વિદેશમાં કાયમી વસવાટનો શોર્ટકટ! ભાષાની ચિંતા વગર પત્ની/પતિ પણ સાથે રહીને કરી શકશે નોકરી
વિદેશમાં સ્થાયી થવાનું અને ખાસ કરીને યુરોપના કોઈ વિકસિત દેશમાં કારકિર્દી બનાવવાનું સપનું કોનું નથી હોતું? જ્યારે વાત યુરોપના આર્થિક પાવરહાઉસ ગણાતા ‘જર્મની’ની હોય, ત્યારે લોકોમાં ઉત્સાહ બમણો થઈ જાય છે. જો તમારી પાસે જર્મનીની કોઈ કંપનીનો જોબ ઓફર લેટર હોય, તમારી શૈક્ષણિક લાયકાત માન્ય હોય અને તમારો પગાર સરકારના નક્કી કરેલા માપદંડ મુજબ હોય, તો તમારા માટે જર્મનીમાં કાયમી વસવાટ (Permanent Settlement) કરવાનો રસ્તો એકદમ સરળ અને ઝડપી બની શકે છે.
જર્મનીનું ‘EU બ્લુ કાર્ડ’ (EU Blue Card) યુરોપિયન યુનિયન (EU) બહારના દેશોના કુશળ પ્રોફેશનલ્સને ત્યાં રહેવા અને કામ કરવાની સુવર્ણ તક આપે છે. આ કાર્ડ માત્ર તમને જર્મનીના લેબર માર્કેટમાં પ્રવેશ જ નથી અપાવતું, પરંતુ તેનાથી તમે તમારા પરિવારને પણ ખૂબ જ સરળતાથી જર્મની બોલાવી શકો છો. સૌથી મોટી વાત એ છે કે, આ કાર્ડ દ્વારા તમે માત્ર ૨૧ મહિના જેટલા ટૂંકા ગાળામાં જર્મનીમાં પરમેનન્ટ રેસિડેન્સી (PR) મેળવી શકો છો. જો કે, જર્મનીની નાગરિકતા (Citizenship) મેળવવા માટેના નિયમો અલગ છે, પરંતુ આ કાર્ડ તમારા માટે કાયમી વસવાટનો પાયો જરૂર મજબૂત કરે છે.
શું છે આ ‘EU બ્લુ કાર્ડ’?
સરળ શબ્દોમાં કહીએ તો, ‘EU બ્લુ કાર્ડ’ એ બિન-યુરોપિયન દેશોના અત્યંત કુશળ અને લાયક કર્મચારીઓ માટેનું એક અસ્થાયી રેસિડેન્સ પરમિટ (રહેવા માટેની મંજૂરી) છે.
આ કાર્ડ મેળવવા માટે અરજદાર પાસે જર્મનીના કોઈ એમ્પ્લોયર (માલિક) તરફથી ચોક્કસ નોકરીની ઓફર હોવી જરૂરી છે. આ નોકરી ‘ક્વોલિફાઇડ એમ્પ્લોયમેન્ટ’ એટલે કે ઉચ્ચ સ્તરની હોવી જોઈએ અને તે અરજદારના શૈક્ષણિક અથવા વ્યાવસાયિક બેકગ્રાઉન્ડ સાથે સુસંગત હોવી જોઈએ. આ સિવાય, તમારો રોજગાર કરાર (Employment Contract) અથવા જોબ ઓફર ઓછામાં ઓછી ૬ મહિના માટે માન્ય હોવી જોઈએ. સામાન્ય રીતે આ પરમિટ ૪ વર્ષ માટે આપવામાં આવે છે, પરંતુ જો તમારો જોબ કોન્ટ્રેક્ટ ૪ વર્ષથી ઓછો હોય, તો કરારના સમયગાળા ઉપરાંત વધારાના ૩ મહિના ઉમેરીને આ કાર્ડ ઇસ્યુ કરવામાં આવે છે.
કોણ આ કાર્ડ માટે લાયક ગણાય?
આ યોજનાનો લાભ લેવા માટે અરજદાર પાસે નીચેનામાંથી કોઈ એક લાયકાત હોવી જરૂરી છે: ૧. જર્મન યુનિવર્સિટીની ડિગ્રી. ૨. કોઈ વિદેશી યુનિવર્સિટીની ડિગ્રી જે જર્મનીની ડિગ્રી સમકક્ષ માન્યતા ધરાવતી હોય. ૩. ઓછામાં ઓછા ત્રણ વર્ષના અભ્યાસ અથવા તાલીમની જરૂર હોય તેવી માન્ય ઉચ્ચ સ્તરની લાયકાત.
તમે જે નોકરી માટે જઈ રહ્યા છો તે તમારી લાયકાત સાથે મેચ થવી જોઈએ. આ ઉપરાંત, હેલ્થકેર (તબીબી ક્ષેત્ર) જેવા નિયંત્રિત વ્યવસાયોમાં જતા લોકો પાસે જરૂરી પ્રોફેશનલ લાયસન્સ હોવું પણ અનિવાર્ય છે.
IT પ્રોફેશનલ્સ માટે ખાસ છૂટછાટ: માહિતી ટેકનોલોજી (IT) ક્ષેત્રના નિષ્ણાતો માટે આમાં એક મોટી રાહત આપવામાં આવી છે. જો કોઈ આઈટી પ્રોફેશનલ પાસે યુનિવર્સિટીની ઔપચારિક ડિગ્રી ન હોય, તો પણ તેઓ આ કાર્ડ મેળવી શકે છે. આ માટે તેમની પાસે જર્મનીની કંપનીની જોબ ઓફર હોવી જોઈએ અને છેલ્લા ૭ વર્ષમાંથી ઓછામાં ઓછો ૩ વર્ષનો સંબંધિત આઈટી અનુભવ હોવો જોઈએ, જે યુનિવર્સિટી કક્ષાના શિક્ષણ સમાન ગણાતો હોય.
વર્ષ ૨૦26 માટે પગારના નવા માપદંડો (Salary Thresholds)
EU બ્લુ કાર્ડ મેળવવા માટે સરકારે લઘુત્તમ પગારની મર્યાદા નક્કી કરી છે, જે દર વર્ષે બદલાય છે. વર્ષ ૨૦26 માટેના નિયમો નીચે મુજબ છે:
-
સામાન્ય વ્યવસાયો માટે: મોટાભાગની નોકરીઓ માટે અરજદારનો વાર્ષિક ગ્રોસ સેલરી (Gross Annual Salary) ઓછામાં ઓછો €50,700 હોવો જરૂરી છે.
-
શોર્ટેજ ઓક્યુપેશન (અછત ધરાવતા વ્યવસાયો) માટે: જર્મનીમાં જે ક્ષેત્રોમાં કર્મચારીઓની ભારે અછત છે, તેના માટે પગારની મર્યાદા ઘટાડીને €45,934.20 કરવામાં આવી છે (જેના માટે જર્મનીની ફેડરલ એમ્પ્લોયમેન્ટ એજન્સીની મંજૂરી જરૂરી છે).
આ અછત ધરાવતા વ્યવસાયોમાં કોનો સમાવેશ થાય છે?
-
ઇન્ફોર્મેશન ટેકનોલોજી (IT)
-
સાયન્સ, ટેકનોલોજી, એન્જિનિયરિંગ અને મેથેમેટિક્સ (STEM ક્ષેત્રો)
-
મેડિસિન, નર્સિંગ અને મિડવાઇફરી (આરોગ્ય ક્ષેત્ર)
-
શિક્ષણ અને શિક્ષક સબંધી નોકરીઓ
-
આર્કિટેક્ચર અને પ્લાનિંગ
-
પસંદગીના ક્ષેત્રોમાં મેનેજમેન્ટની પોસ્ટ
આ ઓછી સેલરી મર્યાદાનો લાભ એવા યુવા પ્રોફેશનલ્સને પણ મળે છે જેમણે પોતાની ડિગ્રી છેલ્લા ૩ વર્ષમાં જ પૂરી કરી હોય. આ સિવાય, ડિગ્રી વગરના લાયક આઈટી નિષ્ણાતો પણ આ ઓછી પગાર મર્યાદા હેઠળ અરજી કરી શકે છે.
અરજી કરવાની પ્રક્રિયા શું છે?
જો તમે જર્મનીની બહાર (દા.ત. ભારતમાં) રહો છો, તો તમારે જર્મની જતા પહેલા યોગ્ય એમ્પ્લોયમેન્ટ વિઝા માટે અરજી કરવી પડશે. આ અરજી જર્મનીના ઓનલાઈન કન્સ્યુલર સર્વિસ પોર્ટલ દ્વારા અથવા તમારા દેશમાં આવેલી જર્મન એમ્બેસી (દૂતાવાસ) કે કાઉન્સિલેટ દ્વારા કરી શકાય છે.
જર્મની પહોંચ્યા પછી, તમારે ત્યાંની સ્થાનિક ઇમિગ્રેશન ઓફિસ, જેને ‘Ausländerbehörde’ (ફોરેનર્સ ઓફિસ) કહેવાય છે, ત્યાં જઈને રેસિડેન્સ પરમિટની પ્રક્રિયા પૂર્ણ કરવાની રહેશે. અરજી કરતી વખતે સામાન્ય રીતે આ દસ્તાવેજોની જરૂર પડે છે:
-
માન્ય પાસપોર્ટ
-
જર્મન એમ્પ્લોયમેન્ટ કોન્ટ્રેક્ટ અથવા જોબ ઓફર લેટર
-
પગારનો પુરાવો
-
માન્ય શૈક્ષણિક લાયકાતના દસ્તાવેજો
-
હેલ્થ ઇન્સ્યોરન્સ (આરોગ્ય વીમો)ની વિગતો
-
જો વ્યવસાય નિયંત્રિત હોય તો પ્રોફેશનલ અપ્રૂવલ (લાયસન્સ)
વિઝા વગર કોણ પ્રવેશ કરી શકે છે?
ઓસ્ટ્રેલિયા, કેનેડા, ઇઝરાયેલ, જાપાન, ન્યુઝીલેન્ડ, દક્ષિણ કોરિયા, યુનાઇટેડ કિંગડમ (UK) અને યુનાઇટેડ સ્ટેટ્સ (USA) ના નાગરિકોને જર્મની આવવા માટે પહેલાથી વિઝા લેવાની જરૂર નથી. તેઓ સીધા જર્મની આવીને સ્થાનિક ફોરેનર્સ ઓફિસમાં બ્લુ કાર્ડ માટે અરજી કરી શકે છે. જો કે, જ્યાં સુધી તેમનું કાર્ડ ઇસ્યુ ન થાય ત્યાં સુધી તેઓ કામ શરૂ કરી શકતા નથી. આ ઉપરાંત, જેઓ પહેલાથી જ અન્ય કોઈ વિઝા પર જર્મનીમાં કાયદેસર રીતે રહી રહ્યા છે, તેઓ પણ સ્થાનિક કચેરી દ્વારા આમાં કન્વર્ટ કરાવી શકે છે.
માત્ર ૨૧ કે ૨૭ મહિનામાં મેળવો કાયમી વસવાટ (PR)
EU બ્લુ કાર્ડનો સૌથી મોટો ફાયદો એ છે કે તે તમને અન્ય વર્ક પરમિટની સરખામણીએ ખૂબ જ ઝડપથી પરમેનન્ટ રેસિડેન્સી (Settlement Permit) અપાવે છે.
૧. ૨૭ મહિનામાં PR: જો તમે બ્લુ કાર્ડ પર ૨૭ મહિના કામ કર્યું હોય, નિયમિત પેન્શન ફંડ ભર્યું હોય અને તમારી પાસે જર્મન ભાષાનું પ્રાથમિક જ્ઞાન (Basic Knowledge) હોય, તો તમે PR માટે પાત્ર બનો છો.
૨. ૨૧ મહિનામાં PR: જો તમે તમારી જર્મન ભાષાની કુશળતા સુધારીને B1 લેવલનું સર્ટિફિકેટ મેળવી લો છો, તો આ રાહ જોવાનો સમય ઘટીને માત્ર ૨૧ મહિના થઈ જાય છે!
આ માટે આવક સુરક્ષિત હોવી, રહેવા માટે યોગ્ય ઘર હોવું અને જર્મનીની કાનૂની અને સામાજિક વ્યવસ્થાનું મૂળભૂત જ્ઞાન હોવું પણ જરૂરી છે.
