ઈન્ડિયન પ્રીમિયર લીગ (IPL) 2023 શરૂ થવામાં બે અઠવાડિયા બાકી છે. 16મી સીઝનની શરૂઆત પહેલા વિરાટ કોહલીના પ્રોમો શૂટનો BTS વીડિયો સામે આવ્યો છે.
IPL 2023 31 માર્ચથી શરૂ થવા જઈ રહી છે. તમામ 10 ફ્રેન્ચાઇઝીએ આગામી સિઝન માટે તૈયારી કરી લીધી છે. તે જ સમયે, બ્રોડકાસ્ટર સ્ટાર સ્પોર્ટ્સ પણ તૈયારીમાં વ્યસ્ત છે. તાજેતરમાં, રોહિત શર્મા અને હાર્દિક પંડ્યાએ સ્ટાર સ્પોર્ટ્સ માટે આઈપીએલનો પ્રોમો શૂટ કર્યો હતો, જેના પાછળના પડદા (BTS) ફૂટેજની ખૂબ ચર્ચા થઈ હતી. હવે અનુભવી બેટ્સમેન વિરાટ કોહલીનો એક BTS વીડિયો સામે આવ્યો છે, જે સોશિયલ મીડિયા પર ઝડપથી વાયરલ થઈ રહ્યો છે.
વીડિયોમાં જોઈ શકાય છે કે કોહલી શોરબકોર વચ્ચે શૂટિંગ કરી રહ્યો છે અને તે અલગ અંદાજમાં જોવા મળી રહ્યો છે. કોહલી ભીડની વચ્ચે ઊભો રહે છે અને જ્યારે ઘણો અવાજ આવે છે ત્યારે કાન પર હાથ મૂકે છે. વિડિયોના બીજા ભાગમાં કોહલી રોયલ ચેલેન્જર્સ બેંગ્લોર (RCB)ની જર્સીમાં જોવા મળે છે અને કહે છે ‘જબ હોગા શોર ઓન, તબ હોગા ગેમ ઓન’. વીડિયો સામે આવ્યા બાદ કોહલીના ફેન્સ તેના લુક અને સ્ટાઈલના વખાણ કરી રહ્યા છે. ઘણા લોકો કોહલીને ક્રિકેટનો પોસ્ટર બોય કહે છે.
કોહલી પ્રથમ સિઝનથી જ આરસીબી સાથે જોડાયેલો છે. તેણે ફ્રેન્ચાઈઝી સાથે 15 વર્ષ પૂરા કર્યા છે. આઈપીએલમાં તે એકમાત્ર એવો ખેલાડી છે જે આટલા લાંબા સમય સુધી સિંગલ ફ્રેન્ચાઈઝી માટે રમ્યો હોય. કોહલી IPLમાં સૌથી વધુ રન બનાવનાર બેટ્સમેન છે. તેણે ટૂર્નામેન્ટમાં 6624 રન બનાવ્યા છે. ઉલ્લેખનીય છે કે, ટેસ્ટમાં સદીના દુષ્કાળને ખતમ કરવા માટે કોહલી આ દિવસોમાં ચર્ચામાં છે. તેણે રવિવારે ઓસ્ટ્રેલિયા સામે અમદાવાદ ટેસ્ટમાં 186 રનની શાનદાર ઇનિંગ રમી હતી. કોહલીએ ત્રણ વર્ષથી વધુ સમય બાદ ટેસ્ટમાં સદી ફટકારી છે.
