72 કલાકનું રાશન અને ઇમરજન્સી કિટ તૈયાર રાખો! અમેરિકા-યુરોપની સલાહ પાછળનું કારણ શું?
આજના સમયમાં સમગ્ર વિશ્વની પરિસ્થિતિઓ ઝડપથી બદલાઈ રહી છે. એક તરફ જ્યાં હવામાનમાં અચાનક થતા ફેરફારો અને કુદરતી આપત્તિઓ વધી રહી છે, તો બીજી તરફ આંતરરાષ્ટ્રીય સ્તરે તણાવ અને યુદ્ધ જેવી સ્થિતિઓ પણ ચિંતાનો વિષય બની રહી છે. આ બાબતને ધ્યાનમાં રાખીને અમેરિકા, બ્રિટન અને યુરોપના ઘણા અગ્રણી દેશોએ પોતાના નાગરિકો માટે મોટું એલર્ટ જારી કર્યું છે.
આ દેશોની સરકારે પોતાના નાગરિકોને સલાહ આપી છે કે તેઓ કોઈપણ કટોકટીની સ્થિતિ (Emergency Situation) સામે નિપટવા માટે પોતાના ઘરોમાં ઓછામાં ઓછા ૭૨ કલાકથી લઈને બે સપ્તાહ સુધીનો જરૂરી સામાન અગાઉથી જ સ્ટોક કરીને રાખે. આવો વિગતવાર જાણીએ કે અચાનક આવો નિર્દેશ કેમ આપવામાં આવ્યો છે અને આ ઇમરજન્સી કિટમાં કઈ-કઈ વસ્તુઓ સામેલ કરવી જરૂરી છે.
કયા દેશોએ જારી કર્યા આવા નિર્દેશો અને શું છે કારણ?
તાજેતરમાં અમેરિકા, બ્રિટન, જાપાન અને ઘણા યુરોપીય દેશોએ પોતાના નાગરિકો માટે નવા ઇમરજન્સી માર્ગદર્શિકા (ગાઈડલાઈન્સ) જારી કર્યા છે. અમેરિકામાં નાગરિકોને કુદરતી આપત્તિઓ અથવા કોઈપણ માનવ-સર્જિત સંકટ સામે લડવા માટે કેટલાક દિવસો સુધી ઘરે જ રહીને કામ ચલાવવાની તૈયારી રાખવા કહેવાયું છે. આ ઉપરાંત, અમેરિકાએ પોતાના લશ્કરી મથકો માટે પણ એવી યોજના બનાવી છે જેનાથી તેઓ બાહ્ય મદદ વગર ૯૦ દિવસ સુધી સ્વતંત્ર રીતે કામ કરી શકે.
બ્રિટને પોતાના ‘બી રેડી’ (Be Ready) ઓપરેશનને અપડેટ કર્યું છે, જેના હેઠળ લોકોને ઓછામાં ઓછા ત્રણ દિવસ સુધીનો જરૂરી સામાન સ્ટોકમાં રાખવાની સલાહ આપવામાં આવી છે, જેથી જો વીજળી, પાણી કે ટ્રાન્સપોર્ટ જેવી સામાન્ય સેવાઓ અચાનક ખોરવાઈ જાય, તો પણ લોકોને મુશ્કેલી ન પડે.
વિવિધ દેશો દ્વારા નક્કી કરવામાં આવેલી સ્ટોક મર્યાદા:
જર્મની: લગભગ ૧૦ દિવસ સુધીનો સ્ટોક
નોર્વે: ૭ દિવસનો સ્ટોક (ખરાબ હવામાન, રોગચાળો અને યુદ્ધ જેવી પરિસ્થિતિઓને ધ્યાનમાં રાખીને)
સ્વીડન: લગભગ એક સપ્તાહનો સ્ટોક
સ્વિટ્ઝર્લેન્ડ: લગભગ એક સપ્તાહનું ભોજન
ફિનલેન્ડ, ફ્રાન્સ, ચેકિયા અને લિથુઆનિયા: ઓછામાં ઓછા ૭૨ કલાકનો સ્ટોક
આયર્લેન્ડ: ઓછામાં ઓછા ત્રણ દિવસનો સ્ટોક
નોર્વે સરકાર દ્વારા જારી કરાયેલ ગાઈડલાઈન્સમાં સ્પષ્ટપણે કહેવામાં આવ્યું છે કે નાગરિકોએ ખરાબ હવામાન, મહામારી, ગંભીર અકસ્માતો, તોડફોડ અને સૌથી ખરાબ સ્થિતિ એટલે કે ‘યુદ્ધ’ જેવી કટોકટી માટે હંમેશા માનસિક અને ભૌતિક રીતે તૈયાર રહેવું જોઈએ.
ઇમરજન્સી કિટમાં કઈ-કઈ જરૂરી વસ્તુઓ રાખવી જોઈએ?
જો તમારા વિસ્તારમાં પણ અચાનક કોઈ આપત્તિ કે કટોકટીની સ્થિતિ આવી જાય, તો ઘરમાં કેટલીક મૂળભૂત વસ્તુઓ હોવી તમારા અને તમારા પરિવારનો જીવ બચાવી શકે છે. નિષ્ણાતોના મતે, ઇમરજન્સી કિટમાં નીચે મુજબની ચાર વસ્તુઓને પ્રાથમિકતા આપવી જોઈએ:
૧. પીવાનું પાણી (Water): ઇમરજન્સી સ્ટોક તૈયાર કરતી વખતે પાણીને સૌથી પહેલી પ્રાથમિકતા આપવી જોઈએ. બ્રિટનની માર્ગદર્શિકા અનુસાર, પ્રતિ વ્યક્તિ દરરોજ ઓછામાં ઓછું ત્રણ લીટર પીવાનું પાણી સ્ટોર કરીને રાખવું જોઈએ. આ ઉપરાંત, રસોઈ બનાવવા અને સાફ-સફાઈ માટે પણ વધારાના પાણીની વ્યવસ્થા હોવી જોઈએ.
૨. લાંબો સમય ટકી રહે તેવો ખોરાક (Food): એવો ખોરાક પસંદ કરો જે લાંબા સમય સુધી બગડે નહીં અને જેને સ્ટોર કરવા માટે ફ્રિજ કે વધુ રાંધવાની જરૂર ન પડે. ઉદાહરણ તરીકે—કેન્ડ (Canned) ખાદ્ય પદાર્થો, સૂકો મેવો, નટ્સ, એનર્જી બાર, ક્રેકર્સ અને રેડી-ટુ-ઈટ ફૂડ આઈટમ્સ. સમયાંતરે આ ખાદ્ય પદાર્થોની એક્સપાયરી ડેટ ચેક કરતા રહો અને તેને બદલતા રહો.
૩. વીજળી અને સંચારના સાધનો (Power & Communication): આપત્તિના સમયે વીજળી ગુલ થઈ શકે છે અને મોબાઈલ નેટવર્ક ખોરવાઈ શકે છે. તેનાથી બચવા માટે પાવર બેંક, ચાર્જિંગ કેબલ, ટોર્ચ, વધારાની બેટરીઓ અને રેડિયો (ખાસ કરીને વિન્ડ-અપ કે બેટરીથી ચાલતો) પોતાની પાસે જરૂર રાખો. આ સાધનો તમને બહારની દુનિયા સાથે સંપર્ક જાળવી રાખવામાં અને સરકારી અપડેટ્સ મેળવવામાં મદદ કરશે.
૪. દવાઓ અને ફર્સ્ટ-એઈડ (Medicines & First Aid): ઘરના સભ્યો દ્વારા નિયમિતપણે લેવાતી ડોક્ટરની દવાઓ, એક સારી ફર્સ્ટ-એઈડ કિટ, સ્ટ્રેઈલ ગોઝ (સાફ પટ્ટી), બેન્ડેજ, મેડિકલ ટેપ, થર્મોમીટર અને એન્ટીસેપ્ટિક લોશન કે ક્રીમ હંમેશા સ્ટોકમાં રાખવી જોઈએ જેથી મેડિકલ ઇમરજન્સીમાં ત્વરિત મદદ મળી શકે.
