ખોળામાં બાળક, સાથે ઈ-રિક્ષા… કોઈ પક્ષ વગર મેદાનમાં ઉતર્યા બાંગ્લાદેશના આ ઝઝૂમી ઉમેદવાર
બાંગ્લાદેશની સામાન્ય ચૂંટણીમાં આ વખતે રાજશાહી વિસ્તારના એક મહિલા ઉમેદવાર તેમના સંઘર્ષ અને સાદગીભર્યા પ્રચારને કારણે ચર્ચામાં છે. રાજશાહી-3 સંસદીય બેઠક પરથી અપક્ષ ઉમેદવાર તરીકે ચૂંટણી લડી રહેલા હબીબા બેગમ ન તો કોઈ મોટી પાર્ટીનો ચહેરો છે, ન તો તેમની પાછળ કોઈ શક્તિશાળી સંગઠન છે. આમ છતાં, તેમની ચૂંટણી લડવાની શૈલી લોકોનું ધ્યાન ખેંચી રહી છે.
હબીબા બેગમ ગામડે-ગામડે બેટરીથી ચાલતી ઈ-રિક્ષામાં ફરીને પ્રચાર કરી રહ્યા છે. ઘણીવાર તેઓ પોતાના નાના બાળકને ખોળામાં લઈને મતદારો સાથે સીધો સંવાદ કરતા જોવા મળે છે. તેમની સાથે ન તો સુરક્ષાકર્મીઓનો કાફલો હોય છે, ન તો પોસ્ટર-બેનરોથી સજેલી મોંઘી ગાડીઓ. તેમનું કહેવું છે કે, “જનતા સાથેનો સીધો સંપર્ક જ મારી અસલી તાકાત છે.”
કાનૂની લડાઈ બાદ મળ્યું ચૂંટણી ચિન્હ
હબીબાની ઉમેદવારી શરૂઆતમાં જ મુશ્કેલીમાં મુકાઈ ગઈ હતી. ઉમેદવારોને ચૂંટણી ચિન્હની ફાળવણી દરમિયાન તેમનું નામાંકન રદ કરવામાં આવ્યું હતું અને નીચલી અદાલતમાંથી પણ રાહત મળી નહોતી. ત્યારબાદ તેમણે હાઈકોર્ટના દરવાજા ખખડાવ્યા, જ્યાં મોડી રાત્રે આવેલા ચુકાદાથી તેમને ચૂંટણી લડવાની પરવાનગી મળી. અંતે તેમને “ફૂટબોલ” ચૂંટણી ચિન્હ મળ્યું. આ બેઠક પર કુલ છ ઉમેદવારો મેદાનમાં છે, જેમાં હબીબા એકમાત્ર મહિલા ઉમેદવાર છે.
બજાર, ચાની દુકાન અને ખેતરો સુધી પહોંચ
તેમણે પોતાના અભિયાનની શરૂઆત મોહનપુર ઉપજિલ્લાના એક નાનકડા ગામથી કરી હતી. અત્યાર સુધીમાં તેઓ 20 કિલોમીટરથી વધુ વિસ્તારમાં પ્રચાર કરી ચૂક્યા છે. તેઓ અવારનવાર રિક્ષામાંથી ઉતરીને પગપાળા જ બજારો, ચાની દુકાનો અને ખેતરો સુધી જાય છે, લોકોને હાથ જોડીને વોટ માંગે છે અને પોતાની વાત રજૂ કરે છે.
સંઘર્ષોથી ભરેલી રાજકીય સફર
હબીબા બેગમનું રાજકીય જીવન સરળ રહ્યું નથી. પૂર્વ વડાપ્રધાન શેખ હસીનાના કાર્યકાળ દરમિયાન તેમની સામે અનેક કેસ નોંધાયા હતા અને તેમને સાત વખત જેલ જવું પડ્યું હતું. કેટલાક કેસ હજુ પણ કોર્ટમાં પેન્ડિંગ છે. તેમનું કહેવું છે કે પહેલો કેસ ત્યારે નોંધાયો હતો જ્યારે તેઓ માત્ર 23 વર્ષના હતા, જ્યારે તે સમયે ચૂંટણી લડવા માટેની લઘુત્તમ વય 25 વર્ષ હતી.
તેઓ અગાઉ સ્થાનિક સ્તરની રાજનીતિમાં સક્રિય રહ્યા છે. અનામત મહિલા બેઠક પરથી યુનિયન પરિષદના સભ્ય તરીકે ચૂંટાયા બાદ તેઓ ઉપજિલ્લા મહિલા ઉપાધ્યક્ષ પણ બન્યા હતા, જોકે બાદમાં તેમને તે પદ પરથી હટાવી દેવામાં આવ્યા હતા.
મર્યાદિત સંસાધનો, મોટો ભરોસો
ચૂંટણી ખર્ચ અંગે હબીબા પૂરી પારદર્શિતા સાથે વાત કરે છે. તેમના જણાવ્યા અનુસાર, પ્રચાર માટે પૈસા એકત્ર કરવા માટે તેમના પતિએ જમીન ગીરો મૂકી છે અને જરૂર પડશે તો આગળ પણ એવું કરવું પડશે. આમ છતાં, તેમનો દાવો છે કે સામાન્ય લોકોનું સમર્થન તેમની સાથે છે.
હબીબા બેગમ માને છે કે તેઓ સત્તા કે પ્રસિદ્ધિ માટે નહીં, પરંતુ પોતાના અનુભવ અને સંઘર્ષનો અવાજ સંસદ સુધી પહોંચાડવા માટે ચૂંટણી લડી રહ્યા છે. તેમનું આ પાયાનું અભિયાન બાંગ્લાદેશી રાજકારણમાં એક અલગ ઉદાહરણ પૂરું પાડતું જણાય છે.
