વાયદા બજારમાં સોનાના ભાવમાં મોટો ઘટાડો
દેશના જ્વેલરી બજાર અને કોમોડિટી માર્કેટમાં આજે સોનાના ભાવમાં આંશિક ઘટાડો અને નરમાઈ જોવા મળી રહી છે. ૨૩ ઓક્ટોબર ૨૦૨૬ ના રોજ બજાર ખુલતાની સાથે જ મલ્ટી કોમોડિટી એક્સચેન્જ (MCX) પર ૨૪ કેરેટ સોનાનો વાયદા ભાવ ઘટીને ૧,૪૩,૩૦૩ રૂપિયા પ્રતિ ૧૦ ગ્રામના સ્તરે પહોંચી ગયો હતો, જે પાછલા ટ્રેડિંગ દિવસે ૧,૪૩,૩0૯ રૂપિયા પર બંધ થયો હતો.
બુલિયન બજારના અહેવાલો મુજબ, રાષ્ટ્રીય રાજધાની દિલ્હીના સરાફા બજારમાં સોનું ઘટીને આશરે ૧.૪૮ લાખ રૂપિયા પ્રતિ ૧૦ ગ્રામની આસપાસ ટ્રેડ થઈ રહ્યું છે. આંતરરાષ્ટ્રીય બજારમાં પણ સોનાની હાજર કિંમત ઘટીને ઔંસ દીઠ $૪,૦૩૫.૭૦ ના સ્તરે પહોંચી ગઈ છે, જે વૈશ્વિક રોકાણકારો માટે ચર્ચાનો વિષય બની છે.
વિવિધ કેરેટમાં સોનાના પ્રવર્તમાન બજારભાવ
ગુડરિટર્ન્સ અને સરાફા એસોસિએશનના આંકડાઓ અનુસાર, વિવિધ શુદ્ધતા ધરાવતા સોનાના દર અલગ-અલગ શહેરોમાં થોડા ઘણા તફાવત સાથે બોલાઈ રહ્યા છે. દિલ્હી, લખનૌ, મેરઠ, કાનપુર, નોઈડા, ગુરુગ્રામ અને જયપુર જેવા ઉત્તર ભારતના શહેરોમાં ૨૪ કેરેટ સોનાનો ભાવ પ્રતિ ૧૦ ગ્રામ ₹ ૧,૪૪,૫૩૦, ૨૨ કેરેટ સોનું ₹ ૧,૩૨,૫૦૦ અને ૧૮ કેરેટ સોનાનો ભાવ ₹ ૧૦૮,૪૪૦ આસપાસ ચાલી રહ્યો છે.
આર્થિક રાજધાની મુંબઈ, કોલકાતા, ચેન્નાઈ, ગુવાહાટી અને જલગાંવ જેવા શહેરોમાં ૨૪ કેરેટ સોનાનો ભાવ ₹ ૧,૪૪,૩૮૦, ૨૨ કેરેટ સોનું ₹ ૧,૩૨,૩૫૦ અને ૧૮ કેરેટ સોનાનો ભાવ ₹ ૧૦૮,૨૯૦ પ્રતિ ૧૦ ગ્રામ નોંધાયો છે. આ ઉપરાંત પટના, ભોપાલ, ઇન્દોર તેમજ ગુજરાતના પ્રમુખ શહેરો જેવા કે અમદાવાદ અને વડોદરામાં ૨૪ કેરેટ સોનાનો ભાવ ₹ ૧,૪૪,૪૩૦, ૨૨ કેરેટ સોનું ₹ ૧,૩૨,૪૦૦ અને ૧૮ કેરેટ સોનાનો ભાવ ₹ ૧૦૮,૩૪૦ પ્રતિ ૧૦ ગ્રામ પર ટ્રેડ થઈ રહ્યો છે.
ગયા દિવસોમાં બજારની સ્થિતિ અને વાયદા કારોબારમાં ઘટાડો
નબળા વૈશ્વિક સંકેતો અને હાજર બજારમાં માંગ ઘટવાને કારણે ગત સત્રમાં રાષ્ટ્રીય રાજધાનીમાં સોનાના ભાવમાં આશરે ૧,૦૦૦ રૂપિયાનો ઘટાડો નોંધાયયો હતો. ઓલ ઈન્ડિયા સરાફા એસોસિએશનના જણાવ્યા અનુસાર, અગાઉ ૯૯.૯ ટકા શુદ્ધતા ધરાવતું સોનું ૧.૪૯ લાખ રૂપિયા પર બંધ થયું હતું, જ્યારે વૈશ્વિક બજારમાં હાજર સોનું ૧.૭ ટકા ઘટીને ઔંસ દીઠ $૪,૦૭૨.૩૦ પર આવી ગયું હતું, જે એક જ દિવસમાં આશરે $૬૮.૯૮ નો મોટો ઘટાડો દર્શાવે છે.
મલ્ટી કોમોડિટી એક્સચેન્જ (MCX) પર ડિસેમ્બર ડિલિવરી માટેના કરારનો ભાવ રૂ. ૧,૭૨૪ ઘટીને રૂ. ૧,૪૪,૩૫૫ પ્રતિ ૧૦ ગ્રામ થયો હતો. બજારના સટોડિયાઓ અને વેપારીઓ દ્વારા નબળી હાજર માંગ વચ્ચે પોતાના સોદાનું કદ ઘટાડવામાં આવતા વાયદા બજારમાં પણ દબાણ જોવા મળ્યું હતું.
નિષ્ણાતોનું શું કહેવું છે?
બજારના જાણીતા નિષ્ણાતો અને વિશ્લેષકોના મતે, સોનાના ભાવોમાં આવતી આ અસ્થિરતા પાછળ વૈશ્વિક પરિબળો જવાબદાર છે. LKP સિક્યોરિટીઝના વાઇસ પ્રેસિડેન્ટ અને રિસર્ચ એનાલિસ્ટ (કોમોડિટીઝ અને કરન્સી) જતીન ત્રિવેદીએ જણાવ્યું હતું કે પશ્ચિમ એશિયા (મધ્ય પૂર્વ) ના સંઘર્ષો અને ભૌગોલિક-રાજકીય તણાવને લગતી ચિંતા વચ્ચે વૈશ્વિક અને સ્થાનિક બજારની ભાવના સતત દબાણ હેઠળ રહી છે, જેના કારણે સોનાના સ્થાનિક ભાવમાં મર્યાદિત ઘટાડો જોવા મળી રહ્યો છે. જો કે, લગ્નસરાની મોસમ નજીક હોવાથી આગામી દિવસોમાં ગ્રાહકો દ્વારા ખરીદી વધવાની પૂરેપૂરી શક્યતા છે.
