Cognizant PERM Suspension: અમેરિકામાં ભારતીય IT એન્જિનિયરો પર મોટું સંકટ! ગ્રીન કાર્ડ અટકાવાયું
અમેરિકામાં સ્થાયી થવાનું અને ગ્રીન કાર્ડ મેળવવાનું સ્વપ્ન જોઈ રહેલા ભારતીય આઈટી (IT) પ્રોફેશનલ્સ માટે ફરી એકવાર ચિંતાજનક સમાચાર સામે આવ્યા છે. યુનાઇટેડ સ્ટેટ્સ ડિપાર્ટમેન્ટ ઓફ લેબર (US Department of Labor) દ્વારા આઈટી ક્ષેત્રની અગ્રણી કંપની કોગ્નિઝન્ટ (Cognizant) ની નવી અરજીઓ પર સસ્પેન્શન મૂકવાની જાહેરાત કરવામાં આવી છે.
Cognizant ને ‘પ્રોગ્રામ ઇલેક્ટ્રોનિક રિવ્યુ મેનેજમેન્ટ’ (PERM) સિસ્ટમ હેઠળ નવી ફાઇલિંગ કરવા માટે અસ્થાયી રૂપે પ્રતિબંધિત કરવામાં આવી છે. અમેરિકન સ્ટાન્ડર્ડ મુજબ, ત્યાંના માલિકો અથવા કંપનીઓ વિદેશી કર્મચારીઓને કાયમી રહેઠાણ (Green Card) માટે સ્પોન્સર કરવા આ સિસ્ટમનો ઉપયોગ કરે છે. રોજગાર આધારિત ઇમિગ્રેશન કાર્યક્રમોમાં સંભવિત ફ્રોડ (છેતરપિંડી) અને સિસ્ટમના દુરુપયોગના આરોપોની તપાસ ચાલી રહી હોવાથી આ નિર્ણય લેવાયો છે.
આ નિર્ણયને કારણે અમેરિકામાં H-1B વિઝા પર કામ કરતા અને પોતાના ૬ વર્ષના મહત્તમ સમયગાળાની નજીક પહોંચી ગયેલા ભારતીય IT કર્મચારીઓ માટે ગંભીર આર્થિક અને કાયદાકીય પડકારો ઉભા થયા છે.
શ્રમ વિભાગ દ્વારા કાર્યવાહી: લેટેસ્ટ સ્થિતિ
શ્રમ વિભાગના ઇન્સ્પેક્ટર જરનલ એન્થની ડી’એસ્પોસિટોએ સત્તાવાર નિવેદનમાં જણાવ્યું કે, કોગ્નિઝન્ટની PERM ફાઇલિંગ્સને તાત્કાલિક અસરથી સસ્પેન્ડ કરવામાં આવી છે. તેમની ઓફિસ શ્રમ વિભાગના અન્ય વરિષ્ઠ અધિકારીઓ અને ‘વ્હાઇટ હાઉસ ફ્રોડ ટાસ્ક ફોર્સ’ સાથે મળીને આ મામલાની ઊંડાણપૂર્વક તપાસ કરી રહી છે.
જોકે, અમેરિકી અધિકારીઓએ હજી સુધી કંપની પર મૂકાયેલા ચોક્કસ આરોપો, આ નિર્ણયથી પ્રભાવિત થનારા કર્મચારીઓની કુલ સંખ્યા કે આ પ્રતિબંધ કેટલા સમય સુધી અમલમાં રહેશે તે અંગે કોઈ સ્પષ્ટ ખુલાસો કર્યો નથી. ઉલ્લેખનીય છે કે, Cognizant એ દાયકાઓ પહેલાં પોતાનું મુખ્ય મથક ભારતથી અમેરિકા ખસેડ્યું હતું, છતાં તેના કર્મચારીઓમાં મોટાભાગના ભારતીય મૂળના આઈટી નિષ્ણાતો છે.
અમેરિકી સત્તાવાળાઓ દ્વારા છેલ્લા કેટલાક સમયથી H-1B અને PERM જેવા પ્રોગ્રામ્સમાં થતી ગેરરીતિઓ પર વોચ રાખવામાં આવી રહી છે. કર્મચારીઓને નિર્ધારિત દર કરતાં ઓછો પગાર ચૂકવવો, ખોટી કે બોગસ અરજીઓ રજૂ કરવી અને સ્થાનિક અમેરિકન કર્મચારીઓના ભોગે વિદેશી કર્મચારીઓને નોકરીએ રાખવા જેવા ગંભીર આરોપોની તપાસ તેજ કરવામાં આવી છે.
PERM શું છે? અને ગ્રીન કાર્ડ માટે તે કેમ મહત્વનું છે?
અમેરિકામાં કાયમી રહેઠાણ એટલે કે ગ્રીન કાર્ડ (Green Card) મેળવવા ઈચ્છતા વિદેશી નાગરિકો માટે PERM એ પ્રથમ અને સૌથી મહત્વનું ચરણ ગણાય છે. જોકે, તે કોઈ વિઝા નથી કે તેનાથી ગ્રીન કાર્ડની ગેરંટી મળતી નથી, પરંતુ તે ગ્રીન કાર્ડ પ્રોસેસિંગ માટેનું પ્રાથમિક સ્તંભ છે.
PERM પ્રક્રિયાનું માળખું નીચે મુજબ કામ કરે છે: ૧. લેબર સર્ટિફિકેશન: યુએસ સિટીઝનશિપ એન્ડ ઇમિગ્રેશન સર્વિસિસ (USCIS) માં ઇમિગ્રેશન પિટિશન દાખલ કરતાં પહેલાં, એમ્પ્લોયરે લેબર ડિપાર્ટમેન્ટ પાસેથી ‘લેબર સર્ટિફિકેશન’ મેળવવું પડે છે.
૨. સ્થાનિક નોકરીની જાહેરાત: કંપનીએ સાબિત કરવું પડે છે કે જે ચોક્કસ પોઝિશન માટે વિદેશી કર્મચારીને રાખવામાં આવી રહ્યો છે, તે માટે કોઈ યોગ્ય કે લાયક અમેરિકન નાગરિક ઉપલબ્ધ નથી.
૩. વેતન અને શરતો: કંપનીએ એ પણ સ્પષ્ટ કરવું પડે છે કે વિદેશી કર્મચારીની ભરતીથી અમેરિકન નાગરિકોના વેતન કે કામના વાતાવરણ પર કોઈ પ્રતિકૂળ અસર પડશે નહીં.
૪. રેકોર્ડ જાળવણી: એમ્પ્લોયરે નોકરીની જાહેરાત આપવી પડે છે, આવેલી અરજીઓનું મૂલ્યાંકન કરવું પડે છે અને સ્થાનિક અમેરિકનોને કેમ પસંદ ન કરવામાં આવ્યા તેના લેખિત પુરાવા રાખવા પડે છે.
ભારતીય IT કર્મચારીઓ પર આ નિર્ણયની સીધી અસર
કોગ્નિઝન્ટ પરના આ પ્રતિબંધના કારણે તેવા ભારતીય કર્મચારીઓને સૌથી મોટો ફટકો પડશે જેમની PERM પ્રક્રિયા હજી શરૂ થઈ નથી અથવા ફાઇલ કરવાની બાકી છે.
પ્રાયોરિટી ડેટ (Priority Date) માં વિલંબ: જ્યાં સુધી સસ્પેન્શન ચાલુ રહેશે, ત્યાં સુધી કંપની નવી PERM અરજીઓ કરી શકશે નહીં. આના કારણે કર્મચારીઓને પ્રાયોરિટી ડેટ મળશે નહીં અને તેમની ગ્રીન કાર્ડ મેળવવાની પ્રક્રિયા અટકી જશે.
હાલનો બેકલોગ (Backlog): ભારતીય અરજદારો માટે પહેલાથી જ ગ્રીન કાર્ડનો મોટો બેકલોગ છે. વિઝા બુલેટિન અનુસાર, ભારત માટે EB-2 અને EB-3 કેટેગરીમાં દાયકાઓ લાંબુ વેટિંગ ચાલી રહ્યું છે. યુએસ કાયદા મુજબ કોઈપણ એક દેશને કુલ ગ્રીન કાર્ડના ચોક્કસ ટકા (Per-Country Cap) જ ફાળવવામાં આવે છે, જેનાથી ભારતીયો માટે રાહ જોવાનો સમયગાળો ખૂબ વધી જાય છે.
H-1B ના ૬ વર્ષની મર્યાદા અને વિઝા એક્સ્ટેન્શનનું સંકટ
સૌથી વધુ ચિંતાજનક બાબત એ કર્મચારીઓ માટે છે જેમના H-1B વિઝાનો ૬ વર્ષનો મહત્તમ સમયગાળો પૂર્ણ થવાના આરે છે.
અમેરિકન ઇમિગ્રેશન નિયમો મુજબ:
જો કોઈ કર્મચારીની PERM અરજી તેના H-1B ના ૬ વર્ષ પૂરા થવાના ઓછામાં ઓછા ૩૬૫ દિવસ પહેલાં દાખલ થઈ ગઈ હોય, તો તેને તેના H-1B વિઝામાં ૧ વર્ષનું એક્સ્ટેન્શન (વિસ્તરણ) મળી શકે છે.
જો PERM ની મંજૂરી મળી ગઈ હોય અને I-140 અરજી એપ્રૂવ થઈ ગઈ હોય, તો ગ્રીન કાર્ડ ન મળે ત્યાં સુધી કર્મચારી ૩-૩ વર્ષનું H-1B એક્સ્ટેન્શન મેળવી શકે છે.
પરંતુ હવે Cognizant દ્વારા નવી PERM ફાઇલિંગ બંધ થઈ જતાં, જે કર્મચારીઓ ૫મા કે ૬ઠ્ઠા વર્ષમાં છે તેમની અરજી સમયસર થશે નહીં. પરિણામે, ૬ વર્ષ પૂરા થતાં જ તેમણે અમેરિકા છોડીને પોતાના દેશ (ભારત) પરત ફરવું પડી શકે છે અથવા અન્ય કોઈ એમ્પ્લોયર પાસે નોકરી ટ્રાન્સફર કરાવવાની ફરજ પડશે.
જોકે, જેમની PERM અને I-140 અરજીઓ પહેલાથી જ મંજૂર થઈ ચૂકી છે અને માત્ર ગ્રીન કાર્ડ નંબર મળવાની રાહ જોઈ રહ્યા છે, તેમને હાલ પૂરતી રાહત છે. તેઓ નિયમ મુજબ ૩ વર્ષના એક્સ્ટેન્શન માટે પાત્ર રહેશે.
