મોંઘવારીનો ડામ: ગેસ સિલિન્ડર મોંઘો અને ATM ટ્રાન્ઝેક્શન ફેલ થશે તો ભરવો પડશે દંડ, જુઓ આજના લેટેસ્ટ અપડેટ્સ
દર મહિનાની જેમ, આ વખતે પણ પહેલી તારીખથી સામાન્ય માણસના ખિસ્સા પર અસર કરતા અનેક નિયમો બદલાઈ ગયા છે. 1 મે 2026 થી દેશમાં કોમર્શિયલ ગેસ સિલિન્ડરના ભાવમાં વધારાની સાથે ગેસ ડિલિવરી અને બેંકિંગ ક્ષેત્રે પણ મહત્વના ફેરફારો અમલી બન્યા છે.
ગેસ સિલિન્ડરના ભાવમાં ભડકો: કોમર્શિયલ ગેસ મોંઘો થયો
મે મહિનાની શરૂઆતમાં જ મોંઘવારીનો ડામ લાગ્યો છે. સરકારી તેલ કંપનીઓએ 19 કિલોના કોમર્શિયલ LPG સિલિન્ડરની કિંમતમાં આશરે 993 રૂપિયાનો તોતિંગ વધારો ઝીંક્યો છે. આ વધારાની સીધી અસર હોટલ, રેસ્ટોરન્ટ અને ખાણી-પીણીની લારીઓ પર જોવા મળશે, જેના કારણે બહાર જમવાનું મોંઘું થઈ શકે છે. જોકે, રાહતની વાત એ છે કે ઘરેલુ ઉપયોગમાં આવતા 14.2 કિલોના સિલિન્ડરના ભાવમાં હાલ કોઈ ફેરફાર કરવામાં આવ્યો નથી.
ગેસ ડિલિવરી માટે હવે OTP અનિવાર્ય
ગેસ સિલિન્ડર મેળવવા માટેની પ્રક્રિયા હવે વધુ કડક અને સુરક્ષિત બનાવવામાં આવી છે. આજથી, જ્યારે પણ ડિલિવરી બોય તમારા ઘરે સિલિન્ડર આપવા આવશે, ત્યારે તમારા રજિસ્ટર્ડ મોબાઈલ નંબર પર એક OTP (વન ટાઈમ પાસવર્ડ) આવશે. જ્યાં સુધી તમે આ OTP ડિલિવરી બોયને નહીં આપો, ત્યાં સુધી સિલિન્ડરની ડિલિવરી લેવામાં મુશ્કેલી પડી શકે છે. આ નિયમ લાવવાનો મુખ્ય હેતુ ગેસની ચોરી અટકાવવાનો અને સિલિન્ડર સાચા ગ્રાહક સુધી પહોંચે તે સુનિશ્ચિત કરવાનો છે.
ATM ના નિયમો બન્યા કડક: ટ્રાન્ઝેક્શન ફેલ થશે તો દંડ
ATM માંથી પૈસા ઉપાડવા હવે મોંઘા પડી શકે છે. નવા નિયમો મુજબ, હવે ફ્રી ટ્રાન્ઝેક્શનની મર્યાદા (જેમ કે મહિનામાં 5 વખત) પૂરી થયા પછી, દરેક ઉપાડ પર 23 રૂપિયા જેટલો ચાર્જ ચૂકવવો પડશે. સૌથી મહત્વની વાત એ છે કે, જો તમારા ખાતામાં પૂરતું બેલેન્સ ન હોવાને કારણે ATM ટ્રાન્ઝેક્શન ફેલ થાય છે, તો બેંક તમારા પર આશરે 25 રૂપિયાનો દંડ લગાવી શકે છે. તેથી, પૈસા ઉપાડતા પહેલા ખાતાનું બેલેન્સ ચેક કરવું અનિવાર્ય બન્યું છે.
UPI પેમેન્ટમાં સુરક્ષાનું નવું સ્તર
ઓનલાઈન છેતરપિંડી રોકવા માટે UPI પેમેન્ટની સુરક્ષામાં વધારો કરવામાં આવ્યો છે. હવે માત્ર PIN નાખવો પૂરતો નહીં રહે. મોટા ટ્રાન્ઝેક્શન માટે અથવા શંકાસ્પદ પેમેન્ટના કિસ્સામાં સેકન્ડ લેવલ વેરિફિકેશન, જેમ કે બાયોમેટ્રિક (ફિંગરપ્રિન્ટ) અથવા વધારાના ઓથેન્ટિકેશનની જરૂર પડી શકે છે. આ ફેરફારથી ગ્રાહકોના પૈસા ઓનલાઈન લૂંટારાથી સુરક્ષિત રહેશે.
હવાઈ ઈંધણ (ATF) પરની ડ્યુટીમાં ફેરફાર
સરકારે વિદેશમાં મોકલવામાં આવતા હવાઈ ઈંધણ (Jet Fuel) ના નિકાસ પર 33 રૂપિયા પ્રતિ લિટર ડ્યુટી નક્કી કરી છે. જોકે, ડોમેસ્ટિક ફ્લાઈટ્સ (ઘરેલુ ઉડાન) માટે વપરાતા ATF ના ભાવમાં વધારો કરવામાં આવ્યો નથી. આનો અર્થ એ છે કે હાલમાં હવાઈ મુસાફરીના ભાડા સ્થિર રહેવાની શક્યતા છે, જે પ્રવાસીઓ માટે સારા સમાચાર છે.
ઓનલાઈન ગેમિંગ માટે નવા આકરા નિયમો
આજથી ઓનલાઈન ગેમિંગ ઉદ્યોગમાં મોટા ફેરફારો જોવા મળશે. ગેમ્સને હવે ત્રણ મુખ્ય શ્રેણીમાં વહેંચવામાં આવી છે: મની ગેમ્સ, સોશિયલ ગેમ્સ અને ઈ-સ્પોર્ટ્સ. જે ગેમ્સમાં પૈસાનું રોકાણ થાય છે અથવા દાવ લગાવવામાં આવે છે, તેના માટે રજિસ્ટ્રેશન ફરજિયાત છે. સરકાર હવે આવી ગેમ્સ પર કડક દેખરેખ રાખશે જેથી કરીને સટ્ટાબાજી અને છેતરપિંડી અટકાવી શકાય.
ક્રેડિટ કાર્ડના ફાયદામાં ઘટાડો
જો તમે ક્રેડિટ કાર્ડનો વધુ પડતો ઉપયોગ કરો છો, તો આજથી સાવધાન થઈ જજો. ઘણી બેંકોએ ક્રેડિટ કાર્ડ પર મળતા રિવોર્ડ પોઈન્ટ્સ અને અન્ય બેનિફિટ્સમાં કાપ મુક્યો છે. ખાસ કરીને ક્રેડિટ કાર્ડ દ્વારા વીજળીનું બિલ ભરવા અથવા મકાનનું ભાડું ચૂકવવા પર હવે રિવોર્ડ પોઈન્ટ્સ ઓછા મળશે અથવા તો વધારાનો ટ્રાન્ઝેક્શન ચાર્જ ચૂકવવો પડી શકે છે.
