Slack પર સભ્યો ઘટવા લાગ્યા! શું Oracle ની આ નવી ચાલે કર્મચારીઓની ઊંઘ ઉડાવી દીધી?
ઓરેકલમાં કામ કરતા કર્મચારીઓ માટે સપ્ટેમ્બર મહિનાની શરૂઆત ભારે તણાવ અને ચિંતા વચ્ચે થઈ હતી. માર્ચ ૩૧ના રોજ કંપનીએ એક સાથે મોટો ધમાકો કર્યો હતો, જેમાં સવારના બરાબર ૬ વાગ્યે અમેરિકા, ભારત અને કેનેડાના ૧૦,૦૦૦થી વધુ કર્મચારીઓને એકીસાથે નોકરીમાંથી મુક્ત કરવાનો ઈમેલ મોકલી દેવામાં આવ્યો હતો. આ ઘટના પછી કર્મચારીઓ માનતા હતા કે સપ્ટેમ્બરમાં પણ કંઈક આવું જ મોટા પાયે થશે. પરંતુ આ વખતે ઓરેકલે પોતાની વ્યૂહરચના બદલી નાખી છે. સપ્ટેમ્બર ૧ તારીખ આવી અને જતી રહી, પણ માર્ચ જેવો કોઈ સામૂહિક ઈમેલ આવ્યો નહીં. કંપનીએ આ વખતે કોઈ પણ પ્રકારનો મીડિયા હંગામો કે હેડલાઈન્સ બનાવ્યા વિના ખૂબ જ શાંતિથી કર્મચારીઓની છાંટણી કરવાનો રસ્તો અપનાવ્યો છે.
સ્લેક (Slack) કાઉન્ટર પર કર્મચારીઓની નજર
જ્યારે કંપની તરફથી કોઈ સત્તાવાર જાહેરાત કે ઈમેલ ન આવ્યો, ત્યારે કર્મચારીઓએ નોકરી ગુમાવનારાઓની સંખ્યા માપવાનો એક અનોખો અને વિચિત્ર રસ્તો શોધ્યો. કર્મચારીઓ કંપનીના આંતરિક કોમ્યુનિકેશન ટૂલ ‘સ્લેક’ (Slack) પર સતત નજર રાખી રહ્યા છે. તેઓ સ્લેકમાં દર્શાવાતા કુલ સભ્યોના આંકડાને શેરબજારના ઈન્ડેક્સની જેમ જોઈ રહ્યા છે. જેમ જેમ લોકો સિસ્ટમમાંથી દૂર થાય છે, તેમ સ્લેકની સભ્યસંખ્યા ઘટે છે. ઈકોનોમિક ટાઈમ્સ અને રેડિટ (Reddit) પર ચાલી રહેલી ચર્ચાઓ મુજબ, સ્લેક પર સભ્યોની સંખ્યા ૧૫૦,૧૯૮ થી ઘટીને ૧૫૦,૧૮૧ અને ત્યાર બાદ ૧૫૦,૧૧૩ થઈ ગઈ હતી.
જોકે, કેટલાક કર્મચારીઓનું માનવું છે કે સ્લેકના આંકડા ઘટે તેને માત્ર છટણી જ ન ગણી શકાય, કારણ કે સામાન્ય દિવસોમાં પણ લોકો રાજીનામું આપતા હોય છે કે નિવૃત્ત થતા હોય છે. છતાં પણ, કોઈ સત્તાવાર માહિતીના અભાવે કર્મચારીઓ માટે સ્લેક કાઉન્ટર જ છટણી જાણવાનું એકમાત્ર સાધન બની ગયું છે.
વરિષ્ઠ અધિકારીઓ અને વીપી (VP) સ્તરના રાજીનામા
સપ્ટેમ્બર ૪ના રોજ સોશિયલ મીડિયા પ્લેટફોર્મ રેડિટ પર ‘r/employeesOfOracle’ નામના થ્રેડ પર એક નવો સનસનાટીભર્યો દાવો સામે આવ્યો. “અમેરિકામાં છટણી શરૂ થઈ ગઈ છે” એવા ટાઈટલ સાથે શરૂ થયેલી આ ચર્ચામાં ખુલાસો થયો કે આ વખતે માત્ર નાના કર્મચારીઓ જ નહીં, પરંતુ ઉચ્ચ હોદ્દા પર બેઠેલા વાઈસ પ્રેસિડેન્ટ (VP) અને ગ્લોબલ વાઈસ પ્રેસિડેન્ટ (GVP) કક્ષાના અધિકારીઓને પણ દૂર કરવામાં આવી રહ્યા છે.
ખાસ કરીને ઓરેકલ એપ્લિકેશન લેબ્સ (OAL) ટીમમાં મોટા પાયે ફેરફારો જોવા મળ્યા છે, જે ટીમને હાલમાં જ ઓરેકલ ક્લાઉડ ઈન્ફ્રાસ્ટ્રક્ચર (OCI) માં વિલીન (merge) કરવામાં આવી હતી. કર્મચારીઓના જણાવ્યા મુજબ, સ્લેક પરથી ઘણા સિનિયર મેનેજરો અને VPs ના એકાઉન્ટ્સ અચાનક ગાયબ થઈ ગયા છે. ઘણા વરિષ્ઠ અધિકારીઓ ઓર્ગેનાઈઝેશન ચાર્ટમાંથી પણ અદ્રશ્ય થઈ ગયા છે, જે સ્પષ્ટ કરે છે કે M6 અને M7 સ્તરના ઉચ્ચ અધિકારીઓને પણ કંપનીએ નોકરીમાંથી છૂટા કરી દીધા છે.
નુકસાન નિયંત્રણ (Damage Control) ની વ્યૂહરચના
માર્ચ મહિનામાં થયેલી છટણીને કારણે ઓરેકલ કંપનીની વૈશ્વિક સ્તરે ભારે ટીકા થઈ હતી. સવાર-સવારમાં ૬ વાગ્યે ઈમેલ મોકલીને હજારો લોકોને એકસાથે કાઢી મૂકવાના નિર્ણયથી કંપનીની છબીને મોટો ધક્કો પહોંચ્યો હતો. આ વખતે કંપની ‘ડેમેજ કંટ્રોલ’ મોડમાં હોય તેમ લાગી રહ્યું છે. કોઈ મોટો આઘાત આપવાને બદલે અથવા તો સમાચાર માધ્યમોનું ધ્યાન ખેંચવાને બદલે કંપની તબક્કાવાર અને શાંતિથી આ પ્રક્રિયા પૂરી કરવા માગે છે.
પરંતુ આ શાંત છટણીની વ્યૂહરચના કર્મચારીઓ માટે વધુ ભયાનક સાબિત થઈ રહી છે. જ્યારે લોકોને ખબર નથી હોતી કે આગામી નંબર કોનો છે, ત્યારે કામનું વાતાવરણ વધુ ચિંતાજનક બની જાય છે. કર્મચારીઓ દરરોજ સવારે એ ડર સાથે લોગિન કરે છે કે આજે તેમની સાથે કામ કરતા સાથીદારો અથવા તેઓ પોતે કંપનીમાંથી ગાયબ થઈ જશે.
