બિહાર પોલીસ સિપાઈ પરીક્ષાનું રીઝલ્ટ જાહેર! csbc.bihar.gov.in પર કરો ચેક
બિહાર પોલીસમાં સિપાઈ બનવાનું સ્વપ્ન જોઈ રહેલા યુવાનો માટે મોટા અને રાહતભર્યા સમાચાર છે. સેન્ટ્રલ સિલેક્શન બોર્ડ ઓફ કોન્સ્ટેબલ (CSBC) એ ૧૮ ઓગસ્ટ ૨૦૨૬ના રોજ સિપાઈ ભરતી પરીક્ષાના પરિણામો સત્તાવાર રીતે જાહેર કરી દીધા છે. બોર્ડે આ પરિણામ બે અલગ-અલગ જાહેરાતો—જાહેરાત ક્રમાંક 01/2026 (સ્પેશિયલ બ્રાન્ચ કોન્સ્ટેબલ – GD) અને જાહેરાત ક્રમાંક 02/2026 (કોન્સ્ટેબલ ઓપરેટર) હેઠળ યોજાયેલી પરીક્ષાઓ માટે જાહેર કર્યું છે.
બંને પદો માટે લેખિત પરીક્ષા જૂન ૨૦૨૬માં યોજાઈ હતી. જે ઉમેદવારો આ લેખિત પરીક્ષામાં પાસ થયા છે, તેમને હવે પસંદગી પ્રક્રિયાના આગામી અને અત્યંત મહત્વપૂર્ણ તબક્કા એટલે કે શારીરિક કસોટી/માપદંડ પરીક્ષા (PET/PST) માટે બોલાવવામાં આવશે.
કોન્સ્ટેબલ ઓપરેટર: ૫,૯૬૬ ઉમેદવારો PET માટે શોર્ટલિસ્ટ
બિહાર પોલીસ કોન્સ્ટેબલ ઓપરેટર પદ માટે ઉમેદવારોમાં જબરદસ્ત હરીફાઈ જોવા મળી હતી. આ ભરતી પ્રક્રિયા સાથે જોડાયેલા મુખ્ય આંકડા નીચે મુજબ છે:
કુલ અરજીઓ: આ પદ માટે ૩,૧૮,૫૧૮ ઉમેદવારોએ ફોર્મ ભર્યા હતા, જેમાંથી ચકાસણી બાદ ૨,૮૨,૮૨૩ અરજીઓ સાચી મળી આવી હતી.
પરીક્ષા અને કેન્દ્રો: લેખિત પરીક્ષા ૨૮ જૂન ૨૦૨૬ના રોજ બિહારના તમામ ૩૮ જિલ્લાઓમાં બનાવેલા ૫૪૪ પરીક્ષા કેન્દ્રો પર યોજાઈ હતી.
હાજરી અને મૂલ્યાંકન: પરીક્ષામાં કુલ ૧,૨૮,૪૮૨ ઉમેદવારો હાજર રહ્યા હતા. જોકે, ગેરરીતિ કે અયોગ્ય સાધનોના ઉપયોગના કારણે ૨૮ ઉમેદવારોને અયોગ્ય ઠેરવવામાં આવ્યા હતા, ત્યારબાદ કુલ ૧,૨૮,૪૫૪ ઉમેદવારોની ઉત્તરવહીઓ (OMR) નું મૂલ્યાંકન કરવામાં આવ્યું હતું.
લેખિત પરીક્ષામાં પાસ થવા માટે ન્યૂનતમ ૩૦ ટકા ગુણ મેળવવા ફરજિયાત હતા. કટઓફ પર સરખા ગુણ આવવાને કારણે (ટાઈ બ્રેક) બોર્ડે કુલ ૫,૯૬૬ ઉમેદવારોને શારીરિક ક્ષમતા કસોટી (PET) માટે પસંદ કર્યા છે.
કોન્સ્ટેબલ (GD કેડર): ૨૫૪ ઉમેદવારો PST માટે પસંદ
જાહેરાત ક્રમાંક 01/2026 હેઠળ સ્પેશિયલ બ્રાન્ચ કોન્સ્ટેબલ (જનરલ ડ્યુટી બંધ કેડર) ની ૮૩ જગ્યાઓ પર ભરતી કરવામાં આવી રહી છે.
અરજીઓ અને હાજરી: આ ભરતી માટે કુલ ૨,૩૩,૪૭૯ અરજીઓ આવી હતી, જેમાંથી ૨,૨૪,૪૨૯ ફોર્મ સાચા મળ્યા હતા. તેની પરીક્ષા ૨૪ જૂન ૨૦૨૬ના રોજ ૪૩૧ કેન્દ્રો પર થઈ હતી. પેપર-૧માં ૬૪,૪૧૦ અને પેપર-૨માં ૬૪,૪૦૯ ઉમેદવારો હાજર રહ્યા હતા.
ન્યૂનતમ ગુણ અને ટાઈ બ્રેક: ગેરરીતિના આરોપમાં ૩ ઉમેદવારો અયોગ્ય જાહેર થયા અને ૬૪,૪૦૮ ઉત્તરવહીઓ તપાસવામાં આવી. ઉમેદવારો માટે દરેક પેપરમાં અને ઓવરઓલ ઓછામાં ઓછા ૩૦% ગુણ લાવવા જરૂરી હતા. અંતે ટાઈ બ્રેક પછી ૨૫૪ ઉમેદવારોને શારીરિક માપદંડ કસોટી (PST) માટે શોર્ટલિસ્ટ કરવામાં આવ્યા છે.
CSBC સિપાઈ ભરતીનું પરિણામ આ રીતે કરો ચેક (Step-by-Step Guide)
CSBC સિપાઈ ભરતીનું પરિણામ આ રીતે કરો ચેક (Step-by-Step Guide)જો તમે પણ આ પરીક્ષા આપી હતી, તો તમારું પરિણામ ચેક કરવા માટે નીચે આપેલા સરળ સ્ટેપ્સ ફોલો કરો:
સૌથી પહેલા CSBC ની સત્તાવાર વેબસાઈટ csbc.bihar.gov.in પર જાવ.
હોમપેજ પર આપેલા ‘Result’ સેક્શન પર ક્લિક કરો.
હવે તમારી ભરતી મુજબ—’Constable GD’ અથવા ‘Constable Operator’ ના પરિણામ લિંકને પસંદ કરો.
સ્ક્રીન પર પસંદગી પામેલા ઉમેદવારોના રોલ નંબરની એક PDF ફાઈલ ખુલશે.
આ PDF ને તમારા ફોન કે કમ્પ્યુટરમાં ડાઉનલોડ/સેવ કરી લો.
હવે Ctrl + F દબાવીને (અથવા ફોનના સર્ચ ઓપ્શનમાં જઈને) તમારો રોલ નંબર ટાઈપ કરો અને રીઝલ્ટ ચેક કરો.
PST-PET ના દિવસે જ થશે ડોક્યુમેન્ટ વેરિફિકેશન (DV)
શારીરિક કસોટી (PET/PST) ના દિવસે જ ઉમેદવારોના પ્રમાણપત્રોની તપાસ (Document Verification) પણ કરવામાં આવશે. તેથી સફળ ઉમેદવારોને સલાહ આપવામાં આવે છે કે તેઓ પોતાના તમામ ઓરિજિનલ ડોક્યુમેન્ટ્સ અને તેની એક-એક સેટ સેલ્ફ-એટેસ્ટેડ ઝેરોક્ષ તૈયાર રાખે.
સાથે લઈ જવાના જરૂરી દસ્તાવેજો:
માન્ય ફોટો ઓળખપત્ર (આધાર કાર્ડ, પાન કાર્ડ, ડ્રાઈવિંગ લાયસન્સ વગેરે)
જન્મ તારીખનું પ્રમાણપત્ર (મેટ્રિકની માર્કશીટ/સર્ટિફિકેટ)
શૈક્ષણિક લાયકાતના પ્રમાણપત્રો
જાતિ પ્રમાણપત્ર અને રહેઠાણનો પુરાવો (ડોમિસાઈલ)
નોન-ક્રીમીલેયર (NCL) / EWS પ્રમાણપત્ર (જો લાગુ પડતું હોય તો)
ઓપરેટર પદ માટે અરજી કરનાર ટ્રાન્સજેન્ડર ઉમેદવારોએ પોતાનું સત્તાવાર ‘ટ્રાન્સજેન્ડર ઓળખપત્ર’ સાથે લાવવું ફરજિયાત રહેશે.
સફળ ઉમેદવારોએ હવે તેમની શારીરિક તૈયારીઓ ઝડપી કરી દેવી જોઈએ, કારણ કે ટૂંક સમયમાં જ CSBC PET/PST પરીક્ષાની તારીખોની જાહેરાત કરશે.
