પરંપરાગત રમતોના સંરક્ષણ માટે નાયબ મુખ્યમંત્રી હર્ષ સંઘવીએ BRICS દેશો સમક્ષ મૂક્યા ૫ મહત્વપૂર્ણ પ્રસ્તાવો
અમદાવાદના સરદાર પટેલ રમતગમત સંકુલ (વીર સાવરકર સ્પોર્ટ્સ કોમ્પ્લેક્સ) ખાતે એક ઐતિહાસિક ક્ષણના સાક્ષી બનતા, કેન્દ્રીય રમતગમત મંત્રી ડૉ. મનસુખ માંડવિયાએ ‘BRICS ટ્રેડિશનલ એન્ડ ઇન્ડિજીનસ સ્પોર્ટ્સ ડેમોન્સ્ટ્રેશન ગેમ્સ-2026’નો વિધિવત પ્રારંભ કરાવ્યો હતો. કેન્દ્રીય રમતગમત મંત્રાલય અને ગુજરાત સરકારના સંયુક્ત ઉપક્રમે આયોજિત આ મહોત્સવમાં ગુજરાતના નાયબ મુખ્યમંત્રી હર્ષ સંઘવી વિશેષ ઉપસ્થિત રહ્યા હતા. ગુજરાતના આંગણે પ્રથમ વખત આયોજિત આ આંતરરાષ્ટ્રીય રમત મહોત્સવ ભારત સહિત બ્રિક્સ દેશોની સમૃદ્ધ પરંપરાગત રમતો, વારસા અને સાંસ્કૃતિક આદાનપ્રદાનનું એક અનોખું મંચ બની રહ્યો છે.
પરંપરાગત રમતો: સાંસ્કૃતિક ઓળખ અને સામાજિક એકતાનું સશક્ત માધ્યમ
ઉદ્ઘાટન પ્રસંગે સંબોધન કરતાં કેન્દ્રીય મંત્રી ડૉ. મનસુખ માંડવિયાએ જણાવ્યું હતું કે, રમતો માત્ર સ્પર્ધા કે જીત-હાર પૂરતી સીમિત નથી હોતી. પરંપરાગત અને સ્વદેશી રમતો દરેક દેશની સાંસ્કૃતિક ઓળખ, ઐતિહાસિક વારસો અને પેઢી દર પેઢી જળવાયેલી સદ્ભાવનાનું પ્રતીક છે. આ રમતો સ્થાનિક તહેવારો, જીવનશૈલી અને લોકસંસ્કૃતિ સાથે વણાયેલી હોવાથી તેમાં સદીઓનું જ્ઞાન સમાયેલું છે.
તેમણે ઉમેર્યું કે ભારતની મલ્લખંભ જેવી રમતો શારીરિક સંતુલન શીખવે છે, કલરિપયટ્ટુ જેવી માર્શલ આર્ટ્સ ક્ષાત્રધર્મ અને રક્ષણનો સંદેશ આપે છે, જ્યારે યોગાસને સમગ્ર વિશ્વને મન, શરીર અને આત્માના સંતુલનનો માર્ગ બતાવ્યો છે. વડાપ્રધાન નરેન્દ્ર મોદીના નેતૃત્વમાં દેશમાં ‘ખેલો ઇન્ડિયા’ જેવી પહેલો થકી સ્પોર્ટ્સ ઇકોસિસ્ટમને મજબૂત બનાવી ગ્રાસરૂટ સ્તરથી લઈને વૈશ્વિક મંચ સુધીની સક્ષમ તકો ઉભી કરવામાં આવી રહી છે.
પ્રાચીન રમત વારસો અને નાયબ મુખ્યમંત્રીના પાંચ મહત્વપૂર્ણ પ્રસ્તાવો
ગુજરાતના નાયબ મુખ્યમંત્રી હર્ષ સંઘવીએ ભારતના પૌરાણિક વારસાનો ઉલ્લેખ કરતાં જણાવ્યું કે, ઋગ્વેદકાળની રથદોડથી લઈને રામાયણકાળની ધનુર્વિદ્યા અને મહાભારતના મલ્લયુદ્ધ સુધી ભારતની રમત પરંપરા હજારો વર્ષ જૂની છે. રમતોની કોઈ સીમા કે ભાષા નથી હોતી, તે વૈવિધ્યસભર દેશોને એકતાના સૂત્રમાં બાંધે છે.
નાયબ મુખ્યમંત્રીએ પરંપરાગત રમતોના સંરક્ષણ માટે BRICS દેશો સમક્ષ પાંચ પ્રસ્તાવો મૂક્યા હતા:
પરંપરાગત રમતોનું સંયુક્ત બહુભાષી ડિજિટલ આર્કાઇવ (દસ્તાવેજીકરણ) બનાવવું.
શાળા અને કોલેજોના અભ્યાસક્રમમાં આ રમતોને પ્રોત્સાહન આપવું.
ખેલાડીઓની સુરક્ષા સુનિશ્ચિત કરતાં આધુનિક ગેમ-ફોર્મેટ વિકસાવવા.
પરંપરાગત રમતોના સાધનો બનાવતા સ્થાનિક કારીગરો માટે રોજગારી ઊભી કરવી.
આ આંતરરાષ્ટ્રીય આયોજનને દર વર્ષે યોજાતી કાયમી પરંપરા બનાવવી.
તેમણે વધુમાં ઉમેર્યું કે ગુજરાત ભવિષ્યમાં ૨૦૨૯ની ‘વિશ્વ પોલીસ એન્ડ ફાયર ગેમ્સ’, ૨૦૩૦ની ‘કોમનવેલ્થ ગેમ્સ’ અને ૨૦૩૬ના ‘ઓલિમ્પિક્સ’ના આયોજન માટે પોતાની દાવેદારી સાથે વિશ્વકક્ષાનું સ્પોર્ટ્સ ઇન્ફ્રાસ્ટ્રક્ચર તૈયાર કરી રહ્યું છે.
વિશ્વભરના દેશોનું સાંસ્કૃતિક પ્રદર્શન અને ઉપસ્થિત મહાનુભાવો
આ મહોત્સવમાં BRICS અને તેના સહયોગી દેશોએ પોતાની પરંપરાગત રમતોનું અદ્ભુત પ્રદર્શન રજૂ કર્યું હતું:
ભારત: મલ્લખંભ, યોગાસન અને કલરિપયટ્ટુ
બ્રાઝિલ: ઝારાબતાના (બ્લોપાઇપ), કોરિડા ડી ટોરસ (લોગ રેસ) અને કેપોઇરા
ચીન: વુશુ, લાયન ડાન્સ અને હેલ્થ કિગોંગ
રશિયા & બેલારુસ: ગોરોડકી અને સામ્બો
ઈરાન & કઝાખસ્તાન: ઝુરખાનેહ, તોગીઝકુમલાક અને કઝાક કુરેસી
દક્ષિણ આફ્રિકા & સંયુક્ત આરબ અમીરાત: કાગતી, ઈન્ટોંગા અને અલ તબ્બાહ
કાર્યક્રમના પ્રારંભમાં ભારત સરકારના રમતગમત વિભાગના સંયુક્ત સચિવ કુણાલે સ્વાગત પ્રવચન આપ્યું હતું. આ પ્રસંગે રાજ્યના રમતગમત સચિવ ડૉ. રાહુલ ગુપ્તા, વિદેશ મંત્રાલયના સંયુક્ત સચિવ શંભુ હક્કી તેમજ વિવિધ દેશોના રમતવીરો અને ઉચ્ચ અધિકારીઓ ઉપસ્થિત રહ્યા હતા. આ મહોત્સવ વૈશ્વિક સ્તરે રમતગમત ક્ષેત્રે ભારતની વધતી પ્રતિષ્ઠાનું ઉત્તમ પ્રતીક બન્યો છે.
