PF એકાઉન્ટ્સ મર્જ કરવાના આ ૫ મોટા ફાયદા જાણીને તમે પણ આજે જ કરશો અરજી, વ્યાજ પર મળશે બમ્પર વ્યાજ!
આજના સમયમાં કરિયર ગ્રોથ કે વધુ સારા પેકેજ માટે નોકરી બદલવી એ ખૂબ જ સામાન્ય બાબત બની ગઈ છે. પરંતુ, જ્યારે કોઈ કર્મચારી વારંવાર નોકરી બદલે છે, ત્યારે તેની સામે એક મોટી નાણાકીય સમસ્યા ઊભી થાય છે—એમ્પ્લોઈઝ પ્રોવિડન્ટ ફંડ (EPF) એકાઉન્ટ્સનું સંચાલન.
તમને જણાવી દઈએ કે જ્યારે તમે નવી નોકરી શરૂ કરો છો, ત્યારે ‘એમ્પ્લોઈઝ પ્રોવિડન્ટ ફંડ ઓર્ગેનાઈઝેશન’ (EPFO) દ્વારા તમારા જૂના યુએન (UAN – Universal Account Number) હેઠળ જ એક નવી ‘મેમ્બર આઈડી’ (Member ID) એટલે કે નવું પીએફ એકાઉન્ટ જનરેટ કરવામાં આવે છે. આ સ્થિતિમાં, તમારા નામે એક જ UAN સાથે લિંક થયેલા ઘણા બધા જૂના PF એકાઉન્ટ્સ જમા થઈ જાય છે. જો તમે પણ ભૂતકાળમાં નોકરીઓ બદલી છે, તો તમારા જૂના અને નવા પીએફ એકાઉન્ટને એકસાથે મર્જ (ભેગા) કરવું ખૂબ જ મહત્વપૂર્ણ છે. આ કરવાથી માત્ર તમારી પેન્શન માટેની સર્વિસ હિસ્ટ્રી જ સાચી નથી રહેતી, પરંતુ ભવિષ્યમાં પીએફ ઉપાડવામાં કે ક્લેમ સેટલમેન્ટ કરવામાં પણ ભારે સરળતા રહે છે. ચાલો આજે સમજીએ કે તમે ઘરે બેઠા ઓનલાઈન કેવી રીતે તમારા પીએફ એકાઉન્ટ્સ મર્જ કરી શકો છો.
PF એકાઉન્ટ મર્જ કરતા પહેલા કઈ તૈયારીઓ રાખવી?
ઓનલાઈન પીએફ એકાઉન્ટ ટ્રાન્સફર કરવા કે મર્જ કરવા માટે તમારે કોઈ સરકારી કચેરીના ધક્કા ખાવાની કે કોઈ ફિઝિકલ દસ્તાવેજો સબમિટ કરવાની જરૂર નથી. આ આખી પ્રક્રિયા ડિજિટલ છે, પરંતુ તે શરૂ કરતા પહેલા તમારા UAN પ્રોફાઇલમાં કેવાયસી (KYC) વિગતો અપડેટ અને વેરિફાઇડ હોવી અનિવાર્ય છે.
તમારી પાસે નીચેની વિગતો અગાઉથી તૈયાર હોવી જોઈએ:
-
તમારો યુએન (UAN) નંબર એક્ટિવ હોવો જોઈએ અને તેની સાથે લિંક થયેલો મોબાઈલ નંબર ચાલુ હોવો જોઈએ.
-
તમારા તમામ જૂના પીએફ એકાઉન્ટ્સના ‘મેમ્બર આઈડી’ (Member ID) તમારી પાસે હોવા જરૂરી છે.
-
પ્રોફાઈલમાં આધાર (Aadhaar), પાન કાર્ડ (PAN) અને બેંક ખાતાની વિગતો બિલકુલ સાચી અને અપડેટ હોવી જોઈએ.
-
આ બધી કેવાયસી (KYC) વિગતો તમારા વર્તમાન અથવા ભૂતકાળના એમ્પ્લોયર (કંપની) દ્વારા ડિજિટલી અપ્રુવ થયેલી હોવી જોઈએ.
એક કરતાં વધુ પીએફ એકાઉન્ટ્સ મર્જ કરવાના અદ્ભુત ફાયદા
ઘણા કર્મચારીઓ પીએફ મર્જ કરવાની પ્રક્રિયાને કંટાળાજનક સમજીને ટાળતા હોય છે, પરંતુ આમ કરવાથી તેઓ પોતાનું જ મોટું આર્થિક નુકસાન કરે છે. પીએફ એકાઉન્ટ્સ મર્જ કરવાના મુખ્ય ફાયદા નીચે મુજબ છે:
-
ટ્રેકિંગમાં સરળતા: તમારું બધું જ પીએફ બેલેન્સ એક જગ્યાએ આવી જવાથી તમને એ ખબર રહે છે કે તમારા નિવૃત્તિ ભંડોળ (Retirement Fund) માં કુલ કેટલા પૈસા જમા થયા છે.
-
કમ્પાઉન્ડિંગનો મોટો લાભ: નોકરી બદલતી વખતે પીએફના પૈસા ઉપાડી લેવાને બદલે તેને નવા ખાતામાં ટ્રાન્સફર કરવાથી વ્યાજ પર વ્યાજ એટલે કે ચક્રવૃદ્ધિ વ્યાજ (Compounding) નો જબરદસ્ત ફાયદો મળે છે.
-
ભંડોળમાં ઝડપી વધારો: હાલમાં પીએફ પર મળી રહેલા આશરે ૮.૨૫% ના આકર્ષક વ્યાજ દરને કારણે તમારું ફંડ ખૂબ જ ઝડપથી મોટું બને છે.
-
પેન્શન (EPS) નો પાકો લાભ: નિયમ મુજબ, જે કર્મચારીની કુલ સરકારી કે પ્રાઈવેટ નોકરી ૧૦ વર્ષ કે તેથી વધુ સમયની થાય છે, તે નિવૃત્તિ પછી પેન્શન મેળવવા માટે પાત્ર બને છે. પીએફ મર્જ કરવાથી તમારી બધી જ નોકરીઓનો સમયગાળો એકસાથે જોડાઈ જાય છે, જેથી પેન્શનનો લાભ મળવો નક્કી થઈ જાય છે.
-
ઝડપી ક્લેમ સેટલમેન્ટ: જ્યારે ભવિષ્યમાં તમારે કટોકટીના સમયે પૈસા ઉપાડવા હશે, ત્યારે એક જ એકાઉન્ટ હોવાને કારણે મંજૂરી ખૂબ જ ઝડપથી મળી જશે.
-
ખાતું બંધ થવાનો ડર નહીં: જૂના ખાતાઓ જો લાંબા સમય સુધી એમનેમ પડ્યા રહે, તો તે ઇન-એક્ટિવ (નિષ્ક્રિય) અથવા અનક્લેમ્ડ બની જવાનો ખતરો રહે છે. મર્જ કરવાથી આ ચિંતા કાયમ માટે દૂર થઈ જાય છે.
ઓનલાઈન પીએફ એકાઉન્ટ મર્જ કરવાની સ્ટેપ-બાય-સ્ટેપ રીત
તમે EPFO ના ઓફિશિયલ પોર્ટલ પર જઈને નીચે મુજબના સરળ સ્ટેપ્સ ફોલો કરીને તમારા એકાઉન્ટ્સ મર્જ કરી શકો છો:
૧. સૌથી પહેલા EPFO Unified Member Portal ની સત્તાવાર વેબસાઇટ પર જાઓ.
૨. ત્યાં તમારો UAN નંબર, પાસવર્ડ અને કેપ્ચા કોડ નાખીને લોગિન કરો.
૩. હોમ પેજ ઓપન થયા પછી, ઉપર આપેલા મેનૂ બારમાંથી ‘Online Services’ ટેબ પર ક્લિક કરો.
૪. ડ્રોપ-ડાઉન મેનૂમાંથી ‘One Member One EPF Account (Transfer Request)’ વિકલ્પ પસંદ કરો.
૫. હવે સ્ક્રીન પર તમારી પર્સનલ ડિટેલ્સ અને તમારા વર્તમાન પીએફ એકાઉન્ટની વિગતો દેખાશે, તેને બરાબર વેરિફાય કરી લો.
૬. તમારા જૂના એમ્પ્લોયરની પીએફ વિગતો જોવા માટે ‘Get Details’ બટન પર ક્લિક કરો.
૭. આગળના સ્ટેપમાં, તમારે આ ટ્રાન્સફર વિનંતીને ડિજિટલી સાઇન (Attestation) કરવા માટે તમારા વર્તમાન (Current) અથવા અગાઉના (Previous) એમ્પ્લોયરમાંથી કોઈ એકની પસંદગી કરવાની રહેશે (વર્તમાન એમ્પ્લોયર પસંદ કરવો વધુ હિતાવહ છે).
૮. ત્યારબાદ તમારો મેમ્બર આઈડી અથવા યુએન નંબર દાખલ કરો.
૯. હવે ‘Get OTP’ પર ક્લિક કરો, જેથી તમારા રજિસ્ટર્ડ મોબાઈલ નંબર પર એક વન-ટાઇમ પાસવર્ડ આવશે.
૧૦. તે OTP બોક્સમાં એન્ટર કરીને સબમિટ બટન દબાવી દો. તમારી ઓનલાઈન અરજી સફળતાપૂર્વક સબમિટ થઈ જશે.
જો એક કરતાં વધુ UAN નંબર હોય તો ઇમેઇલ દ્વારા કરો મર્જ
કેટલીકવાર ભૂલથી અથવા કંપનીઓની બેદરકારીને કારણે એક જ કર્મચારીના બે અલગ-અલગ UAN નંબર જનરેટ થઈ જતા હોય છે. જો તમારી સાથે પણ આવું થયું હોય, તો ઓનલાઈન પોર્ટલની સાથે તમે ઈમેલનો રસ્તો પણ અપનાવી શકો છો.
તમારે તમારા ઓફિશિયલ ઇમેઇલ આઇડી પરથી [email protected] પર એક મેઇલ મોકલવો પડશે. આ મેઇલમાં તમારે તમારા બંને UAN નંબર અને તેની સાથે લિંક પીએફ એકાઉન્ટ્સની વિગતો લખીને જૂના કે વધારાના UAN ને બંધ કરવાની વિનંતી કરવી પડશે. તમારી વિગતોની આંતરિક ચકાસણી કર્યા પછી, EPFO દ્વારા જૂનો UAN નંબર બ્લોક કરી દેવામાં આવશે અને તમારા રજિસ્ટર્ડ મોબાઈલ પર એસએમએસ (SMS) દ્વારા તેની જાણ કરવામાં આવશે. આ પ્રક્રિયા પૂરી થયા પછી, તમે તમારા બાકીના પીએફ બેલેન્સને નવા સક્રિય UAN ખાતામાં ટ્રાન્સફર કરવા માટે ઓનલાઈન ક્લેમ રજીસ્ટર કરી શકો છો.
તમારા ટ્રાન્સફર ક્લેમનું સ્ટેટસ આ રીતે ચેક કરો
અરજી સબમિટ કર્યા પછી તે ક્યાં સુધી પહોંચી છે તે જાણવું ખૂબ જ સરળ છે:
-
ફરીથી EPFO Member e-Sewa Portal માં લોગિન કરો.
-
‘Online Services’ ટેબમાં જઈને ‘Track Claim Status’ પર ક્લિક કરો.
-
અહીં તમને લાઈવ સ્ટેટસ જોવા મળશે કે તમારી વિનંતી તમારા એમ્પ્લોયર (કંપની) પાસે પસ્ટિંગ છે, EPFO ઓફિસમાં પ્રોસેસ હેઠળ છે કે પછી ફાઇનલ અપ્રુવ થઈ ચૂકી છે.
ભવિષ્યમાં ઓટોમેટિક પીએફ ટ્રાન્સફરની મોટી સુવિધા
કર્મચારીઓની આ મુશ્કેલીને કાયમ માટે ખતમ કરવા માટે, EPFO દ્વારા તાજેતરમાં એક નવા ઓટોમેટિક સિસ્ટમનો પ્રસ્તાવ મૂકવામાં આવ્યો છે. આ નવી ટેક્નોલોજી અંતર્ગત, જેવી જ કોઈ વ્યક્તિ પોતાની નોકરી બદલશે, તેનો પીએફ ડેટા અને જૂનું બેલેન્સ કોઈપણ ઓનલાઈન ફોર્મ ભર્યા વગર આપોઆપ (Automatically) નવી કંપનીના એકાઉન્ટમાં શિફ્ટ થઈ જશે. આ સિસ્ટમ સંપૂર્ણપણે લાગુ થયા પછી દેશના કરોડો પગારદાર કર્મચારીઓને કાગજી અને ઓનલાઈન પ્રક્રિયાઓમાંથી મોટી રાહત મળશે અને તેમનું ભવિષ્યનું ભંડોળ વધુ સુરક્ષિત બનશે.
