શેફ કુણાલ કપૂરની ખાસ રેસીપી: ઘરે બનાવો માત્ર 2 વસ્તુઓમાંથી એપલ-સિનમન જામ, તે પણ માઈક્રોવેવમાં!
નાનપણમાં નાસ્તામાં ગરમ ટોસ્ટ પર ફ્રુટ જામ લગાવીને ખાવાની મજા જ કંઈક અલગ હતી. બજારમાં મળતા સ્ટ્રોબેરી કે મિક્સ્ડ ફ્રુટ જામ સ્વાદિષ્ટ તો લાગે છે, પરંતુ તેમાં ખાંડ, પ્રિઝર્વેટિવ્સ અને આર્ટિફિશિયલ કલરનું પ્રમાણ ખૂબ વધારે હોય છે. જો તમે હેલ્ધી ખાવાના શોખીન હોવ, તો પ્રખ્યાત શેફ કુણાલ કપૂરે એક એવી રેસીપી શેર કરી છે જે કુદરતી છે અને બનાવવામાં પણ સાવ સરળ છે.
શેફ કુણાલ કપૂરે તાજેતરમાં જ તેમના ઇન્સ્ટાગ્રામ પર ‘એપલ-સિનમન (સફરજન અને તજ) જામ’ની રેસીપી શેર કરી છે. આ જામની ખાસિયત એ છે કે તેમાં ખાંડનો બિલકુલ ઉપયોગ કરવામાં આવ્યો નથી અને તે માત્ર બે જ વસ્તુઓથી બની જાય છે.
જરૂરી સામગ્રી
- સફરજન: 5 નંગ (થોડા ખાટા હોય તેવા સફરજન વધુ સારા રહેશે)
- તજ પાવડર: 2 નાની ચમચી (તાજો દળેલો)
બનાવવાની રીત
1. સફરજન તૈયાર કરો: સૌ પ્રથમ સફરજનને છોલી લો. તેની છાલ કાઢ્યા બાદ તેને વચ્ચેથી કાપી લો અને અંદરના બીજ તેમજ કઠણ ભાગ (કોર) દૂર કરી દો. હવે સફરજનના નાના ટુકડા કરી લો.
2. માઈક્રોવેવ માટે તૈયાર કરો: સફરજનના ટુકડાને એક માઈક્રોવેવ-સેફ પ્લેટમાં સરખી રીતે ફેલાવી દો. તેના પર તાજો દળેલો તજ પાવડર છાંટો. હવે પ્લેટને ફૂડ-ગ્રેડ કિચન રેપ (ક્લિંગ ફિલ્મ) થી બરાબર ઢાંકી દો.
3. કુકિંગ પ્રોસેસ: પ્લેટને માઈક્રોવેવમાં મૂકો અને હાઈ પાવર અથવા રીહીટ સેટિંગ પર 3 મિનિટ સુધી થવા દો. જો સફરજન હજુ કઠણ લાગે, તો તમે તમારા માઈક્રોવેવ મુજબ બીજા 1-2 મિનિટ વધારી શકો છો.
4. આરામ આપો અને બ્લેન્ડ કરો: માઈક્રોવેવમાંથી કાઢ્યા બાદ તેને 5 મિનિટ સુધી એમ જ રહેવા દો. આનાથી સફરજન વધુ નરમ બનશે અને સ્વાદ નિખરશે. ત્યારબાદ પ્લાસ્ટિક રેપ હટાવી સફરજનને મિક્સર જારમાં લો. તેને તમારી પસંદ મુજબ એકદમ સ્મૂધ અથવા થોડું અધકચરું પીસી લો.
View this post on Instagram
પીરસવાની રીત અને સંગ્રહ
તમારો તાજો એપલ-સિનમન જામ તૈયાર છે! તેને ગરમ ટોસ્ટ, પરાઠા અથવા બ્રેકફાસ્ટ બાઉલ સાથે સર્વ કરો. આ જામમાં કોઈ પ્રિઝર્વેટિવ નથી, તેથી તેને કાચની બરણીમાં ભરી રેફ્રિજરેટરમાં રાખો અને 1 થી 2 દિવસમાં જ વાપરી નાખવો જેથી તેનો સ્વાદ અને તાજગી જળવાઈ રહે.
ખાસ નોંધ
આ જામ બજારના જામ જેવો ઘટ્ટ કે લાલચટક નહીં દેખાય, કારણ કે તેમાં પેક્ટિન, કલર કે ખાંડ નથી. આમાં તમને સફરજનનો કુદરતી સ્વાદ અને તજની સુગંધ મળશે, જે સ્વાસ્થ્ય માટે ઉત્તમ છે. ડાયાબિટીસ ધરાવતા લોકો કે જેઓ વજન ઉતારવા માંગે છે તેમના માટે આ એક બેસ્ટ વિકલ્પ છે.
