પંજાબમાં નશા વિરુદ્ધ સરકારની મોટી કાર્યવાહી, હરપાલ સિંહ ચીમાએ ગુજરાતના BJP પર કર્યા ગંભીર પ્રહાર
પંજાબમાં નશાના વધતા દૂષણને લઈને રાજકીય માહોલ ગરમાયો છે. આમ આદમી પાર્ટીના વરિષ્ઠ નેતા અને પંજાબના કેબિનેટ મંત્રી હરપાલ સિંહ ચીમાએ નશાના મુદ્દે ભાજપ, શિરોમણી અકાલી દળ અને કોંગ્રેસ પર આકરા પ્રહારો કર્યા છે. તેમણે આક્ષેપ કર્યો છે કે અગાઉની સરકારોના કાર્યકાળ દરમિયાન પંજાબમાં નશાના કારોબાર અને ગેંગસ્ટર પ્રવૃત્તિઓને પ્રોત્સાહન મળ્યું હતું. બીજી તરફ ભગવંત માનની આગેવાની હેઠળની AAP સરકાર નશા અને સંગઠિત ગુનાખોરી સામે નિર્ણાયક લડાઈ લડી રહી હોવાનો દાવો પણ તેમણે કર્યો છે.
ચંદીગઢમાં યોજાયેલી પત્રકાર પરિષદમાં ચીમાએ જણાવ્યું હતું કે રાજ્યમાં નશાની સમસ્યા એક દિવસમાં ઊભી થઈ નથી. વર્ષ 2007થી 2017 દરમિયાન અકાલી દળ-ભાજપની સરકારના સમયમાં પંજાબમાં ચિટ્ટા સહિતના નશીલા પદાર્થોનું પ્રમાણ વધ્યું હતું. ત્યારબાદ 2017થી 2022 દરમિયાન સત્તામાં રહેલી કોંગ્રેસ સરકાર પણ આ સમસ્યાને નિયંત્રણમાં લેવામાં નિષ્ફળ રહી હોવાનો તેમણે આરોપ લગાવ્યો હતો.
નશા વિરુદ્ધ યુદ્ધ અભિયાન હેઠળ મોટી કાર્યવાહી
હરપાલ સિંહ ચીમાના જણાવ્યા અનુસાર, ભગવંત માન સરકારે સત્તા સંભાળ્યા બાદ નશાના વેપારીઓ અને ગેંગસ્ટરો સામે કાર્યવાહી માટે એન્ટી-ગેંગસ્ટર ટાસ્ક ફોર્સની રચના કરી હતી. આ ટીમ દ્વારા અનેક સ્થળોએ દરોડા પાડવામાં આવ્યા છે અને ગુનાહિત પ્રવૃત્તિઓમાં સામેલ લોકોની ધરપકડ કરવામાં આવી છે.
તેમણે આપેલી માહિતી પ્રમાણે, એન્ટી-ગેંગસ્ટર ટાસ્ક ફોર્સ દ્વારા અત્યાર સુધીમાં 2,105 ભાગેડુ જાહેર કરાયેલા આરોપીઓને પકડવામાં આવ્યા છે. જ્યારે ગેંગસ્ટર અને અન્ય ગુનાહિત પ્રવૃત્તિઓ સામેની કાર્યવાહીમાં 81,499 લોકોની ધરપકડ કરવામાં આવી હોવાનો દાવો કરવામાં આવ્યો છે.
68 હજારથી વધુ કેસ અને હજારો કિલો નશીલા પદાર્થો જપ્ત
ચીમાએ જણાવ્યું કે સરકાર દ્વારા ‘યુદ્ધ નશિયાં વિરુદ્ધ’ અભિયાન શરૂ કરવામાં આવ્યું છે. 31 માર્ચ 2025થી અત્યાર સુધીમાં નશા સંબંધિત 68,545 કેસ નોંધાયા છે અને લગભગ 90 હજાર આરોપીઓની ધરપકડ કરવામાં આવી છે.
આ કાર્યવાહી દરમિયાન આશરે 450 કિલોગ્રામ હેરોઇન, ₹23 કરોડથી વધુની ડ્રગ મની, 67 લાખથી વધુ નશીલી કેપ્સ્યુલ, આશરે 4,200 ઇન્જેક્શન અને 84 કિલોગ્રામ નશીલો પાવડર જપ્ત કરવામાં આવ્યો હોવાનો તેમણે દાવો કર્યો હતો.
સરહદી વિસ્તારોમાં ડ્રોન મારફતે થતી નશાની હેરાફેરી અટકાવવા માટે એન્ટી-ડ્રોન સિસ્ટમ પણ મજબૂત બનાવવામાં આવી છે.
ગુજરાત ભાજપ પર પણ કર્યા સીધા પ્રહાર
પત્રકાર પરિષદ દરમિયાન ચીમાએ ગુજરાતમાં ભાજપના લાંબા શાસનનો ઉલ્લેખ કરીને સવાલો ઉઠાવ્યા હતા. તેમણે આક્ષેપ કર્યો કે ગુજરાતમાં 30 વર્ષથી વધુ સમયથી ભાજપનું શાસન હોવા છતાં રાજ્યમાંથી દેશના અન્ય ભાગોમાં નશીલા પદાર્થો પહોંચતા હોવાની સમસ્યા યથાવત છે.
તેમણે 25 ઓક્ટોબરે પ્રકાશિત થયેલા અહેવાલનો હવાલો આપીને દાવો કર્યો કે પંજાબમાં નશાના ઉપયોગમાં 5.5 ટકાનો ઘટાડો થયો છે. જ્યારે દિલ્હી, ઉત્તર પ્રદેશ, હરિયાણા અને મધ્ય પ્રદેશમાં અનુક્રમે 28, 18, 42 અને 51 ટકાનો વધારો નોંધાયો હોવાનું તેમણે જણાવ્યું હતું. આ આંકડા કેન્દ્ર સરકારના ડેટા પર આધારિત હોવાનો પણ તેમણે દાવો કર્યો હતો.
નશા મુક્ત પંજાબ બનાવવાનો સરકારનો દાવો
ચીમાએ અંતમાં જણાવ્યું કે પંજાબ સરકારની પ્રાથમિકતા યુવાનોને નશાથી બચાવવાની અને રાજ્યમાંથી નશાના વેપારને સંપૂર્ણપણે દૂર કરવાની છે. નશા માફિયાઓ, ગેંગસ્ટરો અને સંગઠિત ગુનાખોરીમાં સામેલ લોકો સામે કડક કાર્યવાહી ચાલુ રહેશે.
જોકે, પંજાબમાં નશાની સમસ્યા અંગે સત્તાપક્ષ અને વિપક્ષ વચ્ચે રાજકીય આક્ષેપ-પ્રતિઆક્ષેપનો દોર પણ ચાલુ છે. નશા સામેની લડાઈમાં માત્ર ધરપકડ જ નહીં, પરંતુ યુવાનોનું પુનર્વસન અને નશાની લતમાંથી બહાર લાવવાના પ્રયાસો પણ એટલા જ મહત્વપૂર્ણ રહેશે.
