મોબાઈલ રિચાર્જમાં ૨૦ ટકા સુધીનો તોતિંગ વધારો: ૨૦૨૬માં ફરી સામાન્ય માણસના ખિસ્સા પર પડશે ભાર
ભારતના કરોડો મોબાઈલ યુઝર્સ માટે માઠા સમાચાર આવી રહ્યા છે. જો તમે ૨૦૨૪ના ભાવવધારાથી હજુ માંડ ઉગરી શક્યા હો, તો ૨૦૨૬માં ફરી એકવાર રિચાર્જ પ્લાન મોંઘા થવા માટે તૈયાર રહો. મોર્ગન સ્ટેનલીના રિપોર્ટમાં દાવો કરવામાં આવ્યો છે કે ટેલિકોમ કંપનીઓ ૨૦૨૬ના એપ્રિલથી જૂન મહિના વચ્ચે તેમના ટેરિફમાં મોટો વધારો કરી શકે છે.
કેમ વધી રહ્યા છે ભાવ?
ટેલિકોમ કંપનીઓ છેલ્લા કેટલાક સમયથી તેમના ARPU (Average Revenue Per User) એટલે કે ‘પ્રતિ વપરાશકર્તા સરેરાશ આવક’ વધારવા પર ભાર મૂકી રહી છે. કંપનીઓનું માનવું છે કે 5G નેટવર્ક ઊભું કરવા માટે જે જંગી રોકાણ કરવામાં આવ્યું છે, તેની વસૂલાત માટે ટેરિફ વધારવો અનિવાર્ય છે.
રિપોર્ટ મુજબ, કંપનીઓએ અત્યારથી જ તેની તૈયારીઓ શરૂ કરી દીધી છે. ઘણા સસ્તા પ્લાન બંધ કરવામાં આવ્યા છે અને OTT સબસ્ક્રિપ્શન જેવા ફાયદાઓ હવે માત્ર મોંઘા પ્લાન સુધી મર્યાદિત કરી દેવામાં આવ્યા છે. આ એક સંકેત છે કે ગ્રાહકોને ધીમે-ધીમે ઊંચા ભાવ ચૂકવવા માટે માનસિક રીતે તૈયાર કરવામાં આવી રહ્યા છે.
૮ વર્ષમાં ચોથો મોટો ભાવવધારો
જો ૨૦૨૬માં આ વધારો અમલમાં આવશે, તો છેલ્લા ૮ વર્ષમાં આ ચોથી મોટી ભાવવધારો હશે. અગાઉના વધારા પર એક નજર કરીએ:
- ૨૦૧૯: ૧૫% થી ૫૦% સુધીનો વધારો.
- ૨૦૨૧: ૨૦% થી ૨૫% સુધીનો વધારો.
- ૨૦૨૪ (જુલાઈ): ૧૦% થી ૨૦% સુધીનો વધારો.
- ૨૦૨૬ (અંદાજિત): ૧૬% થી ૨૦% સુધીનો વધારો.
પ્રીપેડ અને પોસ્ટપેડ બંને પર અસર
આ ટેરિફ હાઈકની અસર માત્ર પ્રીપેડ ગ્રાહકો પૂરતી મર્યાદિત નહીં રહે, પરંતુ પોસ્ટપેડ યુઝર્સે પણ મોંઘા બિલ ચૂકવવા પડશે. 4G અને 5G બંને પ્લાન પર આ કિંમતો વધવાની શક્યતા છે. ખાસ કરીને 5G સર્વિસ અત્યાર સુધી ઘણી જગ્યાએ ‘અનલિમિટેડ ડેટા’ તરીકે ફ્રી આપવામાં આવતી હતી, પરંતુ આગામી સમયમાં તે ‘પ્રીમિયમ’ સર્વિસ બની શકે છે અને તેના માટે અલગથી વધારાનો ચાર્જ પણ લેવામાં આવી શકે છે.
કઈ કંપનીને થશે ફાયદો?
માર્કેટ એનાલિસ્ટ્સના મતે, આ ભાવવધારાનો સૌથી મોટો ફાયદો ભારતી એરટેલને થવાની સંભાવના છે. એરટેલનો રેવન્યુ શેર જે અત્યારે આશરે ૩૬% છે તે વધીને ૪૦% સુધી પહોંચી શકે છે. જ્યારે બીજી તરફ, આર્થિક સંકટનો સામનો કરી રહેલી વોડાફોન આઈડિયા (Vi) માટે આ સ્થિતિ પડકારજનક હોઈ શકે છે.
સામાન્ય માણસ પર શું અસર પડશે?
એક અંદાજ મુજબ, જો કોઈ યુઝર અત્યારે ૨૯૯ રૂપિયાનો માસિક પ્લાન વાપરી રહ્યો હોય, તો ૨૦ ટકાના વધારા બાદ તે પ્લાન અંદાજે ૩૬૦ રૂપિયાની આસપાસ પહોંચી શકે છે. ડિજિટલ ઇન્ડિયાના યુગમાં જ્યારે ઇન્ટરનેટ પાયાની જરૂરિયાત બની ગયું છે, ત્યારે આ વધારો મધ્યમ વર્ગના બજેટને ખોરવી શકે છે.
