાં થયેલો અભૂતપૂર્વ વધારો
છેલ્લા એક દાયકામાં દેશમાં શૈક્ષણિક સંસ્થાઓની સંખ્યામાં મોટો ઉછાળો આવ્યો છે. વર્ષ ૨૦૧૪માં દેશમાં ૧૬ IIT હતી જે વધીને ૨૩ થઈ છે, જ્યારે IIMની સંખ્યા ૧૩ થી વધીને ૨૧ અને એઈમ્સ (AIIMS) ની સંખ્યા ૭ થી વધીને ૨૦ થઈ છે. નવી રાષ્ટ્રીય શિક્ષણ નીતિ ૨૦૨૦ દ્વારા ભારતીય શિક્ષણને વૈશ્વિક ધોરણો સાથે જોડવામાં આવ્યું છે. ‘સ્ટડી ઇન ઇન્ડિયા’ અને ‘મેક ઇન ઇન્ડિયા’ જેવા પ્રકલ્પો દ્વારા શિક્ષણને સીધું ઉદ્યોગો સાથે જોડીને યુવાઓને આત્મનિર્ભર બનવાની તક પૂરી પાડવામાં આવી છે.
ગાંધીનગર એજ્યુકેશન હબ તરીકે વૈશ્વિક ફલક પર
ગાંધીનગર આજે NIFT, NID, IIT-ગાંધીનગર અને નાઈપર જેવી પ્રતિષ્ઠિત સંસ્થાઓને કારણે એજ્યુકેશનલ હબ તરીકે ઓળખાય છે. મુખ્યમંત્રીશ્રીએ ડિગ્રી મેળવનાર યુવાનોને અભિનંદન આપતા અનુરોધ કર્યો હતો કે તેઓ પોતાના જ્ઞાન અને કૌશલ્યનો ઉપયોગ ‘રાષ્ટ્ર પ્રથમ’ના ભાવ સાથે કરે. ગ્લોબલ ઇનોવેશન ઇન્ડેક્સમાં ભારતનું સુધરતું પ્રદર્શન એ બાબતનો પુરાવો છે કે દેશ હવે રિસર્ચ અને ઇનોવેશન ક્ષેત્રે નવી ઊંચાઈઓ સર કરી રહ્યો છે. આ અંતરરાષ્ટ્રીય શૈક્ષણિક વાતાવરણ ભારતને ‘વર્લ્ડ એજ્યુકેશનલ હબ’ બનાવવા માટે મજબૂત પાયો રચી રહ્યું છે.
